مەن «ادەبي ستيلى قالىپتاسقان جازۋشى» دەگەن ءسوزدى ونشا ۇناتا بەرمەيمىن - سەرىك قاپشىقباي ۇلى، قىتاي مەملەكەتتىك سىيلىعىنىڭ يەگەرى
(اقىن- جازۋشى سەرىك قاپشىقباي ۇلى - شىڭجاڭ جازۋشىلار وداعىنىڭ، قازاقستان جازۋشىلار وداعىنىڭ مۇشەسى. قىتاي مەملەكەتتىك سىيلىعىنىڭ يەگەرى. قازاق ەلى تاۋەلسىزدىڭگىنىڭ 10 جىلدىعىنا وراي ارنايى مەدالمەن ماراپاتتالعان. ون شاقتى پوەزيالىق، پروزالىق كىتاپتىڭ اۆتورى. سەرىك قاپشىقباي ۇلى 2018 -جىلى 15- قاڭتار كۇنى 83 جاسىندا استانادا قايتىس بولدى.)
- سەرىك اعا، ءومىرباياندىق رومانىڭىز قالاي جازىلعانىن ايتىپ بەرسەڭىز؟
- بۇل روماندى جازۋ ماعان وڭاي تۇسپەدى. ورتا جولدا جازباي تاستاپ كەتپەكشى كەزىم دە بولدى. ءبىراق بۇكىل ءومىرىڭنىڭ قاق جارتىسىنىڭ كوبى وسىعان بايلانىستى بولعاندىقتان ونى تاستاپ كەتۋگە ءداتىم جەتپەدى. ايتپەسە، اۋىرتپاشىلىعىن ءبىر كىسىدەي تارتتىم. ونىڭ ءبارىن ايتىپ وتىرۋدىڭ ءوزى ىڭعايسىز. رومان 3 جىلدان استام ۋاقىت بۇرىن جازىلىپ شىققانىمەن، ونى باسپادان شىعارۋدىڭ مۇمكىندىگى تەك بيىل عانا تۋدى.
- ءسىزدىڭ «جۇرەك تۇستان» رومانىڭىز نەسىمەن ەرەكشەلەنەدى؟
- ءومىرباياندىق روماندى كىم جازبادى. كوپ جازۋشى جازدى. ءبىراق مەن باسقا ءبىر تاسىلمەن، ۇكىمەتپەن بەت جىرتىسىپ، باس جاققا بارىسا بەرۋدەن كورى، تاعدىرى بولىمىستىڭ الەگىمەن بولعان وقيعانى بايلانىستىرىپ جازدىم. انىعىن ايتقاندا، ءداستۇرلى ءومىرباياندىق شىعارما جازۋ ستيلىنەن مۇلدە بولەك. ەندى وسى كىتابىم قازاق ادەبيەتىنىڭ ايدىنىنا تامشى بولىپ تامىپ حالقىمنىڭ رۋحاني يگىلىگىنە اينالسا بولعانى.
- مودەرنيزم ادەبيەتىنىڭ جەتەگىنە ەرىپ كەتكەن جوقسىز با؟
- وتە دۇرىس ايتاسىڭ. مەنىڭ اينالسوقتاعانىم سانالىق ادەبيەت. ءبىراق سونىڭ وزىنە كۇپ ەتىپ ءتۇسىپ كەتۋگە دە بولمايدى ەكەن. كۇمپ بەرىپ ءتۇسىپ كەتىپ جۇرگەندەردى دە كورىپ ءجۇرمىز. ادام كوركەم شىعارما وقىعانداي بولمايدى ەكەن. ونىڭ وي يىرىمدەرىنە قاراپايىم وقىرمان بويلاي المايدى ەكەن. سول سەبەپتى ءسىز ايتقان مودەرنيزمدى ءوزىمىزدىڭ قارابايىر ادىسىمىزبەن بىرلەستىرىپ جازۋعا تىرىستىم. مۇنىڭ وزگەشەلىگىدە وسىندا دەپ ويلايمىن. ونىڭ ءادىل باعاسىن وقىرمان بەرەدى عوي.
- ەل اراسىندا «سەرىك قاپشىقباي ولەڭدەرىن تۇسىنىكسىز ەتىپ استارلاپ جازادى. مىنا زاماندا ولاي جازۋدىڭ نە قاجەتى بار» دەگەن پىكىر بار...
