ب ق و-دا اۋىلدا اتىس بولىپ، ءۇش ادام اۋرۋحاناعا جەتكىزىلدى

ورال. قازاقپارات - سىرىم اۋدانى ارالتوبە اۋىلىندا اتىس بولىپ، ءۇش ادام اۋرۋحاناعا جەتكىزىلدى.

ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، وقيعا 5-قىركۇيەك كۇنى شامامەن ساعات 18.45 تە بولدى.

«سپيرتتىك ىشىمدىك ءىشۋ بارىسىندا تۋىنداعان تالاس سالدارىنان 1975 -جىلعى ەر ادام بۇزاقىلىق نيەتپەن اڭشى مىلتىعىنان 34 جاستاعى تۇرعىنعا وق اتقان. ۇشقان بىتىرا ءوتىپ بارا جاتقان 1964 -جىلعى ايەل مەن ەكى جاسار ءسابيدىڭ اياعىنا تيگەن. وسى دەرەك بويىنشا سوتقا دەيىنگى تەرگەۋ امالدارى باستالدى. قازىرگى ۋاقىتتا كۇدىكتىنى ۇستاۋ ءۇشىن بارلىق شارا قولدانىلۋدا»، دەپ حابارلادى ۆەدومستۆودان.

سىرىم اۋداندىق اۋرۋحانا ديرەكتورىنىڭ مىندەتىن اتقارۋشى سابىر مەڭدەشەۆتىڭ ايتۋىنشا، اۋرۋحاناعا تۇسكەن ءۇش ادامنىڭ جاعدايى تۇراقتى. ۇشەۋىنە دە مەديتسينالىق كومەك كورسەتىلۋدە.

ونىڭ سوزىنە قاراعاندا، كورشى اۋلادا توبەلەس بولىپ جاتقان كەزدە اجەسى مەن ەكى جاسار نەمەرەسى سوندا بارىپ قالعان.

«34 جاستاعى ەر ادام اۋرۋحاناعا جاتۋدان باس تارتتى. ايەلدىڭ جاعدايى قالىپتى. ال كىشكەنتاي قىز اناسىمەن بىرگە وبلىستىق كوپبەيىندى بالالار اۋرۋحاناسىنا جىبەرىلدى»، دەدى قازاقپارات تىلشىسىنە س. مەڭدەشەۆ.

ەسكە سالا كەتەيىك، بۇدان بۇرىن ب ق و-دا مال سويۋ ورىندارىنىڭ 70 پايىزىندا بەينەباقىلاۋ كامەرالارى ورناتىلعانىن جازعان ەدىك.