مونشادا قانشا ۋاقىت وتىرۋعا بولادى؟
مونشانىڭ ادام دەنساۋلىعىنا پايداسى قانداي جانە مونشادا قانشا ۋاقىت وتىرۋعا بولادى؟
قاناينالىمدى جاقسارتادى
مونشاعا بارۋ ادامداردىڭ جۇرەك-قان تامىرلارى جۇيەسىنىڭ جۇمىسىن جاقسارتادى. مونشادان الىناتىن ىلعال جىلۋ قىلتامىرلاردىڭ كەڭەيۋىنە ىقپال جاساپ، سونىڭ سەبەبىنەن قاناينالىم جاقسارادى. ناتيجەسىندە قان اعزا بويىمەن كەدەرگىسىز اعىپ، مۇشەلەر مەن جاسۋشالاردى وتتەكپەن قامتاماسىز ەتەدى.
تەرىنىڭ دەمالۋى
مونشادا نەمەسە ساۋنادا جىلۋدىڭ اسەرىنەن تەر كوپ مولشەردە بولىنەدى. ناتيجەسىندە، تەرىنىڭ تومەنگى قاباتىنان بارلىق لاستىقتار شىعاتىن تەسىكتەر اشىلادى. سۇيىق كوندەنسات لاستىقتى جۋىپ، ولگەن جاسۋشالاردى تەرى بەتىنەن الىپ شىعۋعا كومەكتەسەدى.
جاتتىعۋدان كەيىنگى قالىپقا كەلۋ
ادامدار ماشىقتانۋدان سوڭ ءجيى بۇلشىقەتتەر اۋرۋىن سەزىنەدى. ول اعزانىڭ جۇكتەمەگە قالىپتى رەاكسياسى. ءبىراق بۇلشىقەتتەردى بوساڭسىتىپ، ولاردىڭ قالپىنا كەلۋىن قامتاماسىز ەتۋ ماڭىزدى. مونشا جاتتىعۋدان كەيىن قالىپقا كەلۋگە كومەكتەسە الادى.
كۇيزەلىستى ازايتۋ
جىلى مونشادا بولۋ ەندورفيندەردىڭ (باقىت گورمونى) تۇزىلۋىنە ىقپال ەتەدى. ولار كۇيزەلىستى ازايتۋعا كومەكتەسەدى. سونىمەن قاتار، مونشادا بولۋ كورتيزول گورمونىنىڭ ءتۇزىلۋىن ازايتادى. ول كۇيزەلىستى جاعدايعا جاۋاپ رەتىندە بولىنەتىن گورمون. سوندىقتان مونشادان سوڭ ادام ءوزىن بوساڭسىعان جانە جاڭارعان سەكىلدى سەزىنەدى.
مۇرىن قۋىسىنىڭ اشىلۋى
مونشا جىلۋلىعى دەنەنىڭ بارلىق شىرىشتى قابىعىنا وتەدى، سوندىقتان مونشادا جەڭىل ءارى تەرەڭ تىنىس الاسىز. بۋدا از ۋاقىت وتىرعاننىڭ ءوزى مۇرىننىڭ بىتەلۋىن كەتىرەدى. سوندىقتان، مونشاعا بارۋدىڭ تۇماۋدى ەمدەۋگە دە كومەگى تيەدى.
مونشا ىشىندەگى بۋدا وتىرۋ ۋاقىتى ءار ادام اعزاسىنىڭ ەرەكشەلىگىنە، مونشا تۇرىنە جانە تەمپەراتۋراعا قاراي ءارتۇرلى. دەسە دە، ورتاشا ەسەپپەن قولايلى ۋاقىت - 10-15 مينۋت.
مونشادا تەمپەراتۋرا جوعارى بولعاندىقتان، كەي ادامدار توبىنا وعان بارۋعا بولمايدى:
- جۇكتى ايەلدەر؛
- جۇرەك اۋرۋى بار ادامدار؛
- گيپەرتونيا (جوعارى قان قىسىمى) نەمەسە گيپوتونياسى (ارتەريالىق قىسىمنىڭ تومەندەۋى) بار ادامدار؛
- قويانشىعى (ۇستامالى اۋرۋ) بار ادامدار؛
- انتيبيوتيك قابىلداپ جۇرگەن ادامدار؛
- پسيحوتروپتىق دارىلەر قابىلداپ جۇرگەن ادامدار.
مونشا پروتسەدۋرالارى دەنساۋلىققا زيان كەلتىرمەس ءۇشىن بۋعا قالاي ءتۇسۋ كەرەگىن ءبىلۋ كەرەك.
بىرنەشە قاراپايىم ەرەجە:
بۋعا دەمالىس، بۋ، قاراما-قارسى دۋش جانە سۋعا ءتۇسۋدى كەزەكتەستىرە وتىرىپ، كەزەڭ-كەزەڭمەن كىرۋ كەرەك؛
اعزاعا مونشاداعى تەمپەراتۋراعا بەيىمدەلۋگە ۋاقىت بەرىڭىز. مونشاعا كىرە سالا بۋعا ءتۇسىپ، بەلسەندى پروتسەدۋرالارعا كىرىسىپ كەتپەڭىز؛
قولايلى تەمپەراتۋرا - 90-100 گرادۋستان جوعارى بولماۋى كەرەك. بۋدا 10-20 مينۋت وتىرۋ جەتكىلىكتى. ەگەر ءبىرىنشى رەت بارساڭىز، 3-5 مينۋتتان باستاڭىز؛
بۋعا 3-4 رەت كىرگەن ءجون.
تومەنگى سورەدەن باستاڭىز. بىرنەشە مينۋت وتكەن سوڭ حال-جاعدايىڭىز جاقسى بولسا، جوعارىعا كوتەرىلۋگە بولادى؛
بۋعا كىرمەس بۇرىن دۋشقا ءتۇسىپ الىڭىز، ءبىراق شاشىڭىزدى سۋلاماڭىز. بۋدا سۋ شاشپەن وتىرۋعا بولمايدى. باسىڭىزعا باس كيىم كيىڭىز،
بۋلى بولمەدە تۇرۋعا بولمايدى. وتىرعان كەزدە اياعىڭىز سالبىراپ تۇرماۋى كەرەك، اياعىڭىز سورەگە ءتيىپ تۇرسىن. بوساڭسۋعا تىرىسىڭىز.
اعزاڭىزدى تىڭداڭىز. ەگەر باسىڭىز اينالسا نەمەسە اۋا جەتپەسە، بىردەن بۋلى بولمەدەن شىعىڭىز؛
مونشادا جانە مونشادان كەيىن تازا سۋ كوبىرەك ءىشىڭىز.
massaget.kz