سولتۇستىك قازاقستاندا بيىل كۇزدە اسكەرگە الىناتىن جىگىتتەر سانى بەلگىلى بولدى
ماڭىزدى ناۋقان الدىندا سالاداعى جاڭاشىلدىقتار تۋرالى دا ايتىلدى، دەپ حابارلايدى قازاقپارات ءتىلشىسى.
س ق و-عا كۇزگى اسكەرگە شاقىرۋ ناۋقانىنا دايىندىقتى پىسىقتاۋعا كەلگەن ق ر قارۋلى كۇشتەرى باس شتابىنىڭ ۇيىمداستىرۋ- جۇمىلدىرۋ جۇمىستارى دەپارتامەنتى باستىعىنىڭ ورىنباسارى رۋسلان وماروۆتىڭ ايتۋىنشا، قازىر قورعانىس مينيسترلىگى تاراپىنان سيفرلىق ترانسفورماتسيالاۋ ءىس-شاراسى جۇرگىزىلىپ جاتىر. ماقسات - مەرزىمدى اسكەري قىزمەتكە بارۋعا قىزىقتىراتىن جوبالاردى جۇزەگە اسىرۋ.
«مەرزىمدى اسكەري قىزمەتتىڭ تارتىمدىلىعىن ارتتىرۋ ماقساتىندا قورعانىس مينيسترلىگى ءبىرقاتار ءىس-شارالاردى قولعا الدى، سونىڭ ىشىندە «اسكەري مىندەتتى 2.0» جوباسى بار. اسكەري بورىشىن وتەپ كەلگەن ازامات وسى سيفرلىق پلاتفورما اياسىندا ۇ ب ت تاپسىرماي-اق ەلىمىزدەگى ءوزى تاڭداعان جوعارى وقۋ ورىندارىندا تەگىن ءبىلىم الا الادى. ۇزدىك دەپ تانىلعان، ۇپاي سانى جوعارى 3 مىڭ ساربازدى وسىلايشا وقۋعا تۇسىرەمىز. مينيسترلىك ەلىمىزدىڭ جەتەكشى ۋنيۆەرسيتەتتەرىمەن مەموراندۋمعا وتىردى. جوعارى وقۋ ورىندارىنىڭ سانى 70 تەن اسادى. تىزىمگە كىرمەي قالعاندار اسكەري بورىشىن وتەپ كەلگەننەن كەيىن ەكى جىل ىشىندە بۇل مۇمكىندىكتى پايدالانا الادى. الايدا ولار ۇ ب ت تاپسىرماعانىمەن، وقۋدى اقىلى وقيدى»، - دەيدى رۋسلان وماروۆ.
بۇدان باسقا مەرزىمدى اسكەري قىزمەتكە الىنعاندارعا كرەديتتىك كانيكۋل بەرىلەدى.
«بۇرىن شاقىرىلۋشى «مەنىڭ نەسيەم بار» دەپ اسكەرگە بارۋدان باس تارتاتىن. قورعانىس مينيسترلىگى قارجى نارىعىن رەتتەۋ اگەنتتىگىمەن مەموراندۋمعا وتىردى. ياعني اسكەرگە الىنۋشىنىڭ نەسيەسى بولسا، ول ونى بورىشىن وتەپ كەلگەننەن كەيىن وتەي الادى.
سيفرلىق ترانسفورماتسيالاۋ ناتيجەسىندە قازىر جاستار اۆتوماتتى تۇردە اسكەري ەسەپكە الىنادى. بۇرىن ەسەپكە تۇرۋعا ءبىر اپتا بەرىلەتىن، قازىر ونى الىپ تاستادىق.
ەڭ ماڭىزدى ماسەلەلەردىڭ ءبىرى - بۇرىن 17 جاستاعى جاسوسپىرىمدەر جىل سايىن اسكەري تىركەلۋگە مىندەتتى بولاتىن. ونىڭ ەكى سەبەبى بار، اسكەري ەسەپ جانە جاس ءوسپىرىمنىڭ دەنساۋلىعىن تەكسەرۋ. سيفرلىق ترانسفورماتسيالاۋ ناتيجەسىندە 2024 -جىلدىڭ 1-قاڭتارىنان باستاپ جاسوسپىرىمدەردى اسكەري ەسەپكە الۋ تاجىريبەسى جويىلادى»، - دەيدى رۋسلان وماروۆ.
س ق و-دا كوكتەمدە 400 دەن استام جىگىت اسكەر قاتارىنا الىنىپ، بۇگىندە ەلىمىزدىڭ اسكەري بولىمدەرىندە ازاماتتىق بورىشىن وتەپ جاتىر. كۇزدە ولاردىڭ قاتارىنا تاعى 500 گە جۋىق ازامات قوسىلماق.