تۇرعىندار تۇينەمە جۇقتىردى: اقمولا وبلىسىنداعى اۋىلدا كارانتين جاريالاندى

كوكشەتاۋ. قازاقپارات - اقمولا وبلىسىنداعى ءۇشقاراسۋ اۋىلىندا مال قىرىلىپ، ادامدار تۇينەمەمەن اۋرۋحاناعا جاتقىزىلدى.

ەرتەڭ اۋىل كارانتينگە جابىلادى. بۇل تۋرالى وبلىستىق ۆەتەريناريا باسقارماسىنان ءمالىم ەتتى، دەپ حابارلايدى قازاقپارات ءتىلشىسى.

ۆەدومستۆو دەرەگىنشە، 2023-جىلدىڭ 28- تامىزىندا اقمولا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنەن جارقايىڭ اۋدانىنداعى ج ش س جۇمىسشىلارى «تۇينەمەگە» شالدىققاندىعى تۋرالى حابار تۇسكەن.

ج ش س ديرەكتورىنىڭ ايتۋىنشا، 32 باس ءىرى قارا مال قىرىلعان. ولگەن مال جويىلدى، ال ەتى كوميسسيالىق تۇردە تاركىلەندى.

«ەسىل اۋداندىق اۋرۋحاناسىنىڭ جۇقپالى اۋرۋلار بولىمشەسىنە 12 ادام جاتقىزىلدى. سونىمەن بىرگە، بايلانىستا بولعان 22 ادام انىقتالىپ، ولار جارقايىڭ اۋداندىق اۋرۋحاناسىنىڭ مەديتسينا قىزمەتكەرلەرىنىڭ باقىلاۋىنا الىندى. كلينيكالىق كورىنىسى مەن زەرتحانالىق مالىمەتتەرى بويىنشا «تۇينەمە» دياگنوزى قويىلدى. ناۋقاستار كلينيكالىق حاتتاماعا سايكەس ەم قابىلدايدى، دەتوكسيكاتسيا تەراپياسى، انتيباكتەريالدى تەراپيا جۇرگىزىلەدى»، - دەدى ۆەدومستۆودان.

ۆەتەريناريا باسقارماسىنان اتاپ وتكەندەي، سانيتاريالىق قىزمەت ەپيدەمياعا قارسى ءىس-شارالار وتكىزىپ جاتىر. اۋداننىڭ باس مەملەكەتتىك سانيتاريالىق دارىگەرىنىڭ قاۋلىسىنا سايكەس بايلانىستا بولعان ادامدارعا مەديتسينالىق باقىلاۋ ورناتىلدى.

دەزينفەكسيا بارلىق تەكسەرىلگەن وشاقتاردا جۇرگىزىلدى.

«وقيعا ورنىندا سەس، دەنساۋلىق ساقتاۋ ماماندارى، سونداي-اق ۆەتەريناريالىق باقىلاۋ كوميتەتىنىڭ اۋماقتىق ينسپەكتسياسى مەن ۆەتەريناريا باسقارماسىنىڭ قىزمەتكەرلەرىنەن قۇرالعان توپ جۇمىس ىستەپ جاتىر. ەرتەڭ ءۇشقاراسۋ اۋىلىنىڭ اۋماعىندا كارانتين جاريالانادى. ينفەكتسيا وشاعىن جويۋ بويىنشا جۇمىستار جۇرگىزىلۋدە. اۋىلشارۋاشىلىق ونىمدەرىن تاسىمالداۋدى شەكتەۋ ماقساتىندا اۋداندىق پوليتسيا ءبولىمى ءۇشقاراسۋ اۋىلىنا بەكەتتەر ورناتتى. اۋىل ماڭىنا پوليتسيا ناريادتارى قويىلىپ، كىرىپ، شىعاتىن كولىكتەر مەن ادامداردى تىركەپ جاتىر»، - دەپ تولىقتىردى ۆەدومستۆودان.

ايتا كەتسەك، بۇدان بۇرىن اقمولا وبلىسىنداعى اۋىل برۋتسەللەزگە بايلانىستى كارانتينگە جابىلعانىن جازعان ەدىك.