الماتىداعى دۇكەندە ايەلدىڭ ومىراۋىن ۇستاعان ەر ادام اتىراۋدا ۇستالدى

اتىراۋ. قازاقپارات - الماتىداعى دۇكەندە ايەلدىڭ ومىراۋىن ۇستاعان ەر ادام اتىراۋدان ۇستالدى، دەپ حابارلايدى قازاقپارات ءتىلشىسى.

اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، وقيعا 18- تامىز كۇنى الماتى قالاسىنداعى سۋپەرماركەتتەردىڭ بىرىندە بولعان.

«ايەل ادامنىڭ ومىراۋىنا قولىن سالعان ەر ادام اتىراۋ قالاسىنان انىقتالىپ، ۇستالدى. اتىراۋ قالاسىنىڭ 1988-جىلعى تۇرعىنى ءوز كىناسىن تولىقتاي مويىندادى. ول الكوگولدىك ماس كۇيدە مۇنداي ورەسكەل ارەكەتكە بارعان. قۇقىق بۇزۋشىلىق ارەكەتى ءۇشىن ەر ادام ق ر اكىمشىلىك قۇقىق بۇزۋشىلىق تۋرالى كودەكسىنىڭ 434-بابىمەن (ۇساق بۇزاقىلىق) 5 تاۋلىك اكىمشىلىك قاماۋعا الىندى»، - دەپ حابارلادى دەپارتامەنتتىڭ باسپا ءسوز قىزمەتى.

ەسكە سالا كەتەلىك، بۇدان بۇرىن اتىراۋدا بۇرىنعى ايەلىن ۇرىپ، بەلگىسىز باعىتقا اكەتكەن ەر ادام ۇستالعانىن حابارلاعان بولاتىنبىز.

ەر ادام بۇرىنعى ايەلىن ۇرىپ-سوعىپ، كولىككە سۇيرەپ مىنگىزىپ، بەلگىسىز باعىتقا الىپ كەتكەن. بۇل تۋرالى وقيعا كۋاگەرلەرى 102 ارناسىنا قوڭىراۋ شالىپ، حابار بەرگەن.

«پوليتسيا قىزمەتكەرلەرى كۇدىككە ىلىنگەن Honda اۆتوكولىگىن اتىراۋ-قاراباتان تاسجولىنىڭ بويىنان توقتاتتى. الايدا، كولىكتىڭ 1987-جىلعى جۇرگىزۋشىسى پوليتسيا قىزمەتكەرلەرىنە قارسىلىق تانىتىپ، زاڭدى تالابىنا باعىنباعان. ال 1988-جىلعى ايەل بۇرىنعى كۇيەۋىنىڭ ءوزىن ۇرىپ-سوعىپ، دەنە جاراقاتىن سالعانىن، ەركىنەن تىس كولىكپەن بەلگىسىز باعىتقا الىپ بارا جاتقانىن مالىمدەدى. تەكسەرۋ كەزىندە كولىك جۇرگىزۋشىسىنىڭ بۇرىن سوتتى بولعانى، دەسترۋكتيۆتى ءدىني اعىم وكىلى ەكەنى انىقتالدى»، - دەپ ءمالىم ەتكەن ەدى دەپارتامەنتتىڭ باسپا ءسوز قىزمەتى.