دانيار ەلەۋسىنوۆ جانىبەك ءالىمحان ۇلىنىڭ بۇرىنعى باپكەرىمەن جاتتىعا باستادى

استانا. قازاقپارات – قازاقستاندىق كاسىپقوي بوكسشى، وليمپيادا چەمپيونى دانيار ەلەۋسىنوۆ امەريكالىق مامان باددي ماكگيرتپەن جاتتىعا باستاعانى جايلى حابارلادى.

بۇل جايىندا ول instagram پاراقشاسىندا جازدى.

باددي ماكگيرت قازاق جانكۇيەرلەرىنە تانىس جاتتىقتىرۋشى. وسىعان دەيىن وتانداسىمىز جانىبەك ءالىمحان ۇلىمەن بىرلەسە جۇمىس ىستەپ كەلگەن. جۋىردا عانا جانىبەك وزگە جاتتىقتىرۋشىعا اۋىسقان بولاتىن.

بادديمەن جاتتىعۋ ەرەكشە اسەر سىيلايدى. ول مەنى جاقسى ءتۇسىنىپ كەتتى ءارى جاتتىعۋدى ىڭعايلى جاساپ بەرۋدە. مەنىڭ جۇدىرىقتاسۋ ستيلىمە وزگەرىستەر دە ەنگىزۋدە. ادام رەتىندە اشىق-جارقىن ءارى تارتىمدى تۇلعا. ول قازاق بوكسشىلارىن قۇرمەتتەيدى. بۇعان دەيىن مەنى، ءبارى بىلەتىندەي، قازاقستانعا ەڭبەگى سىڭگەن جاتتىقتىرۋشى، اكەم مارات ەلەۋسىنوۆ جاتتىقتىرىپ كەلدى. بوكس جايلى نە بىلسەم، ءبارى ءۇشىن وعان قارىزدارمىن. اكەم ءارقاشان جاتتىقتىرۋشىم بولىپ قالادى. كاسىپقوي بوكستىڭ ءبىز دە بىلە بەرمەيتىن تۇستارى بارىن ۇعىنادى. سوندىقتان دا ەكەۋىنىڭ بىرلەسكەن تاجىريبەسى مەنى بۇدان دا كۇشتى ەتەرى انىق. جاقىن ارادا باددي مەن اكەمنىڭ بىرلەسكەن جۇمىسىنىڭ ناتيجەسىن كورەتىن بولاسىزدار، - دەپ جازدى بوكسشى.

باددي ماكگيرت - امەريكالىق جاتتىقتىرۋشى. ايگىلى ارتۋرو گاتتي، مايك تايسون، انتونيو تارۆەر، حاسيم راحمان، لەيمون بريۋستەر، حوەل كاسامايور، ۆەرنون فوررەست، سەرگەي كوۆاليەۆ سەكىلدى تانىمال سپورتشىلاردىڭ قابىلەتىن شىڭداعان.