ەرتىسكە شومىلىپ ءجۇرىپ سۋعا تۇنشىققان جاس ءوسپىرىمدى امان الىپ قالعان ايەل ماراپاتتالدى

سەمەي. قازاقپارات - سەمەي قالاسىندا ەرتىس وزەنىنىنىڭ جاعاسىندا دەم الا الماي جاتقان جاس ءوسپىرىمدى قۇتقارعان ايەل ماراپاتتالدى، دەپ حابارلايدى قازاقپارات ءتىلشىسى.

اباي وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، بۇل وقيعا 13-شىلدە كۇنى قالانىڭ زاتون شاعىناۋدانى جاعىنداعى ەرتىس وزەنىنىڭ جاعاسىندا بولعان.

«سول كۇنى اۋا تەمپەراتۋراسى 45 گرادۋستان اسىپ كەتكەن. اپتاپ ىستىقتا جاعاجايدا دەمالۋشىلاردىڭ قاراسى كوپ بولدى. بالالارىمەن جاعالاۋدا دەمالىپ جاتقان اينۇر سادىربالينا كومەككە شاقىرعان داۋىستى ەستيدى. ايەل ەش ويلانباستان كوپ ادام شوعىرلانعان جەرگە قاراي كومەككە ۇمتىلادى»، - دەلىنگەن اقپاراتتا.

وقيعا ورنىنا جەتكەن ول جەردە جاتقان جاس ءوسپىرىمدى جانە وعان العاشقى كومەك كورسەتپەك بولعان ەر ادامدى كورەدى.

الايدا كورسەتىلىپ جاتقان كومەككە قاراماستان جاس ءوسپىرىم ەس-ءتۇسسىز جاتتى. ونىڭ دەنەسى كوكشىلدەنىپ، تىنىسى توقتاپ قالعان.

«بەت-الپەتىنەن سۋعا باتقان ادامنىڭ بارلىق بەلگىلەرى بايقالعان. وسى ساتتە اينۇر بايسالدىلىق تانىتىپ، جاس ءوسپىرىمدى بىردەن رەانيماتسيالاۋعا كىرىسكەن. ءسويتىپ ونى امان الىپ قالدى. وسى ءبىر قيىن ساتتە ءسال كەشىگۋدىڭ ءوزى بالانىڭ ومىرىنە وراسان زور قاۋىپ ءتوندىرۋى مۇمكىن ەدى»، - دەلىنگەن حابارلامادا.

ادام جانىن اجالدان اراشالاعان اينۇر سادىربالينانى اباي وبلىسى توتەنشە جاعدايلار دەپارتامەنتىنىڭ باسشىلىعى «سۋعا كەتكەندەردى قۇتقارعانى ءۇشىن» مەدالىمەن ماراپاتتادى.