سولتۇستىك قازاقستاننىڭ نوۆويشيم اۋىلىندا توتەنشە جاعداي جاريالانادى

استانا. قازاقپارات - قاتتى جەلدەن الەۋمەتتىك نىساندارى زارداپ شەككەن سولتۇستىك قازاقستان وبلىسىنداعى نوۆويشيم اۋىلىندا تابيعي سيپاتتاعى توتەنشە جاعداي جاريالانباق، دەپ حابارلايدى قازاقپارات ءتىلشىسى.

«سولتۇستىك قازاقستان وبلىسى عابيت مۇسىرەپوۆ اۋدانى نوۆويشيم اۋىلىنىڭ اۋماعىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالانسىن. عابيت مۇسىرەپوۆ اتىنداعى اۋدان اكىمىنىڭ ورىنباسارى ە. ق. امانجولوۆ توتەنشە جاعدايدى جويۋ باسشىسى بولىپ تاعايىندالسىن. وسى شەشىم العاشقى رەسمي جاريالانعان كۇنىنەن باستاپ قولدانىسقا ەنگىزىلەدى جانە 2023 -جىلعى 23-تامىزدا تۋىنداعان قۇقىقتىق قاتىناستارعا قولدانىلادى»، - دەپ جازىلعان اشىق ن ق ا پورتالىندا جاريالاعان اۋدان اكىمى رۋسلان اڭبايەۆتىڭ شەشىم-جوباسىندا.

ايتا كەتەيىك، 23-تامىزدا سولتۇستىك قازاقستان وبلىسىنا قاراستى نوۆويشيم اۋىلىندا قاتتى جەل تۇرىپ، عيماراتتىڭ سىرتقى قاسبەتىن زاقىمداپ، كوپ قاباتتى تۇرعىن ءۇيدىڭ شاتىرىن ۇشىرىپ اكەتكەنىن جازىپ ەدىك.

وسىعان بايلانىستى ەلدى مەكەن اۋماعىندا توتەنشە جاعداي جاريالاۋ شەشىمى قابىلدانىپ وتىر.

ياعني، وسىدان كەيىن عانا نىساندارعا كەلگەن شىعىندى ەسەپتەۋ، زالالدى وتەۋ جانە جوندەۋ جۇمىستارى جۇرەدى.