جاڭا قۇرىلعان كولىك مينيسترلىگى نەمەن اينالىسادى - ۇكىمەت قاۋلىسى

استانا. قازاقپارات - جاڭادان قۇرىلعان كولىك مينيسترلىگىنىڭ قىزمەت باعىتى مەن ەرەجەلەرىن بەكىتۋدى كوزدەيتىن ۇكىمەت قاۋلىسى اشىق تالقىعا شىعارىلدى، دەپ حابارلايدى قازاقپارات ءتىلشىسى.

«كولىك مينيسترلىگى تەمىرجول، اۆتوموبيل، ىشكى سۋ كولىگى، اۋە كەڭىستىگىن پايدالانۋ مەن ازاماتتىق جانە ەكسپەريمەنتتىك اۆياتسيا قىزمەتى، اەروناۆيگاتسيا مەن اۋەجايلاردىڭ كورسەتىلەتىن قىزمەتتەرى سالاسىنداعى تابيعي مونوپوليالار، اۋەجايلاردىڭ كورسەتىلەتىن قىزمەتتەرى سالاسىنداعى قوعامدىق ماڭىزى بار نارىقتار، اۆتوموبيل جولدارى سالاسىندا باسشىلىقتى جۇزەگە اسىراتىن قازاقستان رەسپۋبليكاسىنىڭ مەملەكەتتىك ورگانى سانالادى»، - دەلىنگەن اشىق ن ق ا پورتالىندا جاريالاعان ۇكىمەت قاۋلىسىنىڭ جوباسىندا.

قۇجاتتا كورسەتىلگەندەي، مينيسترلىكتىڭ قۇرامىنا مىنا ۆەدومستۆولار ەنەدى:

1. اۆتوموبيل جولدارى كوميتەتى؛

2. ازاماتتىق اۆياتسيا كوميتەتى؛

3. كولىك كوميتەتى.

كولىك مينيسترلىگىنىڭ قىزمەت باعىتتارى مىناداي:

- تەمىرجول، اۆتوموبيل، ىشكى سۋ كولىگى، ساۋدا ماقساتىنداعى كەمەلەر، اۋە كەڭىستىگىن پايدالانۋ مەن ازاماتتىق جانە ەكسپەريمەنتتىك اۆياتسيا قىزمەتى سالاسىنداعى مەملەكەتتىك ساياساتتى قالىپتاستىرۋ جانە ىسكە اسىرۋ؛

- كولىكتىڭ جانە ونىڭ ومىرشەڭدىك سيكلى پروتسەستەرىنىڭ ادامنىڭ ءومىرى مەن دەنساۋلىعىنا جانە قورشاعان ورتاعا قاۋىپسىزدىگىن قامتاماسىز ەتۋ؛

- كولىك سالاسىندا ينۆەستيتسيالىق، عىلىمي-تەحنيكالىق جانە الەۋمەتتىك ساياساتتى قالىپتاستىرۋ جانە جۇرگىزۋ؛

- مەملەكەتتىڭ جانە حالىقتى تاسىمالداۋ مۇقتاجدىعىنىڭ بولجامدارىن ازىرلەۋ؛

- كولىك سالاسىندا قازاقستان رەسپۋبليكاسىنىڭ مۇددەسىن قورعاۋ؛

- ەكونوميكانىڭ جانە رەسپۋبليكا حالقىنىڭ تاسىمالداۋعا، ونىڭ ىشىندە الەۋمەتتىك ماڭىزى بار جولاۋشىلار تاسىمالىنا جانە ولارمەن بايلانىستى كورسەتىلەتىن قىزمەتتەرگە قاجەتتىلىكتەرىن قامتاماسىز ەتۋ ءۇشىن جاعداي جاساۋ؛

- جولاۋشىلار تاسىمالىن جۇزەگە اسىراتىن كولىك جۇمىسكەرلەرىن مۇگەدەكتىگى بار ادامدارمەن قارىم-قاتىناس جاساۋ جانە ولارعا قىزمەت كورسەتۋ داعدىلارىنا، ونىڭ ىشىندە ىمداۋ تىلىنە ۇيرەتۋ؛

- كولىك قىزمەتىن پايدالانۋشىلار قۇقىقتارىنىڭ ساقتالۋىن باقىلاۋ جانە قاداعالاۋ جانە تاعى دا باسقالار.

مينيسترلىكتىڭ جانە وعان باعىنىستى ۆەدومستۆولار قاراماعىنا مىنا ۇيىمدار كىرەدى:

- «نۇرسۇلتان نازاربايەۆ حالىقارالىق اۋەجايى» ا ق؛

- «قازاۆتوجول» ۇلتتىق كومپانياسى ا ق؛

- «قازاقستان جول عىلىمي-زەرتتەۋ ينستيتۋتى» ا ق.

- جول اكتيۆتەرى ساپاسىنىڭ ۇلتتىق ورتالىعى؛

- «قازاقستاننىڭ اۆياتسيالىق اكىمشىلىگى» ا ق؛

- «قازاەروناۆيگاتسيا» ر م ك؛

- «قازاقستان سۋ جولدارى» ر م ق ك.

ۇكىمەت قاۋلىسىنىڭ جوباسى 20-قىركۇيەككە دەيىن كوپشىلىك تالقىسىندا بولادى. كەيىن قول قويۋ ءۇشىن پرەمەر-مينيسترگە جولدانادى.

ەسكە سالايىق، بىرنەشە كۇن بۇرىن اتالعان كولىك مينيسترلىگىنە باسشى تاعايىندالدى. پرەزيدەنت جارلىعىمەن ەندى بۇل ۆەدومستۆونى مارات قارابايەۆ باسقاراتىن بولدى.

قوسا كەتسەك، 1-قىركۇيەكتە مەملەكەت باسشىسىنىڭ جارلىعىمەن ەلىمىزدە 5 جاڭا مينيسترلىك قۇرىلدى.