كاسپي بانك قىزمەتكەرى شابۋىل وقيعاسىن باستان- اياق ايتىپ بەردى
«جۇمىس كۇنى ەدى، ءبىراق كليەنتتەر بولعان جوق. ارىپتەسىممەن جۇمىس تۋرالى سويلەسىپ وتىردىق. ءبىر كەزدە ءا. مۋرادوۆ كەلدى. مەن ونى كليەنت دەپ ويلاپ، امانداستىم. ول بىردەن ارىپتەسىمدى ۇستاپ، موينىنا تاپانشا ءتارىزدى قارۋدى تاقادى. ءبىراق ول راس تاپانشا ما، بىلمەدىم. سودان كەيىن ول دورەكىلىك تانىتىپ، بارلىق ەسىكتى جاۋىپ تاستادى جانە ءبىزدى ولتىرەتىنىن ايتتى، ياعني ماعان بارلىق ەسىكتى كىلتپەن جابۋىمدى بۇيىردى. مەن نە ىستەرىمدى بىلمەي، ءبىر ورىندا تۇرىپ قالدىم. سوسىن مەن كۇزەتشىگە قاراي جۇگىردىم، كومەك سۇراپ، بەلگىسىز بىرەۋدىڭ كەلگەنىن ايتتىم. كەيىن كۇزەتشى سىرتقا شىعىپ، قايتا كىرمەدى. سوسىن مەن كيىم ىلەتىن جەردىڭ كىلتىن تابۋعا تىرىستىم، ءبىراق تابا المادىم. ودان سوڭ مەنەدجەر ارىپتەسىم ەكەۋمىز تىنىش وتىردىق»، - دەدى سوت بارىسىندا بانك قىزمەتكەرى ءارى زارداپ شەگۋشى.
ونىڭ ايتۋىنشا، وسى ارادا ولار پوليتسياعا حابارلاسىپ ۇلگەرگەن.
«ءبىر كەزدە شابۋىلداۋشى بىزگە ايقايلاي باستادى، نە ىستەپ جاتقانىمىزدى سۇرادى. سودان سوڭ ول ماعان دەلدال بولاتىنىمدى ايتىپ، قاعازعا بۇكىل تالاپتارىن جازۋدى سۇرادى. اتاپ ايتقاندا، كۇزەتشىنىڭ قايتىپ ورالۋىن جانە بانكتىڭ اقشاسىن اۋدارۋدى تالاپ ەتتى. ونىڭ تالاپتارىن قاعازعا جازىپ، شىعا بەرىس ەسىكتىڭ جانىنا قالدىردىم. ودان ءارى پوليتسيا قىزمەتكەرلەرى الىپ كەتتى. سوسىن ارىپتەسىم ەكەۋمىز كاسسانىڭ ارتىندا 2-3 ساعات تىعىلىپ وتىردىق. ءبىرازدان سوڭ ول ءبارىن جارىپ جىبەرەتىنىن ايتىپ ايقايلادى جانە عيماراتقا ەشكىمنىڭ كىرمەۋىن تالاپ ەتتى. «مەن قىزمەتكەرلەردى ايايمىن، ەشكىمگە زيان تيگىزگىم كەلمەيدى، ءبىراق سولاي بولۋى كەرەك» دەدى»، - دەپ تولىقتىردى زارداپ شەگۋشى.
سونداي- اق، وقيعا كۋاگەرى ءبىر ساعاتتان كەيىن كۇدىكتىنىڭ كەلىسسوزدەر بولمەسىنە كىرگەنىن ايتتى.
«سول ساتتە مەن اتا- اناما حابارلاما جىبەرە باستادىم. كاسسا جابىق بولدى، مەن ەشتەڭە ەستىمەدىم. 3 ساعات كەلىسسوزدەن كەيىن ارنايى كۇشتەر مەن پوليتسەيلەر كەتىپ قالدى. سودان سوڭ ءبىر نارسە جارىلدى، ارنايى كۇش ماماندارى تەز كەتۋىمىزدى سۇرادى. وسىلايشا ءبىزدى سىرتقا الىپ شىقتى، ەدەندە قان ىزدەرى بولدى»، - دەيدى بانك قىزمەتكەرى.
ايتا كەتەيىك، سوت وتىرىسى الدىندا سۋديا كۋاگەرلەر مەن زارداپ شەككەندەرگە قاتىستى جەكە مالىمەتتەردى (اتى- ءجونى، قىزمەتى، ت. ب. ) جاريالاۋعا تىيىم سالدى. سوت وتىرىسى بۇگىن ساعات 15:00 دە جالعاسادى.
بۇعان دەيىن كۋاگەر بانك عيماراتىنا شابۋىلداۋشى ازاماتتىڭ اپكەسىنىڭ ەمىنە اقى تالاپ ەتكەنى تۋرالى ءمالىم ەتكەن ەدى.
ەسكە سالا كەتسەك، بيىل 18 -ماۋسىمدا قارۋلانعان ەر ادام ەلورداداعى Kaspi بانك عيماراتىندا بىرنەشە كىسىنى تۇتقىندا ۇستاپ وتىردى.
اراعا ۋاقىت سالىپ اتالعان بانكتىڭ باسپا ءسوز قىزمەتى عيماراتتا كليەنتتەردىڭ جوقتىعىن جانە پوليتسيا قىزمەتكەرلەرىنىڭ كۇدىكتىمەن كەلىسسوز جۇرگىزىپ جاتقانىن مالىمدەدى.
وقيعا ورنىنا ىشكى ىستەر ءمينيسترى مارات احمەتجانوۆ باردى.
پوليتسيا قىزمەتكەرلەرى كەپىلدەگى ازاماتتاردى بوساتىپ الدى.
23- تامىزدا Kaspi Bank عيماراتىنا جاسالعان شابۋىل بويىنشا قىلمىستىق ءىس سوتقا جەتكەنىن حابارلاعان ەدىك.
ايتا كەتەيىك، 29-تامىزدا وتكەن العاشقى سوت وتىرىسىندا Kaspi Bank عيماراتىن باسىپ العان جىگىت ونىڭ الدىندا ءوزىن ءولتىرۋ ءۇشىن ءدارى ىشكەنى بەلگىلى بولدى.