كريشتيانۋ رونالدۋ ۇلتتىق چەمپيوناتتا گول سوعۋ جونىنەن الەمدىك رەكورد ورناتتى

استانا. قازاقپارات - پورتۋگاليا مەن ساۋديالىق «ال- ناسر» كلۋبىنىڭ شابۋىلشىسى كريشتيانۋ رونالدۋ ۇلتتىق ليگادا گول سوعۋ جونىنەن الەمدىك رەكورد ورناتتى، دەپ حابارلايدى قازاقپارات ءتىلشىسى.

حالىقارالىق فۋتبول تاريحى جانە ستاتيستيكاسى فەدەراتسياسىنان (IIFHS) ءمالىم ەتكەنىندەي، رونالدۋ «ال- شاباب» كومانداسىمەن وتكەن ماتچتا قوس گولدىڭ اۆتورى اتاندى.

وسىلايشا، ول ۇلتتىق چەمپيوناتتارداعى 516-ىنشى جانە 517-گولدارىن سوعىپ، اۋستريالىق جانە چەحوسلوۆاكيالىق شابۋىلشى يوزەف بيتسان مەن ماجارستاندىق فەرەنتس پۋشكاشتى باسىپ وزدى. ولار 515 تەن گول سوعىپ، ۇزاق ۋاقىت بويى رەكوردتى ۇستاپ تۇرعان ەدى.

بۇل رەيتينگتە ايماقتىق ليگالاردا سوعىلعان گولدار ەسەپتەلمەيدى. سوندىقتان پەلە، روماريو سياقتى سۇرمەرگەندەر تىزىمدە جوق.

جۋىردا 500 گول ەنگىزگەن ءۇش ويىنشىنىڭ (رونالدۋ، پۋشكاش، بيتسان) قاتارىنا ارگەنتينالىق ليونەل مەسسي كىرۋى ابدەن ىقتيمال. ونىڭ ەسەبىندە 496 دوپ بار.

رونالدۋ پورتۋگاليا بىرىنشىلىگىندە - 3، يسپانيادا - 311، اعىلشىن پرەمەر- ليگاسىندا - 103، يتاليادا - 81، ساۋد ارابياسىندا 19 گولدىڭ اۆتورى اتاندى.

ەسكە سالا كەتەيىك، بۇدان بۇرىن بىشكەكتە «بارسەلونانىڭ» اڭىز ويىنشىلارى جاسىل الاڭعا شىققانىن جازعان ەدىك.