اقمولا كولونياسىندا سوتتالعاندارعا كۇش قولدانۋ: پروكۋراتۋرا ءىس قوزعادى

كوكشەتاۋ. قازاقپارات - اقمولا وبلىسىندا سوتتالعاندارعا قاتىستى كۇش قولدانۋ دەرەگى بويىنشا پروكۋراتۋرا سوتقا دەيىنگى تەرگەۋدى باستادى، دەپ حابارلايدى قازاقپارات ءتىلشىسى وبلىستىق پروكۋراتۋرانىڭ باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، 2023 -جىلعى 3-قىركۇيەكتە الەۋمەتتىك جەلىلەردە اتباسار اۋدانىنداعى №1-تۇزەۋ مەكەمەسى قىزمەتكەرلەرىنىڭ سوتتالعاندارعا قاتىستى كۇش قولدانعانى تۋرالى بەينەروليكتەر جاريالانعان.

«وسى دەرەك بويىنشا اقمولا وبلىسىنىڭ پروكۋراتۋراسى قىلمىستىق كودەكستىڭ 146-بابىنىڭ 3-بولىگى 1-تارماعى بويىنشا سوتقا دەيىنگى تەرگەپ-تەكسەرۋدى باستادى (قاتىگەز، ادامگەرشىلىككە جاتپايتىن نەمەسە قادىر-قاسيەتىن قورلايتىن قارىم-قاتىناس، ازاپتاۋلار). وسى كۇنى پروكۋراتۋرا وكىلدەرى ءبىرىنشى كەزەكتەگى جەدەل-ىزدەستىرۋ ءىس-شارالارىن جۇزەگە اسىرۋمەن اتالعان مەكەمەگە باردى. ءتيىستى ساراپتامالار تاعايىندالدى»، - دەدى ۆەدومستۆودان.

پروكۋراتۋرانىڭ باسپا ءسوز قىزمەتىنەن اتاپ وتكەندەي، تەرگەۋ قورىتىندىسى قوسىمشا حابارلاناتىن بولادى.

ايتا كەتسەك، بۇدان بۇرىن تۇرعىنداردى جەلىدە بالاعاتتاعان شۋچە اكىمى قاتاڭ سوگىس العانىن جازعان ەدىك.