ۇلى دالا جورىعى: شاباندوزدار استانادان تۇركىستانعا جول تارتتى

استانا. قازاقپارات - «ۇلى دالا جورىعى» رەسپۋبليكالىق مارافون بايگەسى بۇگىن ەلوردادان باستالدى، دەپ حابارلايدى قازاقپارات ءتىلشىسى.

بيىل ەكىنشى رەت ۇيىمداستىرىلعان بايگەگە ەل وڭىرلەرىنەن 19 كوماندا قاتىسىپ جاتىر. ات جارىسى ەلوردا ىرگەسىندەگى قاراجار اۋىلىنان باستالدى. شاباندوزدار 1300 شاقىرىم قاشىقتىقتا جارىسادى، 19- قىركۇيەكتە تۇركىستاندا مارەگە جەتەدى.

«جورىق 14 كەزەڭنەن تۇرادى. ءبىرىنشى كەزەڭ - 50 شاقىرىم. ودان كەيىن 12 كەزەڭدە 100 شاقىرىمدى ءجۇرىپ وتەدى. سوڭعى 14 كەزەڭدە 50 شاقىرىم جولدى باعىندىرىپ، تۇركىستاندا مارەگە جەتەدى. اتىراۋ وبلىسىنان باسقا بارلىق وڭىردەن كوماندالار قاتىسىپ جاتىر، بارلىعى مارافونعا ساقاداي ساي. كەشە اتتار ۆەتەريناريالىق تەكسەرۋدەن ءوتتى»، - دەدى اتالعان شارانى ۇيىمداستىرۋشى عاني دۇيشەنوۆ.

«ۇلى دالا جورىعى» مارافونىنىڭ جالپى جۇلدە قورى - 65 ميلليون تەڭگە. جەڭىمپاز كومانداعا 30 ميلليون تەڭگە، 2-ورىنعا 20 ميلليون تەڭگە، ال 3-ورىنعا 15 ميلليون تەڭگە تابىستالادى.

جورىق بارىسىن 2 حالىقارالىق جانە 2 قازاقستاندىق سۋديا باعالايدى، ال جول بويى اتتاردىڭ جاعدايىن 2 حالىقارالىق جانە 3 قازاقستاندىق مال دارىگەرى قاداعالايدى.

ايتا كەتەيىك، «ۇلى دالا جورىعى» بايگەسى رەسپۋبليكالىق «JORYQ» ات سپورتى فەدەراتسياسىنىڭ، مادەنيەت جانە سپورت مينيسترلىگىنىڭ «امانات» پارتياسىنىڭ جانە ۇلتتىق سپورت تۇرلەرى قاۋىمداستىعىنىڭ قولداۋىمەن ءوتىپ جاتىر.