جاپونيا پرەمەر-ءمينيسترى جۇرتتىڭ الاڭداۋشىلىعىن باسۋ ءۇشىن فۋكۋسيمادان الىنعان تەڭىز ونىمدەرىن ءوزى جەپ كوردى
وسىلايشا، پرەمەر-مينيستر فۋكۋسيما اتوم ەلەكتر ستانسياسىنان تۇسەتىن سۋدىڭ ادام دەنساۋلىعىنا تەرىس اسەرى تۋرالى الاڭداۋشىلىقتى جويۋعا تىرىسقان، دەپ حابارلايدى قازاقپارات Kyodo-عا سىلتەمە جاساپ.
جاپونيانىڭ ەكونوميكا، ساۋدا جانە ونەركاسىپ ءمينيسترى، ۇكىمەتتەگى يادرولىق ساياساتقا جاۋاپتى ياسۋتوسي نيسيمۋرا تۇسكى اسقا فۋكۋسيما جاعالاۋىندا جينالعان الابۇعا، كامبالا جانە سەگىزاياقتان جاسالعان ساشيمي بەرىلگەنىن ايتتى.
«ءبىز ەلدە دە، شەتەلدە دە ا ە س ماڭىنداعى تەڭىزدە اۋلانعان تەڭىز ونىمدەرىنىڭ قاۋىپسىزدىگى تۋرالى حاباردار ەتۋىمىز كەرەك»، - دەدى يا. نيسيمۋرا پرەمەر-مينيستر كەڭسەسىندەگى كەزدەسۋدەن كەيىن جۋرناليستەرگە.
وتكەن بەيسەنبىدە جاپونيا جەرگىلىكتى بالىق اۋلاۋ كومپانيالارى مەن كورشى ەلدەردىڭ قورشاعان ورتاعا اسەرى تۋرالى الاڭداۋشىلىققا قاراماستان، قيراعان فۋكۋسيما اتوم ەلەكتر ستانسياسىنان تازارتىلعان راديواكتيۆتى سۋدى تىنىق مۇحيتىنا اعىزا باستادى.
جاپون بيلىگى تريتيدەن باسقا راديونۋكليدتەردىڭ كوپشىلىگى تازارتۋ پروتسەسى كەزىندە جويىلاتىنىن مالىمدەدى.
سەزي مەن سترونسي سياقتى راديواكتيۆتى زاتتارعا قاراعاندا تريتيدىڭ ادام دەنساۋلىعىنا زيانى از، ويتكەنى ول ءالسىز ساۋلە شىعارادى جانە دەنەدە جينالمايدى دەيدى ساراپشىلار.
اتوم ەنەرگياسى جونىندەگى حالىقارالىق اگەنتتىك جاپونيانىڭ سۋدى شىعارۋ ءادىسى الەمدىك قاۋىپسىزدىك ستاندارتتارىنا سايكەس كەلەتىنىن جانە ادامدار مەن قورشاعان ورتاعا رادياتسيانىڭ اسەرى شامالى بولاتىنىن مالىمدەدى.
سۋدىڭ مۇحيتقا توگىلۋىنە ءۇزىلدى-كەسىلدى قارسى بولعان قىتاي بىردەن جاپونيانىڭ بالىق ونىمدەرىن باس تارتتى.