داۋلەت تۇرلىحانوۆ ۇلىنا قاتىستى كەلەڭسىزدىك جايلى: بۇل وتباسىما جاسالعان كەزەكتى اقپاراتتىق شابۋىل
«بۇگىنگى الەۋمەتتىك جەلىلەردە مەنىڭ ۇلىما قاتىستى تاراعان ۆيدەو بويىنشا تۇسىنىك بەرۋدى ءجون كوردىم. وزدەرىڭىز بىلەتىندەي، مەنىڭ اۋلەتىم اينالاسىنداعى مۇنداي وقيعالار ءبىرىنشى رەت ەمەس. وسىنداي وقيعالاردىڭ زاڭدىلىقپەن قايتالانۋى مەنىڭ كوڭىلىمە ەرىكسىز وي سالادى. مەن ءوز تاراپىمنان بالالارىما تولىقتاي اكەلىك، قازاقى تاربيە بەردىم. بۇگىنگى ۆيدەوعا قاتىستى مەنىڭ دە قوياتىن ءبىر سۇراعىم بار. تاڭعى ساعات 4 تە مۇنداي قىزدار ۇلىم تۇراتىن ۇيگە كەلىپ، نەگە ونداي وقيعاعا باستاۋ بولاتىنى تۇسىنىكسىز. جانە بۇل جاعداي اياق استىنان كامەرالارعا ءتۇسىپ قالىپ، بەلگىلى ءبىر ادامدارعا پايدالى قيىندىلارىنىڭ اقپارات قۇرالدارىنا تاراۋى، مەنىڭ عانا ەمەس، كەز كەلگەن ادامنىڭ كوڭىلىنە كۇمان كەلتىرەدى»، - دەپ جازدى داۋلەت تۇرلىحانوۆ Facebook پاراقشاسىندا.
سونىمەن قاتار ول بۇل جايتتار ءوزىنىڭ وتباسىنا جاسالعان اقپاراتتىق شابۋىل دەپ ەسەپتەيتىندىگىن اشىق ايتادى.
«بۇل مەنىڭ وتباسىما سوڭعى جىلدارى جاسالعان كەزەكتى اقپاراتتىق شابۋىل دەپ ويلايمىن. ۆيدەونى اڭعارعان ادامعا مەنىڭ بالامنىڭ بۇل جانجالدان بارىنشا قاشقاقتاۋعا ارەكەت جاساعانى انىق كورىنەدى. سىزدەرگە تۇسىنىكتى بولۋ ءۇشىن ۆيدەونىڭ تولىق نۇسقاسىن جولداپ وتىرمىن. وسى بولعان جاعدايدى دۇرىس تۇسىنۋلەرىڭىزدى سۇرايمىن»، - دەدى ءماجىلىس دەپۋتاتى.
بۇگىن ءماجىلىستىڭ جالپى وتىرسىنان كەيىن باق وكىلدەرىنىڭ ساۋالىنا وراي داۋلەت تۇرلىحانوۆ ورتانشى ۇلىنا قاتىستى كەلەڭسىز وقيعانى بىلمەيتىندىگىن ايتقان ەدى.