فۋتبولدان قازاقستان قۇراماسى فينليانديادان جەڭىلىپ قالدى

استانا. قازاقپارات - قازاقستان فۋتبول قۇراماسى 2024-جىلعى ەۋروپا چەمپيوناتىنا ىرىكتەۋ ءتۋرنيرى اياسىندا فينليانديا قۇراماسىمەن كەزدەسىپ، 0:1 ەسەبىمەن جەڭىلىپ قالدى، دەپ حابارلايدى قازاقپارات ءتىلشىسى.

ىرىكتەۋ كەستەسىندە ءوز توبى بويىنشا ەكىنشى ورىندا تۇرعان ۇلتتىق قۇرامانى كوش باسىنداعى قارسىلاستارىمەن بولاتىن ماڭىزدى ويىندا قولداۋعا كەلگەن جانكۇيەرلەر «استانا ارەنا» ستاديونىن لىق تولتىردى.

قازاقستان قۇراماسى العاشقى مينۋتتان الاڭعا مىنا قۇراممەن شىققان ەدى: يگور شاتسكي، نۇرالى ءالىپ، مارات بىستروۆ، يسلامبەك قۋات، اسلان دارابايەۆ، اسحات تاعىبەرگەن، يان ۆوروگوۆسكي، ليەۆ سكۆورتسوۆ، ابات ايىمبەتوۆ، باقتيەر زاينۋتدينوۆ، الەكساندر ماروچكين. باس باپكەر - ماگومەد اليەۆ

فينليانديا قۇراماسىنىڭ باستاپقى قۇرامىن مىنانداي بولدى. لۋكاس گرادەتسكي، ارتتۋ حوسكونەن، ريچارد يەنسەن، روبەرت يۆانوۆ، وليۆەر انتمان، تەەمۋ پۋككي، راسمۋس شيۋللەر، كاان كايرينەن، نيكولاي الحو، يوەل پوحيانپالو، يلماري نيسكانەن. باس باپكەر - مارككۋ كانەرۆا.

ويىنعا باس تورەشىسى رۋمىن رادۋ پەترەسكۋگە وتانداستارى رادۋ گينگۋلياك پەن ميرچا گريگوريۋ، مارتسەل بيرسا كومەكتەستى.

قازاقستان فۋتبولشىلارى سالعان جەردەن ءوز الاڭدارىندا اتوي سالۋعا نيەتتى ەكەنىن كورسەتىپ، دوپقا يەلىك ەتۋگە تالپىنعان. ءبىراق فيندەر دە مۇنداي قارسىلىققا ىشتەي دايىندالىپ كەلگەنىن اڭداتىپ، الاڭ يەلەرىن تۇساپ باقتى. بىرتە-بىرتە قازاقستاندىق فۋتبولشىلار وزدەرىنە ۇيرەنشىكتى «ەكىنشى نومىرمەن» ويناۋعا كوشكەن. وقتىن-وقتىن قارىمتا شابۋىلداردىڭ ءبىرى گولمەن اياقتالا جازدادى. ابات ايىمبەتوۆتىڭ قيعاشتاي بەرگەن پاسى باقتيەر ءزاينۋتدينوۆتى تاپقان. ايىپ الاڭىنىڭ جيەگىنەن جاساعان سوققى قاقپادان ءسال بيىك كەتتى.

تاعى ءبىر ساتتە اسحات تاعىبەرگەننىڭ ەپپەن تاستاعان دوبى يسلامبەك قۋاتتى قاقپاشىمەن بەتپە- بەت قالدىراتىنداي مۇمكىندىك تۋىنداتقان. ءبىراق قورعاۋشى مۇنداي ۇرىمتال ساتكە دايىن بولماي شىقتى.

الاڭ قوناقتارى اسا ساق قيمىلداپ، پوزيتسيالىق شابۋىلدارعا يەك ارتتى. سونىڭ ارقاسىندا بولسا كەرەك، ءبىرىنشى تايمنىڭ وزىندە فيندەر 4 رەت بۇرىشتان دوپ كوتەردى.

ويىن بارىسىندا تەەمۋ پۋككي قاقپاشى يگور شاتسكيدىڭ بابىن تەكسەرىپ الدى. قاقپاشىنىڭ شالت قيمىلىنا جانكۇيەرلەر قيقۋمەن العىس ءبىلدىردى.

ابات ايىمبەتوۆتىڭ سول قاپتالدان ىشكەرىلەي كىرگەن قيمىلى قوناق كوماندانىڭ قورعاۋشىلارىن ەكى رەت قاتتى ساستىردى. ونىڭ بىرىنشىسىندە سوققى ءالسىز شىقسا، ەكىنشى تالپىنىسىن قورعاۋشى دەر كەزىندە جاۋىپ ۇلگەردى.

