قازاقستانعا شەتەل بانكتەرى كەلسە، ارزان كرەديت الۋعا مۇمكىندىك بولا ما

استانا. قازاقپارات - قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا شەتەلدىك بانكتەردىڭ ەلگە كەلۋى نەسيە نارىعىنا قالاي اسەر ەتەتىنىن ايتتى، دەپ حابارلايدى قازاقپارات ءتىلشىسى.

اگەنتتىك باسشىسى پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنە قازاقستاننىڭ قارجى نارىعىنا شەتەلدىك بىرنەشە بانك كىرۋى مۇمكىن ەكەنىن ايتتى.

«اڭگىمە رەسەي سياقتى كورشىلەس ەلدەردىڭ بانكتەرى تۋرالى بولىپ وتىرعان جوق. قازىر بىرنەشە ينۆەستور قىزىعۋشىلىق تانىتىپ وتىر. ولار ەۋروپا مەن اراب ەلدەرىنەن»، - دەدى ول.

سونداي-اق، ءمادينا ءابىلقاسىموۆا ەۋروپالىق بانكتەر قازاقستانعا كىرسە، نەسيە قانشالىقتى ارزانداۋى مۇمكىن ەكەنىن ايتتى.

«دەپوزيتتەردىڭ دە، نەسيەلەردىڭ دە پايىزدىق ستاپكاسى بازالىق مولشەرلەمەگە قاراي قالىپتاسادى. دەپوزيتتەن دە، نەسيەدەن دە قوسىمشا تابىس تابۋ ءۇشىن بانكتەرگە بازالىق مولشەرلەمەنىڭ دەڭگەيىن ۇستاۋ كەرەك بولادى. سونىمەن بىرگە بانكتەر اكتيۆىنىڭ 30 پايىزىنان كەم ەمەس مولشەردە جوعارى ليكۆيدتى اكتيۆ ۇستاۋعا ءتيىس. بۇل سالىمشىلار اياق استىنان اكتيۆتەردى جاپپاي شەشىپ العان جاعدايعا كەرەك. سوندىقتان، بازا - نەگىزگى فاكتور. ءتىپتى جاڭا بانك كەلگەن كۇننىڭ وزىندە ول دا بازالىق مولشەرلەمەگە قاراپ باعدار ۇستايتىن بولادى. ياعني، ەكونوميكاداعى اقشانىڭ قۇنىنا قارايدى. شەتەلدىك بانكتەر كەلىپ، بىزدەگىدەن باسقا مولشەرلەمەمەن نەسيە بەرەدى دەپ كۇتۋ... ول بۇلاي جۇمىس ىستەمەيدى. ەكونوميكاداعى اقشانىڭ قۇنى دەگەن بار. ولار بازالىق مولشەرلەمە قۇنىنا قارايدى»، - دەدى اگەنتتىك ءتوراعاسى.