استانا اكىمدىگى ماكسيم گالكيننىڭ كونسەرتىنە ادەيى رۇقسات بەرمەي قويعانى راس پا

استانا. قازاقپارات - الەۋمەتتىك جەلىدە رەسەيلىك تەلەجۇرگىزۋشى، شوۋمەن ماكسيم گالكيننىڭ ۆيدەوسى تارادى.

ونىڭ ايتۋىنشا، قازاقستان بيلىگى ونەر جۇلدىزىنىڭ الماتى مەن استانادا كونسەرت وتكىزۋىنە مۇمكىندىك بەرمەي وتىر. وسىعان وراي استانا قالاسىنىڭ مادەنيەت باسقارماسى مالىمدەمە جاسادى، دەپ حابارلايدى قازاقپارات.

«بيىلعى 1-ناۋرىزدا استانا قالاسىنىڭ مادەنيەت باسقارماسىنا 8-قازاندا روزا باعلانوۆا اتىنداعى «قازاقستان» ورتالىق كونسەرت زالىندا ماكسيم گالكيننىڭ كەشىن وتكىزۋ جونىندە حات كەلدى. ونى جولداعان - «TopBilet» ج ك ديرەكتورى ر. اسلانوۆ. حات ءنومىرى - №271. 8-قازاندا مۇعالىمدەر كۇنىنە ارنالعان كونسەرت وتكىزىلەتىندىكتەن كەشتى ۇيىمداستىرۋشىلارعا باسقا كۇندى نەمەسە باسقا عيماراتتى تاڭداۋ ۇسىنىلدى. ۇيىمداستىرۋشىلاردان بۇدان باسقا حات تۇسكەن جوق» دەپ اتاپ ءوتتى باسقارما.

وسىعان قاراماستان مەكەمە ماكسيم گالكينگە كومەككە كەلۋگە دايىن.

«ۇستازدار كۇنىنە ارنالعان كونسەرتتى باسقا كونسەرتتىك زالدا وتكىزۋ جوسپارلانعانىن ەسكەرە وتىرىپ، ۇيىمداستىرۋشىلار قايتا جۇگىنگەن جاعدايدا ءتيىستى زاڭناماعا سايكەس ماكسيم گالكيننىڭ كەشىن وتكىزۋ مۇمكىندىگىن قاراستىرۋعا دايىنبىز» دەيدى ۆەدومستۆودان.