ەلورداداعى قابانباي، تۇران داڭعىلدارىنا كولىك كەپتەلىسى كۇشەيەدى - پوليتسيا ۇندەۋ جاريالادى
«استانا قالاسىنىڭ پوليتسيا دەپارتامەنتى 7- قىركۇيەك كۇنى «استانا ارەنا» ستاديونىندا قازاقستان مەن فينليانديا اراسىندا فۋتبولدان وتەتىن كەزدەسۋگە بايلانىستى قالا تۇرعىندارى مەن قوناقتارىنا قاۋىپسىزدىك ءۇشىن تۇران جانە قابانباي داڭعىلدارىندا كولىك تىعىنى بولۋى ىقتيمال ەكەنىن ەسكەرىپ، مارشرۋتتى الدىن الا جوسپارلاۋعا كەڭەس بەرەدى»، - دەلىنگەن دەپارتامەنتتىڭ باسپا ءسوز قىزمەتى تاراتقان مالىمەتتە.
اكىمدىك وسى ماتچقا ارناپ قوسىمشا قوعامدىق كولىك ۇيىمداستىرىپ وتىر.
«ستاديوننىڭ كولىك تۇراعىنا باعىتتالعان قوزعالىس شەكتەلەدى. استانانىڭ حالىقارالىق اۋەجايى اۋماعىنا باراتىن ساپاردى الدىن الا جوسپارلاۋعا كەڭەس بەرەمىز.
قۇرمەتتى جانكۇيەرلەر! ستاديون اۋماعىنا پلاستيك جانە شىنى قۇتى، تەسەتىن، كەسەتىن قۇرال، وق اتاتىن قارۋ مەن پيروتەحنيكا زاتتارىن الىپ كىرۋگە تىيىم سالىنادى.
الكوگول، ەسىرتكى زاتتارىن، شىلىم قوسپالارىن تۇتىنۋعا، قوقىس تاستاۋعا ارنالماعان جەرگە قوقىس قالدىرۋعا قاتاڭ تىيىم سالىنادى»، - دەلىنگەن رەسمي حابارلامادا.