شىعىس قازاقستاندا جاڭا ەكى اۋدان قۇرىلادى
ق ر پرەزيدەنتى قاسىم-جومارت توقايەۆ ماۋسىم ايىنداعى ۇلتتىق قۇرىلتاي وتىرىسىندا شىعىس قازاقستانداعى ءبىرقاتار اۋداندى قايتا قالپىنا كەلتىرۋ قاجەتتىگى جايلى ايتقان بولاتىن.
سوعان وراي وبلىستا كەيبىر اۋدانداردى ءبولۋ جانە ولاردى 1997-جىلعى اۋماقتىق شەكارالارعا قايتارۋ جونىندەگى جوسپار بەكىتىلگەن.
بۇگىن وبلىستىق ءماسليحات دەپۋتاتتارى ش ق و قۇرامىندا اكىمشىلىك ورتالىعى ۇلكەن نارىن اۋىلى بولاتىن ۇلكەن نارىن اۋدانىن قۇرۋعا جانە جاڭا اۋداندى كاتونقاراعاي اۋدانىنىڭ قۇرامىنان بولۋگە، سونداي-اق اكىمشىلىك ورتالىعى مارقاكول اۋىلى بولاتىن مارقاكول اۋدانىن قۇرۋ جانە بۇل اۋداندى كۇرشىم اۋدانىنىڭ قۇرامىنان بولۋگە داۋىس بەردى. وسىلايشا، كاتونقاراعاي اۋدانىنىڭ اكىمشىلىك ورتالىعى ۇلكەن نارىن اۋىلىنان كاتونقاراعاي اۋىلىنا كوشىرىلەدى.
«جاڭا اۋدانداردى قۇرۋدىڭ ارقاسىندا ءبىز مەملەكەتتىك باسقارۋدى وڭتايلاندىرۋعا قول جەتكىزە الامىز. اۋدان ورتالىعىنا دەيىنگى قاشىقتىقتىڭ قىسقارۋىنا بايلانىستى قىزمەتتەرگە ىڭعايلى قولجەتىمدىلىكتى قامتاماسىز ەتەمىز. جەرگىلىكتى ماسەلەلەردى شەشۋدە اۋدانداردىڭ دەربەستىگىن ارتتىرامىز، ناتيجەسىندە حالىقتىڭ ءومىر ءسۇرۋ ساپاسى جاقسارادى. جاڭا جۇمىس ورىندارىن اشىپ، حالىقتىڭ كوشى-قون پروتسەستەرىنىڭ تومەندەۋىنە قول جەتكىزەمىز، - دەپ ءتۇسىندىردى كۇرشىم جانە كاتونقاراعاي اۋداندارىنىڭ اكىمدىكتەرىنەن.
دەپۋتاتتاردىڭ داۋىس بەرۋىنەن كەيىن شقو اكىمى ەرمەك كوشەربايەۆ جاڭادان قۇرىلىپ جاتقان اۋدانداردى دامىتۋ جونىندە ءبىرقاتار تاپسىرما بەردى.
«جاڭادان قۇرىلعان اۋدانداردى شتاتتارمەن قامتاماسىز ەتۋ جونىندە شارالار قابىلداۋ قاجەت. سۇراق وتە ماڭىزدى. ويتكەنى ءبىز قوسىمشا شتاتتاردى سۇراعان جوقپىز، ءبىراق اۋداندارداعى شتات تولىق بولۋى كەرەك. حالىقتىڭ ازدىعىنا قاراماستان، اۋداندار شەكارادا ورنالاسقان. ال بىزدە پرەزيدەنتتىڭ شەكارا ماڭىنداعى اۋدانداردى دامىتۋ جونىندەگى تاپسىرماسى بار. سوندىقتان ولاردى ءتيىستى مۇمكىندىكتەرمەن قامتاماسىز ەتۋ قاجەت»، - دەدى ايماق باسشىسى.
سونىمەن قاتار ش ق و اكىمىنىڭ ورىنباسارلارى جاڭا اۋدانداردا مەملەكەتتىك ورگانداردى ورنالاستىرۋ ءۇشىن عيماراتتاردى جوندەۋ ماسەلەسىن پىسىقتاپ، باسقا وڭىرلەردەن تارتىلاتىن مامانداردى تۇرعىن ۇيمەن قامتاماسىز ەتۋى ءتيىس. بۇدان بولەك، جاڭادان قۇرىلعان اۋدانداردا مەديتسينالىق ۇيىمدار اۋداندىق دەڭگەيگە اۋىستىرىلادى، ولار بارلىق قاجەتتى جابدىقتارمەن جانە كادرلارمەن قامتاماسىز ەتىلەدى.