ساۋد ارابياسىندا زەينەتتەگى مۇعالىم تۆيتتەر جازبالارى ءۇشىن ءولىم جازاسىنا كەسىلدى
بۇل جايىندا Human Rights Watch ادام قۇقىعىن قورعاۋ ۇيىمىنا سىلتەمە جاساپ DW حابارلادى.
ساۋد ارابياسى 54 جاستاعى زەينەتكەر ۇستاز مۇحاممەد ءال-گامديدى الەۋمەتتىك جەلىدە جاريالاعان جازباسى ءۇشىن ءولىم جازاسىنا كەستى.
سوت ءال-گامديدى بيلىككە قارسى ءسوز بايلاستى جانە مەملەكەتتىك ينستيتۋتتارعا نۇقسان كەلتىردى دەپ ايىپتادى. بۇكىل كىنا ونىڭ Twitter جانە YouTube سايتتارىندا بەيبىت پىكىر بىلدىرۋىنە نەگىزدەلگەن.
ونىڭ مالىمەتىنشە، شەشىمدى ساۋد ارابياسىنىڭ قىلمىستىق ىستەر جونىندەگى مامانداندىرىلعان سوتى 10-شىلدەدە شىعارعان.
سوتتالۋشىنىڭ كىناسىنىڭ دالەلى رەتىندە تۆيتتەرىن، رەتۆيتتەرىن، سونداي-اق YouTube جەلىسىندەگى بەلسەندىلىگىن كورسەتكەن.
سوتتىڭ پىكىرىنشە، ءال-گامدي «كورول مەن تاق مۇراگەرىن ءدىن مەن زاڭعا نۇقسان كەلتىرە وتىرىپ سيپاتتادى»، «تەرروريستىك ۇيىممەن بايلانىس جاسادى» جانە «تەرروريستىك قىلمىس جاساۋ ماقساتىندا جالعان اقپارات جاريالادى» دەپ ايىپتالعان.
HRW كىسىنى وزگەشە ويلاعانى، ەلدەن وزگەشە پىكىرى ءۇشىن قۋدالاۋ كۇشەيگەنىن حابارلادى.
Human Rights Watch ۇيىمى كورولدىكتى «ءسوز بوستاندىعىنا قارسى قىسىمنىڭ كۇشەيۋىن» كورسەتەتىن سوت ۇكىمىن بۇزۋعا شاقىردى.
«ساۋد ارابياسىنداعى قۋعىن-سۇرگىن جاڭا قورقىنىشتى كەزەڭگە جەتتى، وندا سوت تەك بەيبىت تۆيتتەر ءۇشىن ءولىم جازاسىن شىعارا الادى»، - دەدى HRW ساۋد ارابياسى بويىنشا ساراپشىسى دجوي شيح.
ول ەل بيلىگىن «بۇل ادىلدىك پارودياسىنان باس تارتۋعا» شاقىردى.
مۇحاممەد ءال-گامدي 2022 -جىلدىڭ ماۋسىمىندا مەككەدەگى ءۇيىنىڭ جانىندا ۇستالىپ، دجيددانىڭ سولتۇستىگىندەگى ءال-داحبان تۇرمەسىنە قامالدى. وندا ءتورت اي بويى جالعىز كامەرادا وتىرعان.
ءتىپتى ادۆوكاتقا جانە تۋىستارىمەن بايلانىسۋىنا رۇقسات بەرمەدى. كەيىن ول ەر-ريادتاعى ءال-حاير تۇرمەسىنە اۋىستىرىلدى.
مۇحامماد ءال-گامدي ءوزىن ساياسي بەلسەندى نەمەسە قۇقىق قورعاۋشى سانامايدى، تەك ساۋد ارابياسىنىڭ ۇكىمەتىنە قانداي دا ءبىر الاڭداۋشىلىعىن ءبىلدىرىپ جۇرەتىن جەكە تۇلعا رەتىندە سيپاتتايدى، دەپ حابارلايدى HRW.
سوتتالعان كىسى – ۇلى بريتانيادا قۋعىندا جۇرگەن بەلگىلى يسلامتانۋشى سايد بين ناسسەر ءال-گامديدىڭ اعاسى.
ونىڭ ايتۋىنشا، بۇل ۇكىم باۋىرىن ەلگە قايتارۋ ءۇشىن بيلىك تاراپىنان ادەيى جاسالىپ وتىر.
ساۋد ارابياسى بيلىگى سوڭعى جىلدارى شەتەلدەگى سىناۋشىلار مەن ديسسيدەنتتەر وتباسىنا قىسىم جاساۋ ارقىلى ولاردى ەلگە ورالۋعا ماجبۇرلەۋگە تىرىسىپ جاتىر.
ءال-گامديدىڭ ۇكىمى - الەۋمەتتىك جەلى قولدانۋشىلارىنا قارسى قوزعالعان ىستەردىڭ ىشىندەگى ەڭ قاتىگەزى.
Amnesty International قۇقىق قورعاۋ ۇيىمىنىڭ مالىمەتىنشە، ساۋد ارابياسى ءولىم جازاسى ءجيى قولدانىلاتىن ەلدەردىڭ ءبىرى.