- ونىڭ راس. ونداي ايتقانداردىڭ ءسوزىن ءوزىم دە ەستىپ ءجۇرمىن. قاراپ وتىرساڭ «ادەبيەت» دەگەن ءسوزدىڭ ءوزى «استار» دەگەن سوزگە جاقىن ەمەس پە؟ ال كۇندەلىكتى قارا سۋشا ساپىراتىن ءسوز بولسا ونىڭ اۋىلى ءبىر باسقا. ونى كوركەم ادەبيەتپەن سالىستىرۋعا مۇلدە كەلمەيدى. سوندىقتان ادەبيەتتە استارلاي ايتۋ دەگەن ەجەلدەن بار. ءارى- بىردەن كەيىن ول - ادەبيەتتىڭ اتا كاسىبى. ونى جوققا شىعارا المايسىڭ. ەگەر پوەزيادا استارلاپ جازۋدىڭ سيقىرىن جاقسى مەڭگەرا الساڭ، وندا سەنىڭ جازعان ءاربىر ولەڭىڭ سونىسىمەن تۇرلەنىپ تۇرادى. ال استارلايمىن دەپ جۇمباقتاپ كەتەتىن، ويلاساڭ ميىڭ جەتپەيتىندى شاتاسۋ دەيدى.
- ءسىزدىڭ وزگەشەلەۋ جازىلعان بۇل رومانىڭىزدى دا جۇرت تۇسىنبەي قالىپ جۇرمەي مە؟
- ولاي بولا قويماس. ەگەر ءسىز ايتقانداي «تۇسىنبەدىك» دەگەن ءبىر اۋىز سوزبەن جىلى جاۋىپ تاستاسا ادەبيەتكە ودان ارتىق قاسىرەت جوق شىعار. كوپ نارسەنى قوسقىم كەلدى، ءبىراق ودان دا قورقاقتاپ قالىپپىن. سول سەبەپتى كوبىنەسە وقىرماندى ويلاۋمەن بولدىم دا، قيالىمداعى ءبىراز دۇنيەلەردەن ايىرىلىپ قالعان جەرىم بار.
- سىندى قالاي قابىلداپ ءجۇرسىز؟
- سىن - ادەبيەتتىڭ كۇرە تامىرى. ونسىز ادەبيەت كوگەرمەيدى، كوكتەمەيدى. ءارقانداي جازۋشىنىڭ باعامداي الماعان يديالىق دۇنيەلەرى كوپ قوي. ال مۇلتىكسىز، كەمشىلىكسىز جازامىن دەۋ مۇمكىن ەمەس قوي. قايتا ونىڭ بولعانى جاقسى. مەن «ادەبي ستيلى قالىپتاسقان جازۋشى» دەگەن ءسوزدى ونشا ۇناتا بەرمەيمىن. ەڭ جاقسىسى ادەبي ستيلدىڭ قالىپتاسپاعانى جاقسى. ادەبيەت جاراتىلىستىق عىلىم ەمەس، بەلگىلى ءبىر فورمالاعا تۇسەتىن. جازۋشى قالىپتاسپاعان سايىن ول ساعان جاڭا دۇنيە اكەلە الادى. «قالىپتاسقان جازۋشى» دەگەن شىعار بيىگى ءبىتتى، ەندى ودان ەشتەڭە شىقپايدى دەگەن ءسوز عوي باياعى. الدىڭدا ءومىرىڭ بولادى ەكەن، جازادى ەكەنسىڭ، سىزادى ەكەنسىڭ ەڭ جاقسىسى قالىپتاسپاي جازعانىڭ جاقسى.
- جازۋشىنىڭ بەدەلىن نەمەن ولشەۋگە بولادى؟
- جازۋشىنىڭ بەدەلىن ولشەيتىن ءبىر-اق نارسە بار. ول - جازۋشىلىق ەڭبەگى. ونىڭ جازعان شىعارماسى ءوز ومىرىندە، ءوز باعاسىندا بەرە الادى. ەندى ويپىل-تويپىل بولىپ جاقسى باعا بەرىلمەي قالۋ، جەرىنە جەتكىزىپ ايتىلماي قالۋدىڭ ءوزى دە جازۋشى بەدەلىنە نۇقسان كەلۋى دە عاجاپ ەمەس. ماسەلەن، مەنىڭ كىتابىمدى وقىعاندار سەكىلدى «ول وسىنداي، ول مىنداي» دەگەن سەكىلدى الا-قۇلا پىكىرلەر دە جازۋشى ءۇشىن ابىروي اپەرمەيدى. ءبىراق سانالى وقىرمان كىمنىڭ كىم ەكەنىن ءوزى ءبارىبىر ەكشەپ الاتىنىنا سەنىمىم كامىل.
