ءبىر قىزدى ۇناتىپ قالعان ەر ادام استانا اۋەجايىنا «بومبا» قويدى

استانا. قازاقپارات - استانا اۋەجايىنا جارىلعىش زات قويىلعاندىعى تۋرالى جالعان اقپارات بەرگەن جولاۋشى قىلمىستىق جاۋاپكەرشىلىككە تارتىلدى، دەپ حابارلايدى قازاقپارات اۋەجاي مالىمەتىنە سىلتەمە جاساپ.

استانا حالىقارالىق اۋەجايىنان «استانا-الماتى» باعىتىمەن ۇشاتىن جولاۋشى تىركەۋدەن ءوتۋ كەزىندە وزىمەن بىرگە بومبا بار ەكەنىن ايتقان. اۋەجايدا دابىل قاعىلىپ، قىزمەتكەرلەر نىساندى شۇعىل تەكسەرۋگە ءماجبۇر بولدى.

الايدا استانا حالىقارالىق اۋەجايىنىڭ اۆياتسيالىق قاۋىپسىزدىك قىزمەتىنىڭ ماماندارى جارىلعىش زاتتى تاپپادى. جولاۋشى بولسا رەيسكە جىبەرىلمەي، جەلىلىك پوليتسيا ءبولىمى قىزمەتكەرلەرىنە تاپسىرىلدى.

قازىر وعان قاتىستى ق ر قىلمىستىق كودەكسىنىڭ 273-بابى بويىنشا تەرگەۋ باستالدى.

ەر ادام بۇل قىلىعىن «ءبىر قىزدى ۇناتىپ، سوعان ازىلدەمەك نيەتتە» جاساعانىمەن تۇسىندىرگەن.

جىل باسىنان استانا حالىقارالىق اۋەجايىندا جارىلعىش زات تۋرالى جالعان اقپارات بەرۋ بويىنشا 30 ءىس تىركەلگەن.