ماڭعىستاۋلىق ديزاينەر امەريكادا وتكەن فەستيۆالدە جاداعايدى الەمگە تانىتتى
ماڭعىستاۋلىق ديزاينەر ايجان راحىمباي قىزى امەريكا قۇراما شتاتتارىندا جىل سايىن ۇيىمداستىرىلاتىن ءار ۇلتتىڭ مادەني سالت-ءداستۇرى مەن ادەت-عۇرپىن، قولونەرىن دارىپتەيتىن «Smithsonian folklife» فولكلورلىق فەستيۆالىنە قاتىسىپ، جۇننەن تىگىلگەن ماڭعىستاۋ جاداعايى مەن ىشىگىن تانىستىردى.
اتالعان شارا 1967 -جىلدان بەرى جىل سايىن ۆاشينگتون قالاسىندا ۇيىمداستىرىلادى. فەستيۆالعا ءار جىلى ا ق ش-تىڭ 50 شتاتىنان جانە 100 دەن استام شەتەلدەن قوناق كەلەدى.
ايجان راحىمباي قىزى فەستيۆالعا «ماڭعىستاۋ مۇنارى» كوللەكسياسىن اپارعان.
«كوكەيىمدە جۇرگەن ارمانىم ماڭعىستاۋلىقتاردىڭ ەجەلگى سىرت كيىمى - تۇيە جۇننەن سىرىلعان جاداعايدى زامانعا ساي جاڭعىرتىپ، شەتەلگە تانىتۋ ەدى. الەمنىڭ الپاۋىت ەلىنىڭ ءبىرى ا ق ش-تا وتەتىن شارادا كورسەتۋ مەن ءۇشىن ارمانىمنىڭ ورىندالعانى بولدى»، - دەيدى ايجان راحىمباي قىزى.
ايجان 2016 -جىلدان بەرى قولونەرمەن اينالىسادى.
«جاداعاي - قازاقتىڭ ەجەلدەن كەلە جاتقان سىرت كيىمى. ول قازىر دە اتا-اجەلەرىمىزدەن مۇرا بولىپ قالىپ، كەيبىر جانۇيالاردا ساقتالعان. ەر ادامنىڭ جاداعايى تۇيە ءجۇن سالىپ سىرىلىپ، استارلانعان.
شي ماقپالدان تىكە تۇسكەن ءبىر تىگىسپەن سىرىلىپ تىگىلگەن. ءبىز بۇرىنعى اجەلەرىمىز كيگەن جاداعايدىڭ كۇمىس تۇيمەلەرىن ۇقساتىپ، زەرگەرگە تاپسىرىسپەن ارنايى جاساتتىق. قازاقى كيىمنىڭ ءاربىر اشەكەيىندە حالقىمىزدىڭ تاريحىنىڭ، وي- ساناسىنىڭ قايتالانباس كورىنىسى بار. ول - ءبىزدىڭ ۇلتتىق مادەنيەتىمىز. ال ۇلت مادەنيەتىن جوعارى دەڭگەيدە كورسەتۋ - جاۋاپتى ءىس»، - دەيدى ول.
فەستيۆال 11-شىلدەدە ۇلتتىق ازيالىق ونەر مۇراجايىنىڭ Meyer Auditorium زالىندا وتكەن قولونەرشىلەر وداعىنىڭ ساندىك ديزاينىنىڭ كورسەتىلىمىمەن اياقتالعان.