جاتاقحانا سالعاندارعا مەملەكەتتىك قولداۋ كورسەتىلەدى - مينيسترلىك

استانا. قازاقپارات - جاتاقحانادان ورىن جەتپەگەن ستۋدەنتتەرگە پاتەر جالداۋعا سۋبسيديا بەرىلمەيدى.

بۇل تۋرالى ق ر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحان ايتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە تىلشىلەر جاتاقحاناعا ورنالاسۋدىڭ ورنىنا پاتەر جالداۋعا سۋبسيديا بەرىلە مە دەگەن سۇراق قويدى. مينيسترلىكتىڭ وكىلى اقەركە ابىلايحان مۇنداي جوسپار جوق. دەپ جاۋاپ بەردى.

«شىنىندا دا، ستۋدەنتتەر قازىر جاتاقحانالارعا ورنالاسىپ جاتىر. ۋنيۆەرسيتەتتەر قوناقۇيلەر مەن جاتاقحانا يەلەرىمەن كەلىسىمشارت جاساسۋدا. مۇنداعى ءبىرىنشى تالاپ - جاتاقحانالاردا تەك ستۋدەنت جاستار تۇرۋى كەرەك. بۇل جاتاقحانالاردا تۇرۋ قۇنى 30-60 مىڭ تەڭگە ارالىعىندا. ارينە، ارزان ەمەس. ءبىراق پاتەر جالداۋعا قاراعاندا قولايلى»، - دەدى اقەركە ابىلايحان.

سونداي- اق، مينيسترلىك وكىلى مەملەكەت عيماراتتى سالۋ جانە قايتا قۇرۋ بويىنشا بيزنەس وكىلدەرىن قولداۋ شارالارى قولعا الىنعانىن جەتكىزدى.

«ولارعا شىنىمەن دە مەملەكەتتىك قولداۋ قاراستىرىلعان. وڭىرلەردە جاتاقحانا سالۋ كەزىندە 6 جىل بويى ءاربىر بالا ءۇشىن 150 ا ە ك (517 مىڭ تەڭگە) مولشەرىندە مەملەكەتتىك تاپسىرىس وتەلەتىن بولادى. الماتىدا بۇل سوما 230 ا ە ك- ءتى (793 مىڭ تەڭگە) قۇرايدى. جاتاقحانا عيماراتىن قايتا جاڭارتۋعا دا قولداۋ قاراستىرىلعان: وڭىرلەردە - 47 ا ە ك (162150 تەڭگە)، الماتى، استانا قالالارى ءۇشىن - 92 ا ە ك (317400 تەڭگە)» ، - دەپ تولىقتىردى ول.

بۇعان دەيىن اقەركە ابىلايحان اقىلى تۇردە وقيتىن ستۋدەنتتەردىڭ جاتاقحانادان ورىن الۋعا تولىق قۇقىلى ەكەنىن ايتقان ەدى.