سىر وڭىرىنەن اباي قۇنانبايەۆتىڭ توتە جازۋ ۇلگىسىندەگى ولەڭدەر جيناعى تابىلدى

استانا. قازاقپارات - سىر وڭىرىنەن اقىن اباي قۇنانبايەۆتىڭ توتە جازۋ ۇلگىسىندەگى ولەڭدەر جيناعى تابىلدى.

تىڭ ەڭبەك تۋرالى جۋرناليست، فيلولوگيا عىلىمدارىنىڭ كانديداتى نۇرلان كوبەگەن ۇلى Facebook-پاراقشاسىندا ءبولىستى. ونىڭ ايتۋىنشا، مۇرا قىزىلوردا وبلىستىق تاريحي-ولكەتانۋ مۋزەيىندە ساقتاۋلى تۇر.

«كىتاپ 1982 -جىلى مۋزەي قورىنا وتكىزىلگەن. ءبىراق ەشكىم ءمان بەرمەگەن. ونىڭ يەسى - ارداگەر ۇستاز مىناتا قالدىبايەۆ. 2005 -جىلى قايتا جاڭعىرتۋدان وتسە دە، «مۇرتى» بۇزىلماعان»، - دەلىنگەن جازبادا.

ولەڭدەر جيناعى مۋزەي قورىنداعى سيرەك كەزدەسەتىن كىتاپتار مەن قولجازبالاردىڭ كوللەكسياسى قاتارىندا.

مۋزەيدىڭ عىلىمي حاتشىسى اسحات سايلاۋدىڭ ايتۋىنشا، وندا اقىن جىرلارى تۇگەل دەرلىك قامتىلعان. ولەڭدەردى اراب ارپىمەن توتە جازۋ ۇلگىسىندە وقۋعا بولادى.

«نەگىزى قازاق تىلىندە. كەيبىرى تاتارشاعا كەلەتىن سياقتى. «ماسعۇت» پوەماسى دا، پۋشكين، لەرمونتوۆ، كرىلوۆتان اۋدارعان دۇنيەلەرى دە بار. قايتا جاڭعىرتۋ كەزىندە بىرەن-ساران بەتى ءتۇسىپ قالعان»، - دەدى ول.

كىتاپتىڭ قايدان شىققانى انىق بەلگىسىز. ءال-فارابي اتىنداعى قازاق ۇلتتىق ۋنيۆەرسيتەتىنىڭ وقىتۋشىسى، تۇركىتانۋشى عالىم سەرىكباي قىلىشباي اقىن بەرنياز كۇلەيەۆتىڭ جيناقتاۋىمەن 1922 -جىلى «قازان» باسپاسىنان جارىققا شىققان بولۋى مۇمكىن ەكەنىن العا تارتىپ وتىر.