قازاقستان تۇركياعا نە ەكسپورتتايدى

استانا. قازاقپارات - قارجى ۆيتسە- ءمينيسترى ەرجان ءبىرجانوۆ قازاقستان مەن تۇركيا اراسىنداعى تاۋار اينالىمى ەكى ەسە ارتقانىن ايتتى، دەپ حابارلايدى قازاقپارات ءتىلشىسى.

«تۇركياعا مەتالل ەكسپورتتاپ جاتىرمىز. بۇل تۇركياعا ەكسپورتتالاتىن نەگىزگى تاۋار تۇرلەرى. ال ول ەلدەن توقىما زاتتارىن، ماشينالاردى، جابدىقتاردى جانە باسقا دا حالىق تۇتىناتىن تاۋارلاردى الامىز»، - دەدى ەرجان ءبىرجانوۆ سەناتتا تىلشىلەر سۇراعىنا جاۋاپ بەرە وتىرىپ.

سونىمەن قاتار مينيسترلىك وكىلى تۇركيامەن اراداعى كەدەن دەرەكتەرى بويىنشا ايىرماشىلىقتار جايىندا ايتتى.

«قازىر تۇركيامەن دەرەكتەر بويىنشا ايىرماشىلىققا توقتالساق، تاۋار اينالىمىندا 0,8 پايىزدى قۇرادى. اقشالاي ەسەپتەگەندە، جىلىنا 12 ميلليون دوللارعا جەتەدى»، - دەدى ۆيتسە- مينيستر.

تۇركيا قازاقستاننىڭ نەگىزگى ساۋدا- ەكونوميكالىق سەرىكتەسىنىڭ ءبىرى سانالادى. قازاقستان رەسپۋبليكاسىمەن ساۋدادا تۇركيا 3-ورىندا (ە ا ە و- عا مۇشە مەملەكەتتەردى قوسپاعاندا) تۇر.

«2020 -جىلى ەكى ەلدىڭ اراسىنداعى ساۋدا اينالىمى 3,1 ميلليارد ا ق ش دوللارىن قۇرادى. ال 2022 -جىلدىڭ قورىتىندىسى بويىنشا تاۋار اينالىمىنىڭ كولەمى 6,3 ميلليارد دوللارعا جەتتى. 2023 -جىلدىڭ ءبىرىنشى جارتىجىلدىعىندا بۇل كورسەتكىش 3,2 ميلليارد دوللار بولدى. ەكىنشى جارتىجىلدىقتا تاۋار اينالىمى ايتارلىقتاي ءوسۋى مۇمكىن»، - دەدى ەرجان ءبىرجانوۆ.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان ۇكىمەتى مەن تۇركيا ۇكىمەتى اراسىنداعى اقپارات الماسۋدى ۇيىمداستىرۋ جانە كەدەندىك باقىلاۋ راسىمدەرىن وڭايلاتۋ تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.

قۇجات اياسىندا قازاقستان مەن تۇركيا اراسىندا كەدەندىك باقىلاۋ راسىمدەرى جەڭىلدەيدى.