استانادا ۇلتتىق سپورت فەستيۆالى ءوتىپ جاتىر
فەستيۆالدىڭ اشىلۋ سالتاناتىنا پارلامەنت ءماجىلىسىنىڭ ءتوراعاسى ەرلان قوگانوۆ قاتىسىپ، سپورتشىلارعا ساتتىلىك تىلەدى.
ءتورت جىلدا ءبىر وتەتىن ۇلتتىق سپورت دوداسىندا وڭىرلەر اسىق اتۋ، اۋدارىسپاق، بايگە، ءداستۇرلى ساداق اتۋ، جامبى اتۋ، جەكپە- جەك، كوكپار، قازاق كۇرەسى، قۇسبەگىلىك، تەڭگە ءىلۋ، توعىزقۇمالاق سپورت تۇرلەرى بويىنشا جارىسادى.
فەستيۆال قورىتىندىسى بويىنشا ۇلتتىق سپورتتى جوعارى دەڭگەيدە دامىتىپ وتىرعان وڭىرلەردىڭ ۇزدىك ۇشتىگى انىقتالادى. جارىس جەڭىمپازدارى بالل بويىنشا ەسەپتەلىپ، ەڭ كوپ ۇپاي جيناعان وڭىرلەر جەڭىس تۇعىرىنا كوتەرىلەدى.
فەستيۆالگە ەلىمىزدىڭ بارلىق وڭىرىنەن 11 سپورت ءتۇرى بويىنشا 1362 سپورتشى قاتىسۋعا ءوتىنىم بەرگەن.
ۇيىمداستىرۋشىلاردىڭ ايتۋىنشا، فەستيۆالدىڭ باعدارلاماسىنا بيىل «ءداستۇرلى ساداق اتۋ» (جەردە تۇرىپ ساداق اتۋ) سپورتى تۇڭعىش رەت قوسىلىپ وتىر. سونىمەن قاتار، كوكپارداعى جەكپە- جەك اتتاردىڭ جەكە جارىسى كورسەتىلىم (پوكازاتەلنىي) رەتىندە ەنبەك.
جارىس تۋريزم جانە سپورت مينيسترلىگى، استانا قالاسىنىڭ اكىمدىگى، قر ۇلتتىق سپورت تۇرلەرى قاۋىمداستىعى، ۇلتتىق سپورت تۇرلەرى فەدەراتسيالارى، «سامرۇق- قازىنا» ۇلتتىق ءال- اۋقات قورى» ا ق، «تۋريزم جانە سپورتتى قولداۋ قورىنىڭ» مۇرىندىق بولۋىمەن ءوتىپ جاتىر.
ۇلتتىق سپورتتىڭ جانكۇيەرلەرى فەستيۆالدى 4-10-كۇندەرى مىنا مەكەنجايلاردا تاماشالاي الادى: قازاق كۇرەسى - ج. ۇشكەمپىروۆ اتىنداعى جەكپە- جەك سارايى، اسىق اتۋ مەن توعىزقۇمالاق - «Qazaqstan» ج ا س ك، جەكپە- جەك - «اسپان» سپورت كەشەنى. ال، كوكپار، بايگە، تەڭگە ءىلۋ، جامبى اتۋ، اۋدارىسپاق، ءداستۇرلى ساداق اتۋ، قۇسبەگىلىك سپورتتارى «قازانات» يپپودرومىندا وتەدى.
جارىس باعدارلاماسىنداعى كوكپار، قازاق كۇرەسى تىكەلەي، قالعان سپورت تۇرلەرى بويىنشا ارنايى رەپورتاجدار Qazsport تەلەارناسىنان كورسەتىلەدى.