- مۇمكىن، وقىرمانى كوپ اۆتوردىڭ بەدەلى جوعارى بولاتىن شىعار؟
- بۇل ءسوزىڭنىڭ دە جانى بار. ءبىراق بۇگىنگى وقىرمانداردىڭ كوپتىگىنەن ءبىر جازۋشىنىڭ بەدەلىنىڭ «جوعارى» نەمەسە «تومەن» ەكەنىن ءبىلۋ مۇمكىن ەمەس. ەگەر شىمكەنتتەن شىعاتىن «قىزىق- مىزىق» دەگەن سەكىلدى گازەتتەردى وقيتىن وقىرمانعا قاراپ جازۋشىنىڭ بەدەلىنىڭ جوعارى ەكەنىن ايتساق كۇلكىلى بولماي ما؟ سوندىقتان ءبىر كىتاپتى دۇنيەجۇزىندە 5 ادام وقىسا دا ول سول جازۋشىعا جەتكىلىكتى. بۇل مەن ءۇشىن بولادى.
- «جازۋشى ۇساقتالىپ كەتتى» دەگەن پىكىرمەن كەلىسەسىز بە؟
- جازۋشىنىڭ ۇساقتالۋى دەگەن نارسە پىكىرىڭنىڭ، ويىنىڭ قۇنى كەتەدى دەگەن ءسوز عوي. جەرىنە جەتكىزىپ شىعا المايسىڭ. تۇسىنىكتە شالكەم- شالىس بولادى. ەڭ باستىسى ادەبيەتتەگى باسەكەنىڭ جوقتىعى جازۋشىنى ۇساقتاتادى. بۇل كۇندەستىك نە كورە الماستىق ەمەس، وي باسەكەسى بولۋ كەرەك. ادەبيەتتە وي باسەكەسىمەن جانساقتاۋعا بولادى. تىڭ ويدى ءدال تاۋىپ ويىپ تۇسە الماساڭ ءسىز ايتىپ وتىرعان ۇساقتالۋ دەگەن سول كەزدە بولادى. بولىپ تا جاتىر. مەن وسى ۇساقتالۋدان قاتتى قورقام. قارتايىپ ۇساقتالۋعا دا بولادى. جالىن اتىپ تۇرعان كەشەگى وي مەن پىكىر وندا جوق قوي. ەگەر شىن جازۋشى بولسا 70-كە دەيىن بەرىلمەيدى.
- ءسىز ادەبيەتتىڭ ءتۇرلى جانرىندا شىعارما جازىپ جۇرگەن قالامگەرسىز. وسى جازۋشى ءۇشىن قانشالىقتى ءتيىمدى؟
- قىتايدا جۇرگەندە 10 دراما جازۋدى جوسپارلاعام. سونىڭ ۇشەۋىن عانا جازدىم. قالعانىن جازۋعا باتىلىم بارماي وتىر، وسى ۇشەۋمەن توقتادى. ادەبيەتتىڭ جانرى كوپ، ءوز باسىم پوەزيا، پروزا، دراما جانە بالالار ادەبيەتىمەن دە اينالىسقان كەزىم بولعان. ەگەر قالامگەردىڭ قالام قارىمى ءار جانرعا جەتىپ تۇرسا جازعانعا نە جەتسىن. ول جاقسى ءىس قوي.
- قازاق وقىرماندارى نەگە ازايىپ كەتتى؟
- جۇرت وقىرمان ازايىپ كەتتى دەپ زارلاپ ءجۇر عوي وسى كۇندە. ول كەشەگى كۇننىڭ ەنشىسىندە قالدى، ول كەزدە سەنى زورلىقپەن وقىتاتىن. ول كەزدەگى شىعارمانىڭ ءبارى جامان بولعان جوق، ونىڭ ىشىندە دە نە كەرەمەت شىعارمالار دا بولعان. ادەبيەتتىڭ ءبارى وقىلادى دەگەن مۇمكىن ەمەس. ەگەر شىنايى كوركەم شىعارما بولسا ول وقىلادى. ەكىنشى ءبىر جاعىنان حالىققا مىندەتتەپ وقىتۋ كەرەك. ولار دا ءتۇسىنسىن، ءبىلسىن. «حالىق وقىمايدى» دەپ ءوزىمىز ادەبيەتتى كۇزەپ وتىرامىز. بۇل دۇرىس ەمەس. كىنا وقۋشىدا ەمەس، باستى كىنا جازۋشىنىڭ وزىندە.
