ايبەك سمادياروۆ تايلاندتا قايتىس بولعان قازاقستاندىق بالا تۋرالى مالىمەت بەردى

استانا. قازاقپارات - سىرتقى ىستەر مينيسترلىگىنىڭ رەسمي وكىلى ايبەك سمادياروۆ تايلاندتا سۋعا باتقان قازاقستاندىق تۋرالى قوسىمشا مالىمەت بەردى، دەپ حابارلايدى قازاقپارات ءتىلشىسى.

«1- قىركۇيەكتە قازاقستاننىڭ تايلاندتاعى ەلشىلىگىنە پحۋكەت ارالىندا قازاقستان ازاماتى سۋعا ءتۇسىپ، باتىپ كەتتى دەگەن اقپارات كەلىپ ءتۇستى. سول اقپاراتتى تەكسەرۋ ءۇشىن ءبىزدىڭ كونسۋل جەرگىلىكتى بيلىكتەرمەن، پوليتسيامەن بايلانىستى. ەكى كۇن ىزدەستىرۋ جۇمىستارى جۇرگىزىلدى. ءۇشىنشى قىركۇيەك كۇنى ءبىر ازاماتتىڭ دەنەسى سۋدان شىعارىلدى. ءبىراق سۋدا ەكى كۇن جاتىپ قالعاندىقتان دەنەنى تانۋ نەمەسە باسقا دا اجىراتۋ مۇمكىندىگى وتە قيىن. سوندىقتان اكە-شەشەسى بۇگىن پوليتسياعا بارىپ، تانۋ پروتسەدۋراسىنا قاتىسىپ، بالاسى ەكەنىن تانىدى»، - دەدى س ءى م وكىلى.

ونىڭ ايتۋىنشا، مارقۇم 15 جاسىنان بەرى شەتەلدە ساياحاتتاۋمەن اۋەستەنىپ كەلگەن.

«بۇل ازامات تايلاند اۋماعىندا جۇرگەنىنە بىرنەشە اي بولعان. 18 جاستاعى بالا، You Tube-تە وتە بەلسەندى بولعان. 15 جاسىنان شەتەلدە قىدىرىپ جۇرەدى ەكەن. وكىنىشكە قاراي وسىنداي جاعداي بولدى. اكە-شەشەسىنە بارلىق كومەك كورسەتىلەدى. اناسى دا، اكەسى دە سول جەردە. جاقىن ارادا بوزبالانىڭ دەنەسى قازاقستانعا جەتكىزىلەدى»، - دەدى ايبەك سمادياروۆ.