استانادا ءبىر بولمەلى پاتەردىڭ جوندەۋ جۇمىسىنا قانشا تەڭگە كەرەك؟
TengriLife ءتىلشىسى ۇيىنە جوندەۋ جۇمىسىن جۇرگىزگەن ەلوردالىق نادەجدامەن بىرگە شىعىنداردى ەسەپتەدى.
«پاتەر الۋ ارمانىم ەدى»
مەنىڭ ەسىمىم - نادەجدا. ەلورداداعى كىشكەنتاي ءبىر بولمەلى پاتەرىمنىڭ اۋماعى 36 شارشى مەتردى قۇرايدى. وسىدان ءتورت جىل بۇرىن پاتەرىمدى جوندەۋ جۇمىسى ىستەلمەگەن، لامينات توسەلگەن، قابىرعاسى تازا كۇيىندە العانمىن.
استاناداعى سول جاعالاۋدان جەكە پاتەر الۋ ارمانىم ەدى. 2019 -جىلى پاتەردى العان سوڭ، رەتكە كەلتىردىك. ول كەزدە بار ويىم تەزىرەك كوشۋ بولدى. سول ءۇشىن جىلدام ءبىتسىن دەگەن ويمەن ءتۇسقاعازدار مەن توبەسىن جاپسىرۋعا مامان شاقىرتتىق. «وتە جىلدام» ىستەلگەن جوندەۋ جۇمىسى 300 مىڭ تەڭگەگە شىققان بولاتىن.
سول كەزدەرى قىمبات جيھاز الۋدىڭ رەتى كەلمەدى، سەبەبى قارجىلىق جاعدايىمىز كوتەرمەدى. اس ءۇي سورەسىن سايتتاعى حابارلاندىرۋدان 23 مىڭعا الدىم، ال كەرەۋەت پەن كيىم سورەسى پاتەردە بولدى. اتا-انام بەرگەن ەسكى پەردەنى ءىلىپ، 10 مىڭ تەڭگەدەن ءبىرتۇستى قابىرعا قاعازدارىنىڭ بىرنەشەۋىن العانمىن. ءبىراق «ءوز ءۇيىم - ولەڭ توسەگىم».
«ءبىر اي بۇرىن دايىندالدىق»
وسى جولى جوندەۋ جۇمىستارىنا دايىندىق كەزىندە تاڭداۋىم قىمبات بولاتىنىن ءتۇسىندىم. ونىڭ ۇستىنە تەك قانا ءتۇسقاعازداردى اۋىستىرمايمىن عوي. شاعىن عانا 36 شارشى مەترلىك ۇيىمە تولىعىمەن جوندەۋ جۇمىستارىن جۇرگىزەتىن بولىپ شەشتىم.
استانادا جوندەۋ جۇمىستارىنىڭ ماۋسىمى مامىردا باستالىپ، قىركۇيەككە دەيىن جالعاسادى. ەڭ باستىسى - كاسىبي ماماندى تابۋ. ءبىز ءبىر اي بۇرىن دايىندالدىق. ءتىپتى، باستالاتىن كۇندى الدىن الا بەلگىلەپ قويدىق. بارىنەن بۇرىن ۇيدەگى سارعىش تۇستەن قۇتىلعىم كەلدى. سارى لامينات، سارى ەسىك، ت. ب.
قۇرىلىس بازارىنان كەرەك-جاراقتى الاتىن بولىپ شەشتىك. ىستىق كۇندە ىڭعايسىز، ءبىراق بازاردا ءبارىبىر باعا ارزان ەكەن. تاعى ءبىر ۇناعان تۇسى كۇلىپ تۇرىپ، ارزانعا ساۋدالاسۋعا بولادى.
جوندەۋ جۇمىستارى كوپ ۋاقىت الماس ءۇشىن باستالاتىن كۇنگە ءبىر اپتا قالعاندا انام ەكەۋمىز ءتۇسقاعازداردى جىرتتىق. زاتتاردى باسقا جەرگە اپارىپ، پاتەردى بوساتتىق.
شىعىندار ءتىزىمى
جوندەۋ جۇمىستارىنا 300 مىڭ تەڭگە جۇمسادىق. بۇل سوماعا تازالاۋ جۇمىستارى مەن ەسىكتەردى قوندىرۋ دا كىرەدى.
لامينات بارىنەن ەڭ قىمباتى ەكەن. 36 شارشى مەترلىك شاعىن پاتەرىمىزگە نەگىزگى ەدەن تاقتايى مەن لامينات 200 مىڭ تەڭگەگە شىقتى.
· قوسپالار، قۇرىلىس سومكەلەرى جانە ت. ب. - 80050 تەڭگە
· كيستالار، شىعىن ماتەريالدارى، ت. ب. - 110070 تەڭگە
· قابىرعا بوياۋى - 80600 تەڭگە
· ەكى ەسىك ۇستاعىشىمەن - 99702 تەڭگە
· بۇرىشتار - 9000 تەڭگە
· توك كوزدەرى - 35600 تەڭگە
پاتەردىڭ توبەسىن اۋىستىرمادىق. قالعان جوندەۋ جۇمىستارىنا 915122 تەڭگە جۇمسالدى.
ءبىر بولمەلى پاتەرگە ءبىر ايدان كوپ ۋاقىت كەتتى. بۇدان دا تەز اياقتاۋعا بولار ەدى. ءبىراق جوندەۋ جۇمىستارىن تەك ءبىر ادام عانا ىستەدى. ۇناماعانى - قۇرىلىس بازارىنا بارۋ جانە ۋاقىتىڭدى جولعا قۇرتۋ. بازارعا بارۋىمىز كەيدە ءبىر كۇندى تولىعىمەن الدى.
كورسەتىلگەن سومانىڭ ىشىنە اس ءۇي سورەسى، جيھاز، كيىم سورەسى، اس ءۇي جابدىقتارى، تۇرمىستىق تەحنيكالار، پەردە باعاسى، ت. ب. كىرمەيدى.
جالپى جوندەۋ جۇمىستارى كەزىندە بارلىق كيىمدەر مەن جيھازداردى باسقا پاتەرگە الىپ كەتكەن دۇرىس. سەبەبى ولاردى قانشا قاپتاعانمەن، ءبارىبىر شاڭ قالادى.
قورىتىندى: ءبىر بولمەلى پاتەردەگى جوندەۋ جۇمىستارى 915122 تەڭگەگە شىقتى. ونىڭ 300 مىڭ تەڭگەسى جوندەۋ جۇمىسىنا، 615122 تەڭگە قۇرىلىس ماتەريالدارى مەن ت. ب. زاتتار الۋعا جۇمسالدى.