ق ر پرەزيدەنتىنىڭ ءىس باسقارماسى قىزمەتكەرلەرىنىڭ مەملەكەتتىك ءتىلدى مەڭگەرۋىن جەتىلدىرۋگە باعىتتالعان كۋرس باستالدى
«بۇگىنگى تاڭدا مەملەكەتتىك ءتىلدى ءبىلۋ ءار ازاماتتىڭ باسەكەگە قابىلەتتىلىگىن ارتتىرا تۇسەدى دەسەك ارتىق ەمەس. وسى ورايدا، پرەزيدەنتتىڭ ءىس باسقارماسى جۇيەسىندە كادرلاردىڭ الەۋەتىن كوتەرۋ ءۇشىن مەملەكەتتىك ءتىلدى ۇيرەتۋ جانە دەڭگەيىن جەتىلدىرۋ كۋرسى اشىلعانىنا توقتالعىم كەلىپ وتىر.
ۆەدومستۆوعا قاراستى مەكەمەلەردىڭ قىزمەتكەرلەرىنە ارنالعان كۋرس مەديتسينالىق تەحنولوگيالار جانە اقپاراتتىق جۇيەلەر ورتالىعىندا وتەدى. مۇندا مەملەكەتتىك ءتىلدى بازالىق دەڭگەيدە ءبىلىپ قانا قويماي، ىسكەرلىك قازاق ءتىلىن جەتىلدىرۋگە كۇش سالىناتىنىن ايتا كەتۋ كەرەك.
جالپى، بۇل جوبا ارىپتەستەرىمىزدىڭ تاراپىنان قولداۋ تاپتى دەۋگە بولادى. از ۋاقىت ىشىندە 22 ۆەدومستۆولىق مەكەمەنىڭ 700 قىزمەتكەرى قاتىسۋعا تىلەك بىلدىرگەنى وسىنى كورسەتىپ وتىر»، - دەلىنگەن حابارلامادا.
سونداي-اق وندا ماسەلەنى جان-جاقتى قاراستىرۋ ءۇشىن قازتەست جۇيەسى ارقىلى مامانداردىڭ ءتىلدى ءبىلۋ دەڭگەيى انىقتالىپ، سايكەسىنشە باعدارلامالار تاڭدالعانى ايتىلادى. الداعى قىركۇيەكتەن باستاپ العاشقى توپتاعى 200 ادام وقۋدى باستاۋعا ءتيىس. قىزمەتكەرلەرگە ىڭعايلى بولۋى ءۇشىن ساباق ورتالىق ورنالاسقان عيماراتتا عانا ەمەس، ءار كاسىپورىننىڭ بازاسىندا دا اپتاسىنا 3 رەت وتەدى.
بۇگىنگى تاڭدا مەملەكەتتىك ورگانداردا ءىس قاعازدارىن قازاقشا جۇرگىزۋگە دەن قويىلىپ وتىرعانى ءمالىم.
«وسى ورايدا، قازاق ءتىلى كۋرستارىندا العان بىلىمدەرىڭىز بەن مەڭگەرگەن ماشىقتارىڭىز جۇمىس بارىسىندا قارىم-قاتىناس جاساۋعا، قىزمەت اياسىنداعى مىندەتتەرىڭىزدى ساپالى اتقارۋعا، كاسىبي تۇرعىدا دامۋعا كومەكتەسەدى دەپ سەنەمىن»، - دەلىنگەن اقپارتتا.