- مۇمكىن، ادەبيەت سىننىڭ قازانى بۇرقىلداپ قايناماعاندىقتان، حالىقتىڭ ادەبيەتكە دەگەن قىزىعۋشىلىعى ازايعان شىعار...
- جازۋشىلار وداعىعىنا ءار جىلعى شىعىپ جاتقان شىعارمالار تۋرالى جيىندار وتكىزىپ، سول تۋرالى باياندامالار جاسالۋ كەرەك. پىكىر ايتىلىپ، تارتىستار بولۋ كەرەك. اربىردەن كەيىن ءبىرىنىڭ شىعارماسىنا ءبىرى پىكىر جاۋدىرىپ قىپ- قىزىل مايدان بولۋ كەرەك. جانە «قازاق ادەبيەتى» گازەتىندە سىنشىلاردىڭ ماقالالارى قارشا بوراپ تۇرسا ادەبيەتتىڭ كوسەگەسى سوندا كوگەرمەي مە؟ سودان كەيىن كوركەم شىعارمانى وقىماي كورسىن. قازىر جازۋشىلار وداعى تىڭعىلىقتى جۇمىستار ىستەپ جاتىر. ءبىراق وسى جاعىنا جيىرەك بارسا جاقسى بولار ەدى.
- كوپ اقىن- جازۋشىلار ءتۇرلى سىيلىقتارعا شىعارماسىن ۇسىنىپ الاشاپقىن بولىپ جۇرەدى. ءسىزدى سولاردىڭ قاتارىنان نەگە كورمەيمىز؟
- مەنىڭ ونداي ادەتتەرىم جوق. مۇمكىن، مەنىڭ باستى كەمشىلىگىم دە وسى شىعار. بايقاپ وتىرساڭىز قازىردىڭ وزىندە سىيلىق الىپ جۇرگەن شىعارمالاردا رەاليزمنىڭ فورماسىن كورەمىن. باعانادان ءسوز ەتىپ وتىرعان مودەرنيزم ادەبيەتى قايدا؟ دۇنيە ادەبيەتىنىڭ بەتالىسى قايدا؟ قازىرگى جاستاردى سىنايدى ول دۇرىس ەمەس. ءبارىبىر سول جاستاردىڭ ايتقانى بولادى. وتكەنى ولاردىڭ ادەبيەتكە بەت الىسى جاقسى، ىزدەنىسى بولەك. الەم ادەبيەتىنىڭ ارناسىنا قاراي بەت بۇرعان. وعان دا ۋاقىت كەلەر، ءتۇبى سولاردىڭ ايتقانى بولادى. جاستاردىڭ ءبارى سوعان دەن قويادى دەگەندىك ەمەس، ونىڭ ىشىندە دە نەبىر ۇزدىكتەرى ءالى- اق سوعان جەتەدى. ادەبيەت بۇرىنعىدان 180 گرادۋس بۇرىلدى دەۋگە بولادى. بۇرىلۋى دا كەرەك. ادەبيەت جان ساقتايمىن دەسە سولاي ىستەگەنى دۇرىس. ءار ءداۋىردىڭ ادەبيەتى تاريح قويناۋىندا قالۋ كەرەك. تاريحتىڭ مىندەتى - ارتا قالىپ وتىرۋ. سونداي شىعارمالاردى مىنا 21-عاسىردا سىيلىققا ۇسىنىپ جۇرگەن كومميسسياعا تاڭىم بار.
