قىركۇيەكتە قازاقستاندىقتاردى قانداي وزگەرىستەر كۇتىپ تۇر؟

استانا. قازاقپارات - قازاقستاندا قىركۇيەكتە ءبىرقاتار ماڭىزدى جاڭالىق بولادى. كۇزدىڭ ءبىرىنشى ايىندا نە وزگەرەتىنىنە شولۋ جاسالدى.

قىركۇيەكتەن باستاپ مەكتەپتە كىمدەرگە تەگىن تاماق بەرىلەدى؟

1 قىركۇيەكتەن باستاپ 1-4-سىنىپ وقۋشىلارى تەگىن تاماقپەن قامتىلادى. مەملەكەت باسشىسىنىڭ تاپسىرماسى بويىنشا بيىل قىركۇيەكتىڭ 1-ىنەن باستاپ از قامتىلعان وتباسىلاردان شىققان 1,5 ميلليوننان اسا وقۋشى، سونداي-اق، الەۋمەتتىك مارتەبەسىنە قاراماستان باستاۋىش سىنىپ وقۋشىلارى تەگىن تاماقتانادى.

رەسپۋبليكا بويىنشا تەگىن تاماقتانۋ قۇنى ورتا ەسەپپەن 577 تەڭگە، ەڭ جوعارى باعا الماتى قالاسىندا 800 تەڭگە بولىپ وتىر.

قىركۇيەكتەن باستاپ شاكىرتاقى مولشەرى قانشاعا وسەدى؟

قىركۇيەكتەن باستاپ باكالاۆريات ستۋدەنتتەرىنىڭ شاكىرتاقىسى 20 پايىزعا، ماگيسترانتتار مەن دوكتورانتتاردىڭ شاكىرتاقىسى 15 پايىزعا، ت ج ك ب ستۋدەنتتەرىنىڭ شاكىرتاقىسى 50 پايىزعا وسەدى.

دوكتورانتتارعا (ونىڭ ىشىندە «دەنساۋلىق ساقتاۋ» باعىتى بويىنشا) 217500 تەڭگە؛

دايارلاۋدىڭ «دەنساۋلىق ساقتاۋ» باعىتى بويىنشا رەزيدەنت- دارىگەرلەرگە جانە ماگيسترانتتارعا 111579 تەڭگە؛

ماگيسترانتتارعا 97024 تەڭگە؛

ينتەرندەرگە 75890 تەڭگە؛

جوعارى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا دايارلاۋدىڭ پەداگوگيكالىق جانە «دەنساۋلىق ساقتاۋ» باعىتتارى بويىنشا ءبىلىم الاتىن ستۋدەنتتەرگە 67200 تەڭگە؛

دايارلاۋدىڭ پەداگوگيكالىق باعىتتارى جانە «دەنساۋلىق ساقتاۋ» باعىتى بويىنشا ءبىلىم الاتىن ستۋدەنتتەردى قوسپاعاندا، جوعارى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا ءبىلىم الاتىن ستۋدەنتتەرگە 41898 تەڭگە؛

تەحنيكالىق جانە كاسىپتىك ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا جۇمىسشى بىلىكتىلىكتەرى بويىنشا وقيتىن ستۋدەنتتەرگە 32681 تەڭگە؛

تەحنيكالىق جانە كاسىپتىك (ورتا بۋىن ماماندارىن دايارلاۋدى كوزدەيتىن) ، ورتا بىلىمنەن كەيىنگى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا ءبىلىم الاتىن ستۋدەنتتەرگە 31422 تەڭگە شاكىرتاقى بەرىلەدى.

قىركۇيەكتەن باستاپ كىمدەردىڭ جالاقىسى وسەدى؟

1 قىركۇيەكتەن باستاپ بالاباقشا تاربيەشىلەرىنىڭ جالاقىسى 30 پايىزعا وسەدى. مەملەكەت باسشىسى تاپسىرماسىمەن 2020 -جىلعى قاڭتاردان 2023 -جىلعى قاڭتارعا دەيىن تاربيەشىلەردىڭ جالاقىسى جىل سايىن 25 پايىزعا وسكەن ەدى. 2023 -جىلعى 1-قىركۇيەكتەن باستاپ تاعى 30 پايىزعا وسەدى.

وسىلايشا، ەلىمىزدەگى 97 مىڭنان اسا پەداگوگتىڭ جالاقىسى 2,5 ەسە ارتادى.

توقايەۆ قىركۇيەكتەن باستاپ كىمدەردىڭ جاردەماقىسىن ءوسىرۋدى تاپسىردى؟

پرەزيدەنت بۇعان دەيىن ەرەكشە قاجەتتىلىگى بار ادامداردى الەۋمەتتىك قورعاۋ ماسەلەسىنە قاتىستى ايتقان ەدى.

«ولار ينفلياتسيانىڭ اسەرىن، ياعني، ازىق- تۇلىك پەن ءدارى-دارمەك باعاسىنىڭ ءوسۋىن قاتتى سەزىنەدى. ءبىز ەرەكشە قاجەتتىلىكتەرى بار جانە ولارعا كۇتىم جاسايتىن ادامداردى قولداۋ شارالارىن كۇشەيتۋىمىز كەرەك. وتباسىندا اسىراۋشىسىنان ايىرىلعان ازاماتتاردى نازاردان تىس قالدىرۋعا بولمايدى. ۇكىمەتكە بيىل 1-قىركۇيەكتەن باستاپ وسى ساناتتاعى ادامداردىڭ جاردەماقىسىن 14,5 پايىزعا ارتتىرۋدى تاپسىرامىن»، - دەدى پرەزيدەنت.

