دۋبايدا قازاق تىلىندە تۇسىرىلگەن «اكەگە اپارار جول» فيلمىنىڭ تۇساۋكەسەرى ءوتتى

استانا. قازاقپارات - دۋبايدا قازاق تىلىندە تۇسىرىلگەن فيلمىنىڭ تۇساۋكەسەرى ءوتتى. «اكەگە اپارار جول» دەپ اتالاتىن تۋىندى وتباسى قۇندىلىقتارىن دارىپتەۋدى ماقسات ەتكەن.

ءبىز قازىر دۋباي- Mall ساۋدا ورتالىعىنا كىرىپ كەلە جاتىرمىز. وسى جەردەگى كينوزالدىڭ بىرىندە قازاق تىلىندە تۇسىرىلگەن فيلم كورسەتىلەدى. مۇنداي مۇمكىندىك كۇندە بولا بەرمەيدى. سوندىقتان، امىرلىكتەردە ءومىر سۇرەتىن جەرلەستەرىمىز جان- جاقتان جينالىپ كەلىپ جاتىر. ءتۇسىرىلىم جۇمىستارى ناۋرىز ايىندا الماتى وبلىسىنان باستالىپ، كيەلى ماڭعىستاۋ وڭىرىندە اياقتالعان.

فيلمنىڭ رەجيسسەرى - تيمۋر دۋلاتوۆ. درامەدي، ياعني دراما- كومەديا جانرىندا تۇسىرىلگەن شىعارما ءازىل ارقىلى كوپكە تەرەڭ وي سالادى.

رامازان امانتاي، فيلم پروديۋسەرى:

- اكەلەردىڭ قادىرى جانە بۇل تەك قانا اكە تۋرالى ەمەس، جان- جاقتى ايتار ويى كوپ فيلم. اكە دەگەن تاماشا ۇعىمدى، تاماشا قاسيەتتى ەسىمدى ەلدىڭ ەسىنە ءبىر سالىپ قويايىق دەپ وسى فيلمدى تۇسىردىك. ءارى بۇگىن ءبىزدىڭ تاماشا مەرەكەمىز - اتا زاڭ كۇنى. دۋبايداعى قانداستارىمىز كورىپ، ءوزىنىڭ وڭ باعاسىن بەرىپ جاتىر. سوعان قاتتى قۋانىپ تۇرمىز.

فيلمدە قازاق وتباسىنىڭ باسىنان وتكەن ومىرلىك جاعدايلار كورىنىس تاپقان. جانى قازاقتىڭ جۇرەگىن دارىگەرلەر وزگە كەۋدەگە سالسا- داعى، سول جۇرەكتىڭ قازاق دەپ سوعىپ، ۇلتتىڭ بويىنداعى قاسيەتتەرگە ادالدىعى ايقىن سۋرەتتەلگەن.

داۋت شايحيسلاموۆ، پروديۋسەر:

- بۇگىن دۋبايدا كەرەمەت كورىنىس بولدى، رامازانعا كوپ راحمەت. ماڭعىستاۋدى كورگەنىمە وتە قۋانىشتىمىن. ويتكەنى، مەن جاڭاوزەننەن بولامىن. التىن ەمەل ساياباعى، وتە كەرەمەت، قازاقستان وتە كەرەمەت. قازاق كينوسى دامي بەرسىن.

ايدىن نىعمەت، كورەرمەن:

- قازاق كينوسىن كورىپ جاقسى اسەرمەن شىقتىق. سسەناريدە وتە تەرەڭ ماعىنا بار. اكەگە ارنالعان، ءوزىمىزدىڭ قازاقي وتباسىلىق قۇندىلىقتارعا ارنالعان. قازاقتىڭ اكتەرلەرى كەلىپ وسىنداي ۇلكەن سىيلىق تارتۋ ەتىپ جاتىر.

www.24.kz