قازاقستانمەن قىتاي اراسىنداعى ۆيزاسىز رەجيم قاشان كۇشىنە ەنەدى

استانا. قازاقپارات - قازاقستانمەن ارادا ۆيزاسىز رەجيم جونىندە قىتاي جاعىنان مەملەكەتىشىلىك راسىمدەر ءالى اياقتالمادى، دەپ حابارلايدى قازاقپارات ءتىلشىسى.

«قازاقستان مەن قىتاي ءوزارا ۆيزاسىز رەجيم تۋرالى كەلىسىمنىڭ 11-بابىنا سايكەس، وسى كەلىسىم بەلگىلەنبەگەن مەرزىمگە جاسالادى. ۋاعدالاسۋشى تاراپتاردىڭ ونىڭ كۇشىنە ەنۋى ءۇشىن قاجەت مەملەكەتىشىلىك راسىمدەردى ورىنداعانى تۋرالى سوڭعى حابارلامانى ديپلوماتيالىق ارنالار ارقىلى العان كۇننەن باستاپ كۇنتىزبەلىك 30 كۇن وتكەن سوڭ كۇشىنە ەنەدى. ءوز كەزەگىندە، قازاقستان جاعى مەملەكەتىشىلىك راسىمدەردىڭ اياقتالعانى تۋرالى قىتايعا حابارلاما جولدادى. قىتاي تاراپىنان ءتيىستى حابارلاما ازىرگە كەلىپ تۇسكەن جوق»، - دەلىنگەن قازاقستان سىرتقى ىستەر مينيسترلىگىنىڭ «قازاقپارات» اگەنتتىگىنە بەرگەن جاۋابىندا.

بۇدان بۇرىن حابارلانعانداي، بيىل جازدا ق ر ۇكىمەتىنىڭ 26- شىلدەدەگى 612№ قاۋلىسىنا سايكەس، قازاقستان مەن قىتاي حالىق رەسپۋبليكاسى اراسىندا ەكىجاقتى ۆيزا رەجيمى تۋرالى كەلىسىم بەكىتىلدى.

ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ قىتايمەن ۆيزاسىز رەجيمگە قاتىستى شەشىم جىل سوڭىنا دەيىن قابىلدانۋى مۇمكىن ەكەنىن ايتتى.

ەستەرىڭىزگە سالا كەتەيىك، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ بيىل قىتاي حالىق رەسپۋبليكاسىنا مەملەكەتتىك ساپارى اياسىندا ءبىرقاتار قۇجاتقا قول قويىلدى. ولاردىڭ اراسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم» بار.

اتاپ ايتقاندا، اندوررا، البانيا، نيكاراگۋا مەملەكەتتەرىمەن ۆيزاسىز رەجيم بويىنشا كەلىسىمدەرگە 2022-جىلى قول قويىلىپ، 2023-جىلى ولار رەسمي كۇشىنە ەندى. 2023-جىلى ۆيزاسىز رەجيم ورناتۋ بويىنشا ق ح ر جانە ۆەتناممەن ەلدەرىمەن كەلىسىم بەكىتىلدى. بۇل كەلىسىمدەر مەملەكەتشىلىك راسىمدەر اياقتالعاننان كەيىن رەسمي كۇشىنە ەنەدى.