شوتلانديادا مەملەكەتتىك قىزمەتشىلەرگە ءتورت كۇندىك جۇمىس اپتاسى ەنگىزىلەدى

بريۋسسەل. قازاقپارات - شوتلانديانىڭ ءبىرىنشى ءمينيسترى حۋمزا يۋساف ءوڭىردىڭ مەملەكەتتىك سەكتورىندا ءتورت كۇندىك جۇمىس اپتاسىن ەنگىزۋدى كوزدەپ وتىر، دەپ حابارلايدى قازاقپارات ءتىلشىسى.

جەرگىلىكتى ب ا ق- تىڭ حابارلاۋىنشا، ءبىرىنشى مينيستر شوتلانديا ۇكىمەتىنىڭ كەلەسى جىلعا ارنالعان باعدارلاماسى اياسىندا ءتورت كۇندىك جۇمىس اپتاسىنىڭ پيلوتتىق جوباسىن جاريالايدى.

پيلوتتىق جوبا شامامەن 12 ايعا سوزىلادى جانە وسى جىلدىڭ سوڭىندا باستالادى دەپ كۇتىلۋدە. ايماق ۇكىمەتى باسشىسىنىڭ بۇل جوسپارىن شوتلاندياداعى كونسەرۆاتورلار قاتاڭ سىنعا الدى.

«ءبىزدىڭ ەكونوميكا ۇلى بريتانيانىڭ قالعان بولىگىنەن ارتتا قالىپ، ۇلتتىق دەنساۋلىق ساقتاۋ قىزمەتىمىز «اياققا تۇرا الماي» جاتقان ساتتە، ال كەڭەستەردىڭ بيۋدجەتى ۇنەمى قىسقارتىلىپ جاتقان كەزدە بۇل قيسىنسىز جوسپار جۇزەگە اسادى دەپ ويلاسا، حۋمزا يۋساف قيال الەمىندە قالىقتاپ ءجۇر»، - دەدى شوتلانديانىڭ كونسەرۆاتيۆتىك پارتياسى اتىنان سايلانعان دەپۋتات ليز سميت.

«بۇل ورىندالمايتىن جوسپاردى جالعاستىرۋ جىل سايىن شوتلانديا بيۋدجەتىنە 2,5 ميلليارد فۋنت ستەرلينگ شىعىن اكەلەدى. سونداي- اق مەملەكەتتىك قىزمەتتەردى جابۋىمىز قاجەت نەمەسە مەكتەپ، اۋرۋحانا جانە توتەنشە جاعدايلار قىزمەتتەرىن ءتيىستى دەڭگەيدە جۇرگىزۋ ءۇشىن قوسىمشا ميللياردتاعان فۋنت ىزدەۋ كەرەك بولادى - وسى ەكى جولدىڭ ءبىرىن تاڭداۋعا تۋرا كەلەدى»، - دەپ اتاپ ءوتتى ول.

مەملەكەتتىك قىزمەتشىلەردىڭ ءتورت كۇندىك جۇمىس اپتاسىنا كوشۋى جەكە سەكتور قىزمەتكەرلەرىنىڭ دە نارازىلىعىن تۋدىرۋى مۇمكىن. حۋمزا يۋسۋف تۇرعىنداردىڭ اۋقاتتى ساناتتارى ءۇشىن تابىس پەن مۋنيتسيپالدىق سالىقتاردى كوبەيتۋدى كوزدەپ وتىر.

ايماقتا ءتورت كۇندىك جۇمىس اپتاسىن ەنگىزۋ شوتلانديانىڭ بۇرىنعى ءبىرىنشى ءمينيسترى نيكولا ستەردجەننىڭ سايلاۋ الدىندا بەرگەن ۋادەلەرىنىڭ ءبىرى بولاتىن. ناۋرىز ايىنىڭ سوڭىندا ونىڭ ورنىنا حۋمزا يۋساف كەلدى.

2021 -جىلى ستەردجەن ءوز قىزمەتكەرلەرى ءۇشىن «جۇمىس پەن جەكە ءومىر اراسىندا بالانس» ورناتقىسى كەلەتىن كومپانيالارعا 10 ميلليون فۋنت ستەرلينگ بولەتىنىن ايتقان. التى ايلىق پيلوتتىق جوباعا 60-تان استام فيرما قاتىسىپ، جۇمىسشىلارعا سول جالاقىعا بەس كۇننىڭ ورنىنا ءتورت كۇن جۇمىس ىستەۋگە مۇمكىندىك بەردى.

كومپانيالاردىڭ كوپشىلىگى وسى تاجىريبە اياقتالعاننان كەيىن دە 4 كۇندىك جۇمىستى جالعاستىرعىسى كەلەتىنىن بىلدىرگەن. ال ولاردىڭ قىزمەتكەرلەرى كۇيزەلىس پەن الاڭداۋشىلىق ازايعانىن اتاپ ءوتتى.

بۇعان دەيىن حابارلاعانىمىزداي، گەرمانيا دا ءتورت كۇندىك جۇمىس اپتاسىن سىناقتان وتكىزۋدە.