سەمەيدە كوپبالالى وتباسىلارعا تۇرعىن ءۇي كىلتى تابىستالدى
سەمەي قالاسى اكىمدىگى باسپا ءسوز قىزمەتىنىڭ مالىمەتىنشە، بۇل - ساتىپ الۋ قۇقىعىنسىز جالدامالى تۇرعىن ۇيلەر.
«بۇگىن 10 وتباسىعا كومسومول كەنتىندەگى بودەنە كوشەسىندەگى ۇيلەردەن باسپانالى بولدى. ماۋسىم ايىندا 27 وتباسىعا قاراعايلى شاعىن اۋدانىنان پاتەر كىلتتەرىن تابىستاعان بولاتىنبىز. ال بۇگىن قالامىزدىڭ سول جاعالاۋىندا جەر ءۇيدىڭ كىلتىن تابىستاپ وتىرمىز. باسپانا يەلەرىن وسىنداي ايتۋلى كۇنمەن شىن جۇرەكتەن قۇتتىقتايمىن! جاڭا ۇيلەر بەرەكەلى بولىپ، بارشا شاڭىراققا قۋانىش اكەلسىن!» - دەدى قالا اكىمى نۇربول نۇرساعاتوۆ.
ايتا كەتەيىك، وسى جىلدىڭ قىركۇيەك ايىنىڭ سوڭىنا دەيىن كومسومول كەنتىنەن تاعى 32 كوپبالالى وتباسى باسپانالى بولماق. سونداي-اق سەمەي قالاسى بويىنشا ءۇي كەزەگىندە 13000 نان استام قالا تۇرعىنى تىركەلگەن. وسىعان وراي، قاراعايلى شاعىن اۋدانىندا 26 بيۋدجەتتىك كوپقاباتتى تۇرعىن ءۇيدىڭ قۇرىلىس جۇمىستارى جۇرگىزىلىپ جاتىر.
2023-جىلدىڭ سوڭىنا دەيىن مەملەكەتتىك باعدارلاما بويىنشا سالىنىپ جاتقان 15 كوپقاباتتى تۇرعىن ءۇيدىڭ (487 پاتەر) قۇرىلىسىن اياقتاۋ جوسپارلانىپ وتىر.