- تاۋەلسىز قازاقستاننىڭ قازاق ادەبيەتى قالىپتاسىپ ۇلگەردى مە؟
- بۇل تۋرالى جازۋشىلاردىڭ ءبىرازى ايتىپ تا ءجۇر. جاقىندا ءبىر ۇلكەن جازشىنىڭ اۋزىنان «قازىر دۇنيە ونشا ساباسىنا تۇسە قويعان جوق، سوندىقتان جاڭا زامان ادەبيەتىن جاساۋعا اسىقپاۋ كەرەك» دەگەن ءسوزدى ەستىپ قالدىم. مۇنى ونىڭ قانداي ويمەن ايتىپ وتىرعانىن بىلە المادىم. ءبىراق مەن بۇل پىكىرمەن كەلىسە المايمىن. قازىر سوتسياليستىك قىسىم، ۇجىمشىلدىق- كوللەكتيۆيزم دەگەن تالقاندالىپ، جاڭا زامان ورنادى. ۋاقىت جۇگەن- نوقتاڭدى سىپىرىپ الىپ، قايدا بارساڭ، سوندا بار، ەركىنسىڭ دەپ وتىرعان جوق پا؟! قالامگەرلەردىڭ ىزدەگەنى دە وسى ەمەس پە؟ قاي تاقىرىپتا، قاي جانردا قالاي جازامىن دەسەڭ دە، تىزگىن- شىلبىرىڭ ءوز قولىڭدا. بيلىكتىڭ دە، باسقانىڭ دا تالاسى جوق. نەگە جازباسقا؟! جازىپ جۇرگەندەر بار، ءبىراق احۋال تاۋەلسىز قازاقستاننىڭ قازاق ادەبيەتى قالىپتاستى دەۋگە كەلمەيدى.
ادەبيەتكە «كەيىن» جانە «بۇرىن» دەگەن ولشەم قويىلماۋى كەرەك. ادەبيەت - بۇدان مىڭ جىل بۇرىن جازىلسا دا ادەبيەت. ءتىپتى، بۇدان مىڭ جىل كەيىن جازىلسا دا، ادەبيەت. ادەبيەت - الەمدىك وي تۋىندىسى. ال ەندى تاقىرىپ سالماقتى، ءتۇر تاريحي شىعارما بولىپ زەرتتەۋدى تالاپ ەتسە، ونىڭ ءجونى ءبىر باسقا. مودەرنيزم (مۇنى مەن تۇيسىك، ەلەس ادەبيەتى دەپ ءجۇرمىن) ادەبيەتىنە دە ەشقانداي ۋاقىتتىڭ، مەزگىلدىڭ، ساياساتتىڭ اسەرى بولماۋعا ءتيىس، ءتىپتى اۋليەلىكتىڭ، دانىشپاندىقتىڭ كەرەگى جوق. بۇل - وسىنداي. «ادەبيەت حارەكتىر اشادى» دەگەنگە ءوز باسىم سەنبەيمىن. ءبارى سەنىڭ جازۋشىلىق شەبەرلىگىڭە بايلانىستى. ادامنىڭ حارەكتەرىن، وبرازىن اشۋ دەگەن ءبىر قىسپاقتار بار عوي. ال مودەرنيزم ادەبيەتى وعان ەركىن قارايدى، ودان اتتاپ تا كەتۋى مۇمكىن. ول سەنىڭ جازۋشىلىق شەبەرلىگىڭە بايلانىستى. مىنە، وسىدان بارىپ قازىرگى ادەبيەتتە شابانداۋ بارلىعى بايقالادى.
اۋىلدىڭ از جازىلىپ، قالانىڭ جازىلماي جۇرگەنى، نارىقتىق ەكونوميكاعا بويلاپ بارماعانىمىز شىن. مودەرنيم ادەبيەتىنە مۇنىڭ ءبارىنىڭ قاجەتى جوق. ارينە، ساياسات قالىپتاستىرعان قوعامدىق ءومىردى دە جازۋعا بولادى. ءبىراق كەشەگى كۇننىڭ ءومىرى ساعان ءومىر بولا المايدى. ال سەنەن كەيىنگلەردىڭ ءومىرى ساعان تاعى ءومىر بولا المايدى. ءار ءداۋىردىڭ ءبىر- بىرىنە ۇقسامايتىن ءوز ءومىرى بار. دەمەك، سول ءومىردى قوتارا جازۋ - ادەبيەتىنىڭ مىندەتى. شىڭعىس ايتماتوۆتىڭ شىعارمالارى ناقتى ومىردەن الىنسا دا، تۇيسىك ادەبيەتىمەن جازىلعان. ولاردى مىڭجىلدان كەيىن وقىساڭ دا ءوز قۇنىن جوعالتپايدى. ءداۋىر شەڭبەرىنەن اتتاپ كەتكەندىكتەن دە قۇندى بولىپ تۇر. بىزگە، مىنە، سونداي ادەبيەت قاجەت. وكىنىشكە وراي، ونداي ادەبيەتتىڭ اۋىلى الىس بولىپ تۇر. قازىر ءبىر جاستار مودەرنيزممەن جازىپ ءجۇر، كوپ- كورىم ساۋاتى بار، ءبىراق ءتىل دەگەننەن ماقۇرىم. جۇتاڭ تىلمەن جازىلعان شىعارمادان قانداي جىلۋلىق سەزىنەرسىڭ.
