جاڭادان قۇرىلعان مينيسترلىكتەردى ءبولۋ پروتسەسى قاشان اياقتالادى

استانا. قازاقپارات - پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ جاڭادان قۇرىلعان مينيسترلىكتەردى ءبولىپ شىعارۋ مەن قارجىلاندىرۋعا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«ازىرگە قارجىلاندىرۋعا قاتىستى ەسەپتەۋلەر اتقارىلمادى. جاڭارتىلعان ۇكىمەت مۇشەلەرىمەن العاشقى وتىرىس ءوتتى. ونىڭ بارىسىندا جولداۋدى ورىنداۋ بويىنشا تاپسىرمالار تالقىلاندى. جاڭا مينيسترلىكتەردى ءبىر ايدىڭ ىشىندە بولەمىز. وسى باعىتتا ءبىراز پروتسەدۋرانى ىسكە اسىرۋ كەرەك. سودان كەيىن قوسىمشا شىعىنداردى ەسەپتەيمىز»، - دەدى ە. جاماۋبايەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

بۇل تۇرعىدا سپيكەر 2024-2026 -جىلدارعا ارنالعان رەسپۋبليكالىق بيۋدجەت جوباسى ءماجىلىستىڭ قاراۋىنا ەنگىزىلگەنىن، 11 -قىركۇيەكتە وسى قۇجات تانىستىرىلاتىنىن ايتتى. ماجىلىستەگى تانىستىرىلىم بارىسىندا بولىنگەن قاراجات ەگجەي- تەگجەيلى قارالادى. سونىڭ اياسىندا قوسىمشا شىعىندار تالقىلانادى.

«جاڭادان قۇرىلعان مينيسترلىكتەر باسقا ءبىر ۆەدومستۆودان ءبولىنىپ شىعىپ جاتىر. سوندىقتان بيىلعا قاراستىرىلعان قاراجات كولەمىندە جاڭا مينيسترلىكتەردى ءبولىپ شىعارامىز. ءار مينيسترلىكتىڭ وزىنە قاراستى سالالىق باعىتتارى بار. وسى ورايدا ولار وزىنە تيەسىلە قاراجاتتى ءبولىپ الادى. ال اكىمشىلىك شىعىندارعا توقتالساق، قىزمەتكەرلەر سانىنا قاراي بولەمىز»، - دەدى مينيستر.

ايتا كەتەيىك، جاقىندا پرەزيدەنت جارلىعىمەن، 5 جاڭا مينيسترلىك قۇرىلدى، ولار - سۋ رەسۋرستارى جانە يرريگاتسيا مينيسترلىگى؛ كولىك مينيسترلىگى؛ تۋريزم جانە سپورت مينيسترلىگى؛ مادەنيەت جانە اقپارات مينيسترلىگى؛ ونەركاسىپ جانە قۇرىلىس مينيسترلىگى.