پرەزيدەنت اۋىل شارۋاشىلىعى تاۋارلارى مەن قۇرىلىس ماتەريالدارىن وندىرۋشىلەردىڭ كورمەسىنە باردى
كورمەگە اگرارلىق سالا بويىنشا ەت، قۇس، ءسۇت جانە بالىق ونىمدەرىن وڭدەۋ كاسىپورىندارىنىڭ، سونداي-اق شىرىن، سۋسىن وندىرۋشىلەردىڭ، كوكونىس جانە جەمىس وڭدەۋشىلەردىڭ تاۋارلارى قويىلدى.
مەملەكەت باسشىسى شارۋالارمەن اڭگىمەلەسۋ بارىسىندا ءوڭىردىڭ كليماتتىق جاعدايى مەن مەگاپوليسكە جاقىن ورنالاسۋى بۇل سالاعا ينۆەستورلار تارتۋعا زور مۇمكىندىك بەرەتىنىن اتاپ ءوتتى.
پرەزيدەنتتىڭ ايتۋىنشا، وڭىردە ەرەكشە باعىت - تۇيە شارۋاشىلىعى قارقىندى دامىپ كەلەدى جانە اتالعان سالا ەكسپورت ءۇشىن زور الەۋەتكە يە.
- اۋىل شارۋاشىلىعى وندىرىسىنە جاڭا تەحنولوگيالاردى ەنگىزۋ، ەكولوگيالىق تازا ءونىم شىعارۋ ماڭىزدى، - دەدى قاسىم-جومارت توقايەۆ.
پرەزيدەنتكە وتاندىق قۇرىلىس ماتەريالدارىنىڭ كوپتەگەن ءتۇرى كورسەتىلدى.
قازاقستاندا ونەركاسىپتىك جانە ازاماتتىق نىساندار قۇرىلىسىنىڭ تولىق تسيكلىن قامتاماسىز ەتەتىن تاۋارلار وندىرىلەدى.
اتاپ ايتقاندا:
- كولدەنەڭ جەلىمدەلگەن اعاش، قۇراما تەمىربەتون جانە بەتون قۇرىلعىلارى، اۆتوكلاۆتى گازوبلوكتار، تالشىقتى تسەمەنت پليتالارى مەن شىنى ماقتا، قۇرعاق قۇرىلىس قوسپالارى مەن ارلەۋ ماتەريالدارى، بوياۋلار مەن جابىندىلار، اليۋمينيي پروفيلدەرى، پانەلدەر، ديودتى شامدار، ەسىك تۇتقالارى جانە باسقا دا ونىمدەر شىعارىلادى.
مەملەكەت باسشىسى قۇرىلىس سالاسىنىڭ جاي-كۇيى تۋرالى ايتا كەلە، اتالعان سالانى ەكونوميكانى دامىتۋدىڭ قوزعاۋشى كۇشى رەتىندە اتاپ ءوتتى.
- قازىر قۇرىلىس سالاسى بويىنشا ءوڭىردىڭ الدىندا اۋقىمدى مىندەتتەر تۇر. اتاپ ايتقاندا، وبلىس ورتالىعىنىڭ قۇرىلىسى جانە G4 City جوباسى. بۇل جۇمىستا جەرگىلىكتى ءونىم وندىرۋشىلەردىڭ قۇرىلىس ماتەريالدارىنىڭ الەۋەتىن بارىنشا پايدالانۋ ماڭىزدى. مەملەكەت وتاندىق ءونىم وندىرۋشىلەردى قولدايدى. بۇل تۋرالى مەن ءوز جولداۋىمدا ناقتى ايتتىم، - دەدى قاسىم-جومارت توقايەۆ.
كورمەگە 20 دان استام قازاقستاندىق تاۋار وندىرۋشىلەردىڭ، سونىڭ ىشىندە «شين-لاين» ج ش س، Dinara Group اگروحولدينگى، «داۋلەت-بەكەت» ج ش س، «پ ك التىن تاعا» ج ش س، «فيرما-بەنت» ج ش س، «كناۋف گيپس قاپشاعاي» ج ش س جانە باسقا دا ءىرى كومپانيالاردىڭ ونىمدەرى قويىلدى.