- جاستار تالپىنىسىنا كوڭلىڭىز تولمايتىن سياقتى عوي؟
- اڭگىمە تولۋ- تولماۋ دا ەمەس. ويتكەنى بۇل جازۋشىلار دا وسى - زاماننىڭ تۋىندىسى. ولاردىڭ كۇن كورىپ وتىرعان ءتىلى - قازىرگى قازاق ءتىلى. ءبىراق جازۋشىدا تىرىسۋ، ىزدەنۋ دەگەن بولۋى كەرەك ەمەس پە؟ قازىرگى جاستار تولىق قاندى قازاق تىلىندە سويلەي المايدى. شىنى كەرەك، ونداي ورتا دا جوق قوي سويلەپ تۇرعان. سەنىڭ ۇلكەن جيىندارىڭ، ۇكىمەت پەن پارلامەنتىڭ باسقا تىلدە سايراپ تۇرعان جوق پا؟ سەنىڭ كەلەلى شىعارمالارىڭ دا باسقا تىلدە جازىلعان. سوندا بۇلار ءتىلدى قايدان تابادى؟ شابانداسا مەيلى، ءبىراق زەر سالىپ، ىزدەنۋلەرى كەرەك. ءبىر جاستاۋ جازۋشى: «شاپانى قىزىل توبىققا دەيىن ءتۇسىپ تۇر» دەپ جازىپتى. قازاق «قىزىل توبىققا دەيىن» دەپ ايتپايدى، «قىزىل اسىققا دەيىن» دەپ ايتادى. ءتىپتى، جاستاردى قويىپ ۇلكەن جازۋشىلاردىڭ ءوزى ءسوزدى بۇزىپ، تەك ەلدەن ەستىگەنىن عانا قاعازعا ءتۇسىرىپ ءجۇر. مىسالى، «اۋزىن اشسا جۇرەگى كورىنەدى» دەگەن تۇراقتى ءسوز تىركەسى بار ما قازاقتا؟ ول ءتىپتى فيزولوگيالىق تۇرعىدان دا دۇرىس كەلمەيدى عوي. ونىڭ دۇرىسى «اۋزىن اشسا كومەيى كورىنەدى» ەمەس پە؟ ەندى بىرۋلەرى «قويشى كوبەيسە، قوي ارام ولەدى» دەپ قولدانىپ ءجۇر؛ ونىڭ ەجەلگى نۇسقاسى «مولدا كوبەيسە، قوي ارام ولەدى» ەمەس پە ەدى؟ «پورا- پورا بولىپ تەرلەيدى» دەگەن نەدەگەن ءسوز. «التى ايرىعىنان تەر اقتى» دەگەن ءسوز عوي باياعى. مۇنى كورىپ وتىرىپ بۇگىنگى جاستاردى كىنالاۋدىڭ ءوزى ارتىقتاۋ بولار.
- ءسىز قىتاي مەملەكەتتىك سىيلىعىن الىپسىز. قىتايدا سىيلىق الۋ بىزدەردىكىنەن وڭاي ما؟
- قيىن ەمەس سياقتى، قىتاي ماعان ءوزى بەرگەن جوق پا؟
- الەم ادەبيەتىندە سىيلىق الماي-اق ۇلى كلاسسيك اتانعان اقىن-جازۋشىلار قانشاما؟ كەرىسىنشە سىيلىق العان اقىن- جازۋشىلاردىڭ كوبى ەل ەسىندە قالماي جاتادى. سوندا اقىن-جازۋشى ءۇشىن سىيلىق الۋدىڭ قانشالىقتى ماڭىزى بار؟
- سىيلىق الىپ، مەدالدى ومىراۋعا تاعۋ دەگەن ول كوپتىڭ ىقىلاسى عوي.
ول جاقسى نارسە. ءبىراق كەيدە سوعان تاتىمايتىن شىعارما مەملەكەتتىك سىيلىق الىپ جاتقاندا وسى سىيلىقتان دا پالەندەي ءۇمىت كۇتۋدىڭ ءوزى دۇرىس ەمەس سىقىلدى كورىنەدى ماعان.
سۇحباتتى جۇرگىزگەن ءالىمجان ءاشىم ۇلى