كەيىنگى ەكى جىلدا وتاندىق عالىمدار قانداي جاڭالىق ويلاپ تاپتى

استانا. قازاقپارات - عىلىم جانە جوعارى ءبىلىم مينيسترلىگى كەيىنگى ەكى جىلدا قازاقستاندىق عالىمدار ويلاپ تاپقان جاڭالىقتارمەن ءبولىستى، دەپ حابارلايدى قازاقپارات ءتىلشىسى.

رەداكسيانىڭ رەسمي ساۋالىنا جاۋاپ بەرگەن ۆەدومستۆو سوڭعى جىلدارى عىلىمي كادرلار اسا پەرسپەكتيۆالى دەپ باعالاعان ءبىرقاتار جوبانى ىسكە اسىرعان. ناقتى توقتالساق:

1. بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتى عالىمدارىنىڭ COVID-19 كوروناۆيرۋستىق ينفەكسياسىنا قارسى 2 ۆاكسينانى (بەلسەندىلىگى جويىلعان جانە سۋببىرلىكتى) جاساۋى نەعۇرلىم ماڭىزدى عىلىمي جەتىستىكتەردىڭ ءبىرى سانالادى. دۇنيەجۇزىلىك دەنساۋلىق ۇيىمىنىڭ قازاقستانداعى كەڭسەسىنە QazVac ۆاكتسيناسىن تىركەۋ تۋرالى ءوتىنىش بەرىلدى.

2. ق ر مينەرالدىق شيكىزاتتى كەشەندى قايتا وڭدەۋ جونىندەگى ۇلتتىق ورتالىعىنىڭ عالىمدارى بولاتتى وتتەگىدەن تازارتۋ، تۇرلەندىرۋ جانە قوسپالاۋ ءۇشىن كونديتسيالانباعان كومىرتەگى شيكىزاتىن پايدالانۋعا نەگىزدەلگەن فەرروسيليكواليۋميني جانە «قازاقستاندىق» قورىتپاسىن الۋ تەحنولوگياسىن ازىرلەدى. قورىتپانىڭ تاجىريبەلىك پارتيالارى گەرمانيادا، رەسەيدە جانە تۇركيادا ونەركاسىپتىك سىناقتان ءساتتى ءوتتى. حالىقارالىق جانە ەۋروپالىق پاتەنتتەر الىندى.

3. ماشينا جاساۋ سالاسىندا د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىندە قىسقى ۋاقىتتا جولدار مەن تروتۋارلاردى قار مەن مۇزدان تازارتۋعا جابدىقتار كەشەنى ازىرلەنىپ، جول- قىزمەت كورسەتۋ ۇيىمىنىڭ پايدالانۋىنا ەنگىزىلدى. مۇزجارعىشتاردىڭ سەريالىق ءوندىرىسى ءۇشىن تەحنولوگيا ازىرلەنىپ، سەح جوبالاندى.

4. ەنەرگەتيكا سالاسىندا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ عالىمدارى كونسترۋكتسيالىق ماتەريالداردا، بالامالى ەنەرگەتيكادا، نانو جانە ميكروەلەكترونيكادا قولدانۋعا الەۋەتى بار نانوقۇرىلىمدى كومپوزيتتىك ماتەريالداردىڭ رادياتسيالىق جانە كورروزيالىق توزىمدىلىگى تۋرالى زەرتتەۋلەر جۇرگىزدى.

5. د. ۆ. سوكولسكي اتىنداعى وتىن، كاتاليز جانە ەلەكتروحيميا ينستيتۋتى ونەركاسىپ ورىندارى مەن اۆتوكولىك قۇرالدارىنىڭ ۋىتتى گاز شىعارىندىلارىنىڭ كاتاليتيكالىق بەيتاراپتاندىرعىشتارىن ازىرلەدى. وتاندىق كاتاليتيكالىق بەيتاراپتاندىرعىشتاردى وندىرەتىن مەنشىكتى سەح ىسكە قوسىلدى.

6. نازاربايەۆ ۋنيۆەرسيتەتىنىڭ جانىنداعى اككۋمۋلياتورلار ينستيتۋتى سۋ ليتي- يوندى اككۋمۋلياتور جوباسىن ءساتتى ىسكە اسىردى. جوبانىڭ ناتيجەسى بويىنشا ا ق ش پاتەنتى الىندى.

7. الەۋمەتتىك- گۋمانيتارلىق عىلىمدار سالاسىندا ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ عالىمدارى مەملەكەتتىك ءتىلدى ۇلتتىق لاتىن گرافيكاسىنىڭ الىپبيىنە كوشىرۋگە ارنالعان جاڭارتىلعان نورماتيۆتىك سوزدىكتەر مەن اكادەميالىق باسىلىمدار سەرياسىن ازىرلەدى.

8. اقپاراتتىق تەحنولوگيالار سالاسىندا ەكسپەريمەنتتىك جانە تەوريالىق فيزيكا عىلىمي- زەرتتەۋ ينستيتۋتى وت جاعۋ كامەرالارىنداعى تەحنولوگيالىق پروتسەستەردى وڭتايلاندىرۋ جانە اتموسفەراعا زياندى شىعارىندىلاردى بارىنشا ازايتۋ ماقساتىندا جىلۋ- ماسسا وتكىزۋ پروتسەستەرىن مودەلدەۋ بويىنشا ەسەپتەۋ ەكسپەريمەنتتەرىن جۇرگىزۋ ءۇشىن جاڭا اقپاراتتىق تەحنولوگيالار ازىرلەدى.

9. مەتاللۋرگيا جانە بايىتۋ ينستيتۋتى كۇكىرتتى قىشقىل شلامىنان تازارتىلعان جانە ەلەمەنتتىك سەلەندى، جەردە سيرەك كەزدەسەتىن مەتالداردى الۋ تەحنولوگيالارىن ازىرلەدى.

ەسكە سالا كەتەيىك، كەشە قازاقستاندىق عالىمداردىڭ قانشا ايلىق الاتىنىن جازىپ ەدىك.