كەزدەسۋدىڭ ءبىرىنشى كەزەڭى ورتاسىنان اۋعاندا جانكۇيەرلەردىڭ قولداۋى قايتا ۇدەگەن. وسى كەزدە يان ۆوروگوۆسكي الىستان سوققى جاساپ كوردى. قارسى كوماندانىڭ قاقپاشىسى لۋكاس گرادەتسكي دوپتى بۇرىشتاماعا جىبەرىپ ۇلگەردى.

بۇدان كەيىن قازاقستان قۇراماسىنىڭ قاقپاسىندا دوپ ەنىپ كەتتى. وليۆەر انتمان دوپتى قاقپاعا تۇسىرەردىڭ الدىندا الاڭ سىزىعىنان شىعارىپ العانى تورەشى نازارىنان تىس قالماپتى.

ودان كەيىن اسلان دارابايەۆتىڭ جاساعان سوققىسى قاقپاشىنىڭ قولىنان تابىلدى. وسىلاشيا ءبىرىنشى كەزەڭ 0:0 ەسەبىمەن اياقتالدى. ويىننىڭ ستاتيستيكاسىن جۇرگىزۋشىلەر فيندەردىڭ العاشقى 45 مينۋتتىڭ 55 پايىزىن دوپپەن وتكىزگەنىن تىركەدى.

ەكىنشى كەزەڭنىڭ ءۇشىنشى مينۋتىندا يسلامبەك قۋات يان ۆوروگوۆسكيدىڭ پاسىن وكشەسىمەن باقتيەر زاينۋتدينوۆكە ىسىرا سالعان. ءبىراق سوققى ءساتتى شىقپادى.

56 مينۋتتا قازاقستان قۇراماسىنىڭ ويىنشىلارى قارسىلاس قاقپاسىن ءبىر مينۋت بويى توۋىلداپ، ناتيجە شىعارا المادى. فيندەر قارىمتا شابۋىلعا ۇمتىلعانىمەن، قازاقستاندىق فۋتبولشى ەرەجەنى بۇزىپ، شابۋىلدى بەسىگىندە تۇنشىقتىردى.

الاڭعا تىڭنان شىققان سامورودوۆ قازاقستاندىقتاردىڭ پوزيتسيالىق شابۋىلىن ءساتتى اياقتايتىن مۇمكىندىككە يە بولعان. وكشەمەن ايىپ الاڭىنا باعىتتاعان دوپ بۇرىشقا كەتتى. ءبىراق الاڭ يەلەرى بۇرىشتامادان ەشقانداي ناتيجە شىعارا المادى.

78 مينۋتتا كورەرمەندەر فۋتبولدىڭ «سەن سوقپاساڭ، ساعان سوعادى»، - دەگەن ەرەجەسى بەكەر ايتىلماعانىنا كۋا بولدى. فيندەر الاڭ يەلەرىنىڭ قاتەلىگىن پايدالانىپ وليۆەر انتماندى قاقپاشىمەن بەتپە-بەت شىعارعان، الىس بۇرىشقا باعىتتالعان دوپ تابلوداعى ەسەپتى وزگەرتىپ كەتتى.

ءبىر دوپ ايىرماشىلىعىمەن باسىمدىققا يە بولعان فينليانديا قۇراماسىنىڭ ويىنىندا ەركىندىك پايدا بولدى. ال قازاقستاندىقتار ەسەپ تەڭەستىرۋگە قانشا اسىققانىمەن، ارەكەتتەرى ءساتسىز اياقتالىپ جاتتى.

تورەشى ويىننىڭ نەگىزگى ۋاقىتىنا قوسىمشا 5 مينۋت قوستى. ءبىراق ول ۋاقىت قازاقستاندىق جانكۇيەرلەرگە گولدىڭ قۋانىشىن سىيلاعان جوق.

قوسىمشا ۋاقىتتىڭ ءۇشىنشى مينۋتىندا قازاقستاندىقتار پوزيتسيالىق شابۋىل ۇيىمداستىرىپ باققان. ودان دا ناتيجە شىقپادى. اقىرعى ەكى مينۋت فينليانديانىڭ جارتى الاڭىندا ءوتتى دەۋگە بولادى. وسىلايشا فيندەر توپتاعى ءبىرىنشى ورنىن ساقتاپ قالدى.

اۆتور:

ەسىمجان ناقتىباي