اقمولا وبلىسىندا بالالاردى شاڭعى سپورتىنا باۋلىعان جاتتىقتىرۋشى ەسىرتكىمەن ۇستالدى

استانا. قازاقپارات - شاڭعى سپورتىنىڭ جاتتىقتىرۋشىسى اقمولا وبلىسىنىڭ اۋماعىندا گاشيشتى زاڭسىز وتكىزگەنى ءۇشىن ۇستالدى.

زاڭسىز اينالىمنان 55 كەلى ەسىرتكى تاركىلەندى، - دەپ حابارلايدى Polisia.kz.

ۇزاق مەرزىمدى جەدەل جۇمىس بارىسىندا اقمولا وبلىسى پ د ەسىرتكى قىلمىسىنا قارسى ءىس- قيمىل باسقارماسىنىڭ قىزمەتكەرلەرى وبلىستىق پروكۋراتۋرامەن كەلىسۋ جانە قر قارجى مونيتورينگى اگەنتتىگىنىڭ قولداۋىمەن «قاراسورا - 2023» رەسپۋبليكالىق جەدەل- پروفيلاكتيكالىق ءىس- شاراسى شەڭبەرىندە استانا مەن وبلىس اۋماعىنا ەسىرتكى قۇرالدارىن جەتكىزۋ ارناسىن جابۋ بويىنشا ارنايى وپەراتسيا جۇرگىزدى. قابىلدانعان شارالاردىڭ ناتيجەسىندە اقمولا وبلىسىنىڭ ەسىرتكىگە قارسى پوليتسەيلەرى جىبەك جولى كەنتىنىڭ تەرمينالىنىڭ جانىندا استانا قالاسىنىڭ 37 جاستاعى تۇرعىنى، وبلىس اۋداندارىنىڭ ءبىرىنىڭ تۋماسى باسقارۋىنداعى اۆتوكولىكتى توقتاتتى. سول تۇلعا بالالارعا شاڭعى سپورتىن ۇيرەتۋمەن اينالىسقان.

كۇدىكتىنىڭ اۆتوكولىگىن سانكتسيالانعان ءتىنتۋ بارىسىندا باگاج بولىگىندە كارتون قوراپ تابىلدى، ونىڭ ىشىندە سالماعى 40 كەلىگە جۋىق گاشيش ەسىرتكى زاتى بار ءتورت پوليەتيلەن پاكەت تابىلىپ، تاركىلەندى. سول كۇنى ەلوردا ماڭىنداعى اۋداندا، ءوز ۇيىندە ەسىرتكى زاتتارىنىڭ تاعى ءبىر كوتەرمە ساۋداگەرى، 36 جاستاعى ەر ادام ۇستالدى.

سول ءۇيدى سانكتسيالانعان ءتىنتۋ كەزىندە گاراجدىڭ ءۇي- جايىنان سالماعى 15 كەلىدەن استام ەسىرتكى زاتى بار ەكى پوليەتيلەن پاكەتى تابىلىپ، تاركىلەندى. ۇستالعاندارعا قاتىستى قاماۋدا ۇستاۋ تۇرىندەگى بۇلتارتپاۋ شاراسى تاڭدالدى.