حيدجاب تاقىرىبىن ساياسيلاندىرۋ ءدىننىڭ وزىنە قاۋىپتى - مينيستر
«ءبىرىنشى كەزەكتە جالپى زايىرلىلىق ۇستانىمىن باسا ايتقان ءجون. سەبەبى، ءبىزدىڭ اتا زاڭىمىز بار، بەلگىلى زاڭدار بار. سوندىقتان، زايىرلىلىق پرينتسيپى - ەلىمىزدىڭ باستى ۇستانىمى. ەكىنشىدەن، كەيبىر قوعامدىق پىكىر قالىپتاستىرۋشىلار مانيپۋلياتسياعا يتەرمەلەيتىن سياقتى. مىسالى، كەيبىر جەلى قولدانۋشىلارى «حالىقارالىق تاجىريبەدە، الەمدە بۇل ماسەلە شەشىمىن تاپقان» دەپ ءۇزىلدى- كەسىلدى جازعان ەكەن. مەنىڭشە، بۇل - فەيك اقپارات. سەبەبى دامىعان، زايىرلى، دەموكراتيالىق فرانسيا، اۋستريا سياقتى ەلدەر جاسىنا بايلانىستى حيدجابقا شەكتەۋ قويعان. ارينە، رۇقسات ەتەتىن ەلدەر دە بار. سوندىقتان، ءبىز بۇعان بايلانىستى حالىقارالىق تاجىريبەنىڭ ءارتۇرلى ەكەنىن كورەمىز. ءار ءتۇرلى مەملەكەتتىڭ وزىنە ساي ۇستانعان باعىتى بار، تاجىريبەسى بار. ءبىزدىڭ دە وزىندىك ۇستانىم- باعىتىمىز بار. ول - زايىرلىلىققا جانە اتا زاڭعا باعىنۋ»، - دەدى مينيستر YouTube پلاتفورماسىنداعى «وزەكتى» جوباسىندا.
د. قىدىرالى ءبىلىم تۋرالى زاڭدا دا مەكتەپ فورماسى ناقتى بەكىتىلگەنىن ەسكە سالدى. جاقىندا وقۋ- اعارتۋ ءمينيسترى عاني بەيسەمبايەۆ ءوز پىكىرىن ايتقان ەدى.
«تاعى ءبىر ايتا كەتەرلىك جاعداي، ءبىز ءدىني سەنىم بوستاندىعىنا دا قۇرمەتپەن قارايمىز، مەملەكەتتە وعان بارلىق جاعداي جاسالعان. ايتالىق، ءدىن ىستەرى باسقارمالارىنا قاراستى مەدرەسە- كوللەدجدەر بار، سولاردا قىز بالالاردىڭ ءبىلىم الۋىنا جاعداي جاسالعان. سونىمەن قاتار، بۇل ماسەلەگە ءداستۇر تۇرعىسىنان دا قارايتىندار بار. ءبىلىم بەرۋ مەكەمەلەرىنىڭ باستى ماقساتى - وقىتۋ، بالاعا ءبىلىم بەرۋ. قۇراننىڭ دا العاشقى ءامىرى «وقى» دەپ باستالاتىنىن بىلەمىز. ەڭ باستىسى، بۇل تاقىرىپتى ساياسيلاندىرماۋ كەرەك. سەبەبى، ساياسيلانۋ، راديكالدانۋ ەڭ اۋەلى ءدىننىڭ وزىنە قانشالىقتى قاۋىپتى ەكەنىن ءبىز تاياۋ شىعىستان نەمەسە توڭىرەكتەگى ەلدەردەن جاقسى بىلەمىز»، - دەدى دارحان قىدىرالى.