اگروبانك قۇرۋدا ۇكىمەتتىڭ ناقتى ۇستانىمى قاجەت - جيگۋلي دايرابايەۆ
«ءبىزدىڭ نەگىزگى ميستسيامىزدىڭ ءبىرى - فەرمەر شارۋالاردىڭ قارجى ماسەلەسىن جۇيەلى تۇردە شەشۋ. بۇل اۋىل پارتياسىنىڭ سايلاۋالدى باعدارلاماسىندا قازىقتاي قاعىلعان مەجە. مەنىڭ العاشقى دەپۋتاتتىق ساۋالىم دا وسى تاقىرىپقا ارنالعان ەدى. ءبىراق ۇكىمەتتىڭ بەرگەن جاۋابىنا كوڭىلىمىز تولمادى. ولار «اگروبانك قۇرىلاتىن بولسا، ول ءتيىمسىز جۇمىس ىستەيدى جانە بيۋدجەتتەن تۇراقتى تۇردە اقشا ءبولىنۋىن تالاپ ەتەدى» دەپ وتىر. سوندا، «وتباسى بانكى»، «قازاقستان دامۋ بانكى» دە مەملەكەتتىڭ قولداۋىنسىز جۇمىس ىستەپ وتىرعانى ما؟! باسپانا الامىن دەگەن ازاماتتارعا بيۋدجەت تاراپىنان سىياقى بەرىلەدى، «قازاقستان دامۋ بانكىنىڭ» جوبالارىنا دا مەملەكەتتەن تىكەلەي قارجى بولىنەدى. سوندا ازىق-تۇلىك قاۋىپسىزدىگىن قامتاماسىز ەتەتىن اگرارلى سالا ءۇشىن قۇرىلاتىن اگروبانكتىڭ ماڭىزى اتالعان ەكەۋىنەن كەم بولعانى ما؟»، - دەدى ج. دايرابايەۆ ءماجىلىستىڭ جالپى وتىرىسىندا ۇكىمەت پەن ۇلتتىق بانككە جولداعان ساۋالىندا.
وسى ورايدا ول اگروبانكتىڭ اۋىل شارۋاشىلىعىنا كەرەك ەكەنىن، ونىڭ ءتيىمدى ەكەنىن ءالى دە دالەلدەيتىنىن ايتتى.
«ماسەلەن، حالىقارالىق تاجىربيەگە سۇيەنسەك فرانتسيادا «كرەديت اگريكوي»، بەلارۋستا «بەلاگروپرومبانك»، رەسەيدە «روسسەلحوزبانك»، قىتايدا Agricultural Bank of China، وزبەكستاندا «اگروبانك» جانە باسقا دا ەلدەردە سالالىق اگرارلىق بانك جۇمىس ىستەيدى. وسىعان قاتىستى ۇكىمەت پەن ۇلتتىق بانكتىڭ ناقتى ۇستانىمى قاجەت. ويتكەنى ەڭبەك ادامدارىنىڭ تالابىن ءسوزبۇيداعا سالۋعا بولمايدى، ۇكىمەت جاعىنان وسى ماسەلەنى شەشۋدە تاباندىلىق كورسەتەتىن كەز كەلدى. جوعارىداعى ۇسىنىستاردى ەسكەرە وتىرىپ، كوتەرىلگەن ماسەلە بويىنشا زاڭنامادا بەلگىلەنگەن مەرزىمدە جاۋاپ بەرۋىڭىزدى سۇرايمىز»، - دەدى دەپۋتات.