قازاقستاندا عىلىمدى دامىتۋعا قانشا قاراجات جۇمسالماق

استانا. قازاقپارات - پارلامەنت قاراۋىنا «عىلىم جانە تەحنيكالىق ساياسات تۋرالى» زاڭ جوباسى ۇسىنىلادى.

بۇل تۋرالى ەلوردادا ءوتىپ جاتقان كونفەرەنتسيادا عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.

«قازىر وتاندىق عىلىمدى جەتىلدىرۋ ماسەلەسىنە ەرەكشە ءمان بەرىپ وتىرمىز. وسى ورايدا قارجىلاندىرۋ باعىتى دا شەشىلدى. 2023-2025 -جىلدارى، ياعني ءۇش جىلدا تەك عىلىمدى قارجىلاندىرۋعا، گرانتتىق قارجىلاندىرۋعا، باعدارلامالىق ءارى تىكەلەي گرانتتارعا 650 ميلليارد تەڭگەگە جۋىق قاراجات ءبولىندى. 30 جىلدا مۇنداي قارجىلاندىرۋ بولماعان، ءقازىر عىلىمعا 1,5 ميلليارد دوللاردى باعىتتاپ وتىرمىز»، - دەدى س. نۇربەك قازاقستاندا جاڭارتىلاتىن ەنەرگيا كوزدەرىن دامىتۋ كونفەرەنتسياسىندا.

سونىمەن قاتار مينيستر ەلىمىزدە ينستيتۋتسيونالدىق تەتىكتەر قايتا قارالعانىن، پرەزيدەنت جانىنان عىلىم جانە تەحنولوگيالار جونىندەگى ۇلتتىق كەڭەس قۇرىلعانىن، «عىلىم جانە تەحنيكالىق ساياسات تۋرالى» زاڭ قابىلداناتىنىن ايتتى.

«بۇل زاڭ جوباسىن قازىر تانىستىرىپ جاتىرمىز جانە وسى قۇجات قىركۇيەك- قازان ايلارىندا پارلامەنتكە جولدانادى. قۇجات تالقىلانىپ، ونى كەلەسى جىلدىڭ ءبىرىنشى جارتىسىندا قابىلداۋدى جوسپارلاپ وتىرمىز. وندا ءتيىستى تەتىكتەر قامتىلىپ، سونىڭ ىشىندە جەكە بيزنەستىڭ عىلىمي جوبالارعا قاتىسۋىن ىنتالاندىراتىن قادامدار قاراستىرىلادى. 150 پايىزعا دەيىن سالىق جەڭىلدىكتەرى بولادى. بۇل تۇرعىدا بيزنەس جوعارى تەحنولوگيالىق ونىمدەردى شىعارۋعا مۇددەلى بولادى. ءبىز بۇل مەحانيزمدى جۇيەلى تۇردە جاساعىمىز كەلەدى. سوندىقتان ءقازىر وسى باعىتتا قارجى مينيسترلىگىمەن ءتيىستى تالقىلاۋلاردى جالعاستىرىپ جاتىرمىز»، - دەدى ۆەدومستۆو باسشىسى.