قازاقستاندا ەرلەر كوپ جالاقى الا ما، ايەلدەر كوپ الا ما

استانا. قازاقپارات - 2022-جىلى قازاقستاندا ورتاشا ايلىق جالاقى 309,9 مىڭ تەڭگەنى قۇرادى، بۇل 2021-جىلمەن سالىستىرعاندا 23,8 پايىزعا ارتىق. ينفلياتسيانى ەسكەرسەك، ساتىپ الۋ قابىلەتىنىڭ ارتقانىن كورسەتەتىن جالاقىنىڭ ناقتى ءوسىمى 7,6 پايىز بولدى، دەپ حابارلايدى قازاقپارات Finprom.kz سايتىنا سىلتەمە جاساپ.

ەر مەن ايەلدى ءبولىپ قاراستىرساق، 2022-جىلى ەرلەردىڭ جالاقىسى ورتاشا ەسەپپەن 355,3 مىڭ تەڭگە بولىپ، ءبىر جىلدا 26,3 پايىز كوبەيگەن، ايەلدەردىكى — 265,8 مىڭ تەڭگە، 20,7 پايىز ءوسىم بار.

وسىلايشا، جالاقى ايىرماشىلىعى 33,7 پايىز كورسەتتى. رەسپۋبليكا بويىنشا ەرلەردىڭ جالاقىسى ورتاشا دەڭگەيدەن 14,7 پايىز كوپ بولسا، ايەلدەردىكى - 14,2 پايىز از.

وڭىرلەر بويىنشا ەرلەردىڭ ەڭ جوعارى ورتاشا ايلىق جالاقىسى اتىراۋ (631,8 مىڭ تەڭگە)، ماڭعىستاۋ (590,6 مىڭ تەڭگە) جانە ۇلىتاۋ (489,1 مىڭ تەڭگە) وبلىستارىندا، ال ەڭ تومەنگىسى — جەتىسۋ وبلىسىندا (بار بولعانى 226 مىڭ تەڭگە) تىركەلگەن.

بۇل وڭىرلەردە ەر مەن ايەل جالاقىسىنداعى ايىرماشىلىق تا جوعارى. ماسەلەن، ماڭعىستاۋ وبلىسىندا ەرلەردىڭ جالاقىسى ايەلدەردىكىنەن 2 ەسە، اتىراۋدا — 85,9 پايىز، ۇلىتاۋدا — 68 پايىز ارتىق. بۇل رەتتە جەتىسۋ وڭىرىندە ايەلدەر ەرلەرگە قاراعاندا 3,1 پايىز عانا كوپ العان. جەتىسۋ وبلىسى - ايەلدەر ەرلەردەن كوپ تابىس تاباتىن جالعىز ءوڭىر.

جالاقىداعى ەڭ از ايىرماشىلىق جامبىل (1,9 پايىز)، الماتى (2,5 پايىز) جانە سولتۇستىك قازاقستان وبلىستارىندا (5,5 پايىز) بايقالعان.

تيىسىنشە ايەلدەردىڭ ەڭ جوعارى جالاقىسى استانادا تىركەلدى: ءبىر جىل بۇرىن 306,7 مىڭ تەڭگە بولسا، قازىر - 365,1 مىڭ تەڭگە. ۇزدىك ۇشتىككە اتىراۋ وبلىسى (339,8 مىڭ تەڭگە) مەن الماتى (320,1 مىڭ تەڭگە) قالالارى دا كىردى.

ەكونوميكا سالالارى بويىنشا ەرلەردىڭ ەڭ جوعارى جالاقىسى قارجى جانە ساقتاندىرۋ قىزمەتى (728,7 مىڭ تەڭگە)، تاۋ-كەن ونەركاسىبى جانە كارەرلەردى قازۋ (678,4 مىڭ تەڭگە)، كاسىبي، عىلىمي جانە تەحنيكالىق قىزمەت (499,2 مىڭ تەڭگە) سالالارىندا تىركەلدى.

سونىمەن قاتار، قارجى جانە ساقتاندىرۋ قىزمەتىنەن باسقا، تۇرۋ جانە تاماقتاندىرۋ قىزمەتىندە (ەرلەر پايداسىنا 38,1 پايىز) جانە وڭدەۋشى ونەركاسىپتە (33,8 پايىز) جالاقىنىڭ ەڭ ۇلكەن ايىرماشىلىعى كورىنىس تاپقان.

ءبىلىم سالاسىندا عانا ايەلدەر ەرلەردەن كوپ جالاقى الادى. مۇنداعى ايىرماشىلىق - 4,8 پايىز، تيىسىنشە 239,8 مىڭ تەڭگە جانە 251,4 مىڭ تەڭگە.

ايەلدەردىڭ ەڭ جوعارى جالاقىسى تاۋ-كەن ونەركاسىبى جانە كارەرلەردى قازۋ (535,8 مىڭ تەڭگە)، قارجى جانە ساقتاندىرۋ قىزمەتى (460,2 مىڭ تەڭگە)، اقپارات جانە بايلانىس (403 مىڭ تەڭگە) سالالارىندا تىركەلگەن.