قىركۇيەكتەن باستاپ ءيت-مىسىقتى چيپتەۋگە قاتىستى قانداي وزگەرىس بولادى؟

1-قىركۇيەكتەن مىسىق پەن ءيتتى ەسەپكە قويىپ، چيپتەۋ مىندەتتى بولادى. ال ءۇي جانۋارلارىنىڭ باسقا تۇرلەرىن، ياعني ەگەۋقۇيرىق، حومياك نەمەسە ميني-پيگتەردى ەسەپكە الۋ ەرىكتى نەگىزدە جۇرگىزىلەدى.

قازاقستاندىقتار ءۇشىن ەلەكترون جۇيەگە جانۋارلارى تۋرالى اقپاراتتى ەنگىزۋ تەگىن بولادى. دەگەنمەن چيپ تاعۋ ءۇشىن مىسىق پەن يت يەلەرى ءوز قالتاسىنان اقشا تولەۋگە ءتيىس. ونى وتەۋگە مۇمكىندىگى جوق الەۋمەتتىك وسال توپتاعى ازاماتتارعا قىزمەت ءتۇرى تەگىن بولماق.

پارلامەنت پالاتالارىنىڭ بىرلەسكەن وتىرىسى قاشان وتەدى؟

ءماجىلىس ءتوراعاسى ەرلان قوشانوۆ پارلامەنت پالاتالارىنىڭ بىرلەسكەن وتىرىسىن شاقىرۋ تۋرالى وكىمگە قول قويعان بولاتىن. سوعان سايكەس قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسى 2023 -جىلعى 1-قىركۇيەكتە ساعات 11:00-دە استانا قالاسىندا وتەدى.

بلوگەرلەرگە قاتىستى قانداي وزگەرىس بولادى؟

10-شىلدەدە پرەزيدەنت «ينتەرنەت- الاڭدار جانە ينتەرنەت-جارنامالار تۋرالى» زاڭعا قول قويعان بولاتىن. سوعان سايكەس بلوگەرلەر جارنامالىق ماتەريالى ءۇشىن سالىق تولەيتىنى، ال جالعان اقپارات تاراتقانى ءۇشىن جاۋاپكەرشىلىككە تارتىلاتىنى ايتىلدى. زاڭ ب ا ق-تا رەسمي جاريالانعاننان كەيىن 60 كۇن ىشىندە كۇشىنە ەنەدى.

قىركۇيەكتەن باستاپ دەلي-الماتى باعىتىندا توتە رەيس اشىلادى

مادەنيەت جانە سپورت مينيسترلىگى جانە «Kazakh Tourism ۇ ك» ا ق قولداۋىمەن ءۇندىستاندىق IndiGo ءىرى اۋە كومپانياسى «دەلي - الماتى - دەلي» رەيسىن اشادى. بۇل باعىت بويىنشا تاسىمال قىركۇيەك سوڭىندا باستالىپ، ۇشاقتار اپتاسىنا ءۇش رەت ۇشادى.

قىركۇيەكتە قازاقستاندىقتار قالاي دەمالادى؟

الداعى قىركۇيەكتە قازاقستاندىقتار كۇنتىزبەدە سەنبى مەن جەكسەنبىگە سايكەس كەلەتىن توعىز كۇن دەمالادى. بۇل ايدا مەملەكەتتىك مەرەكەلەر جوق.

وسىلايشا، دەمالىس مىنا كۇندەرگە سايكەس كەلەدى: 2، 3، 9، 10، 16، 17، 23، 24 جانە 30 -قىركۇيەك.

قىركۇيەكتە اۋا رايى قانداي بولادى؟

قىركۇيەكتە ورتاشا تەمپەراتۋرا رەسپۋبليكانىڭ باسىم بولىگىندە نورماعا جاقىن، نورمادان 1 گرادۋسقا جوعارى بولادى دەپ كۇتىلەدى. بۇل قۇبىلىس باتىس قازاقستان، اتىراۋ، ماڭعىستاۋ، اقتوبەنىڭ سولتۇستىك-باتىس جارتىسىندا، قوستانايدىڭ سولتۇستىگىندە، سولتۇستىك قازاقستان وبلىستارىنىڭ شەتكى سولتۇستىك- باتىسىندا بايقالادى.

كۇزدىڭ ءبىرىنشى ايىندا جاۋىن- شاشىن مولشەرى دە رەسپۋبليكانىڭ باسىم بولىگىندە نورماعا جاقىن بولادى. بۇل قۇبىلىس ماڭعىستاۋ وبلىسى مەن ۇلىتاۋ وبلىسىندا، قاراعاندى، قىزىلوردا، تۇركىستان، جامبىل، الماتى وبلىستارىنىڭ جانە جەتىسۋ وبلىسىنىڭ باسىم بولىگىندە، اتىراۋدىڭ شەتكى وڭتۇستىك- شىعىسىندا، اقتوبە وبلىستارىنىڭ شەتكى وڭتۇستىك- باتىسىندا، اباي وبلىسىنىڭ وڭتۇستىك- باتىسىندا بايقالادى.