ەرلان ءابىل: مەملەكەتتىك قىزمەتشىلەر قازاق ءتىلىن ءوز دەڭگەيىندە ءبىلۋى كەرەك
بۇل تۋرالى ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل «ءتىلىم باردا ايتىلار سىر ويداعى» مەرەكەلىك شاراسىندا ايتتى، دەپ حابارلايدى قازاقپارات ءتىلشىسى.
قازاقستان حالقى تىلدەرى كۇنىنە وراي وتكەن شارانىڭ العى ءسوزىن اكادەميا رەكتورى ەرلان ءابىل باستاپ، مەملەكەتتىك ءتىلدىڭ مارتەبەسىنە جانە كەلەشەكتەگى ءتىلىمىزدىڭ قولدانىس اياسىن دامىتۋ مەملەكەتتىك قىزمەتشىلەردىڭ نەگىزگى مىندەتتەرىنىڭ ءبىرى ەكەنىنە توقتالىپ ءوتتى.
«تىلگە دەگەن قۇرمەت ءارقايسىمىزدىڭ جۇرەگىمىزدىڭ تورىنەن ورىن الۋى قاجەت. مەملەكەتتىك قىزمەتشىلەر قازاق ءتىلىن ءوز دەڭگەيىندە ءبىلۋى كەرەك. وسى ورايدا اكادەميادا مەملەكەتتىك تىلگە باسا نازار اۋدارىلادى. كوپ جىلدىق تاجىريبەگە سۇيەنىپ، «مەملەكەتتىك قىزمەتشىلەردىڭ مەملەكەتتىك ءتىلدى وقىتۋ تۇجىرىمداماسىن» ازىرلەپ، ونىڭ نەگىزىندە ارنايى Qazaq Resmi Test جاسادىق. قازىرگى تاڭدا QRT ەلىمىزدەگى اۋقىمدى جوبالاردا قولدانىلىپ، تيىمدىلىگىن كورسەتىپ كەلەدى. ازاماتتار قالاعان ۋاقىتىندا ەشقايدا بارماي-اق، www.qrt.kz سايت ارقىلى ءتىلدى ءبىلۋ دەڭگەيىن انىقتاي الادى. اكادەمياعا وقۋعا تۇسۋشىلەر قۇجات تاپسىرعاندا مىندەتتى تۇردە مەملەكەتتىك ءتىلدى ءبىلۋ دەڭگەيىن راستايتىن سەرتيفيكات تاپسىرۋى قاجەت. مەملەكەتتىك قىزمەت سالاسىندا مەملەكەتتىك ءتىلدىڭ قولدانىس اياسىن بارىنشا كەڭەيتۋ جانە ناسيحاتتاۋ ءارقاشان وزەكتى بولماق»، - دەدى رەكتور.
سونداي-اق مەرەكەلىك ءىس-شارادا مەملەكەتتىك قىزمەت ىستەرى اگەنتتىگىنىڭ اپپارات باسشىسى الىبەك احمەدياروۆ قۇتتىقتاۋ ءسوز سويلەپ، اگەنتتىكتىڭ ۇيىمداستىرۋىمەن وتكەن «ەڭ ۇزدىك شىعارما» بايقاۋىنىڭ جەڭىمپازدارىن ماراپاتتادى. «ەڭ ۇزدىك شىعارما» بايقاۋىنا بەلسەندى قاتىسقانى ءۇشىن گۇلجاحان ۇسەنوۆا «العىس حاتپەن» ماراپاتتالادى. اكادەميانىڭ باسقارۋ ينستيتۋتىنىڭ ماگيسترانتى دينارا ءجۇنىسوۆا Ⅲ ورىندى، اكادەميانىڭ مەملەكەتتىك باسقارۋدا جوبالىق مەنەدجمەنتتى دامىتۋ ورتالىعىنىڭ باسشىسى جانار تايجانوۆا جۇلدەلى Ⅱ ورىندى، اگەنتتىكتىڭ جۇرتشىلىقپەن بايلانىس دەپارتامەنتىنىڭ باس ساراپشىسى گاۋحار ەرقانات قىزى I ورىندى يەلەندى.
تىلدىك قۇزىرەتتىلىكتى دامىتۋ كابينەتىنىڭ ۇيىمداستىرۋىمەن وتكەن مەرەكەلىك كەشكە استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ ونەرلى اكتەرلەرى مەن انشىلەرى كەلىپ، كورەرمەندەرگە رۋحاني-تانىمى مول شىعارمالارىن ورىنداپ، جاقسى كوڭىل-كۇي سىيلادى. سونىمەن قاتار اكادەميانىڭ مودۋلدىك وقىتۋ بويىنشا «مەملەكەتتىك باسقارۋ» جانە «وڭىرلىك دامۋ» ماماندىقتارىنىڭ ماگيسترانتتارى بەلسەندىلىك تانىتىپ، ونەرلەرىن كورسەتتى.