الماتىدا جاڭا دەمالىس ايماعى اشىلدى

الماتى. قازاقپارات - الماتىدا ۇزىندىعى جارتى شاقىرىمعا جۋىق جاڭا دەمالىس ايماعى اشىلدى، دەپ حابارلايدى قازاقپارات ءتىلشىسى.

الماتى اكىمدىگىنىڭ مالىمەتىنشە، قالا اكىمىنىڭ تاپسىرماسى مەن تۇرعىنداردىڭ ءوتىنىشى بويىنشا 2022-2023-جىلعى جوندەۋ جۇمىستارى اياسىندا الاتاۋ اۋدانى اقبۇلاق شاعىناۋدانى، احانوۆ كوشەسىندە ۇزىندىعى 450 مەتر، ءبىر مەزگىلدە 700 ادامدى قابىلدايتىن دەمالىس ايماعىن اباتتاندىرۋ جۇمىسى جۇرگىزىلدى.

«6000 شارشى مەتردەن استام اۋماقتا سەرۋەندەۋ جولدارى توسەلىپ، ورىندىقتار مەن ۋرنالار، كوشە جارىعى، پەرگالا ورناتىلدى. بۇقارالىق سپورتتى دامىتۋ ءۇشىن فۋتبول، باسكەتبول الاڭدارى، ۇستەل تەننيسىنە ارنالعان ەكى ۇستەل، سونداي-اق كەمە ءتارىزدى بالالار ويىن الاڭى سالىندى. قۇرىلىسشىلار مەملەكەتتىك تۋعا ارنالعان تۋ باعاناسىن دا ورناتتى. جاڭا دەمالىس ايماعى كوگالداندىرىلدى. جۇمىسشىلار قىلقان جاپىراقتى اعاشتاردى وتىرعىزدى، ناتيجەسىندە 500 شارشى مەتردەن استام جەر كوگالداندىرىلدى»، - دەپ حابارلادى الماتى اكىمدىگىنىڭ باسپا ءسوز قىزمەتى.