ش ق و-دا قاريانى ۇرىپ-سوعىپ، سكوتچپەن بايلاعان ۇرىلار ونىڭ ۇيىنەن ماردىمدى اقشا تاپپاعان
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وقيعا شەمونايحا قالاسىندا بولعان.
پوليتسياعا حابارلاسقان زەينەتكەر ۇيىنە توناۋشىلار تۇسكەنىن ايتىپ، كومەككە شاقىردى.
«بەلگىلى بولعانداي، ەكى ەر ادام 73 جاستاعى قاريانىڭ ۇيىنە باسا- كوكتەپ كىرىپ، اياعىن سكوتچپەن بايلاپ، ۇرىپ-سوعىپ، 70000 تەڭگە اقشاسىن ۇرلاپ كەتكەن. وقيعا ورنىنا جەدەل جەتكەن ءتارتىپ ساقشىلارى كۇدىكتىلەردى ۇستادى. ولار 41 جانە 62 جاستاعى جەرگىلىكتى تۇرعىندار بولىپ شىقتى. ەكەۋى دە بۇرىن وسىعان ۇقساس قىلمىس جاساعانى ءۇشىن سوتتالعان»، - دەلىنگەن اقپاراتتا.
كىناسىن مويىنداعان كۇدىكتىلەر قىلمىستى الدىن الا ءسوز بايلاسىپ جاساعانىن ايتقان.
جابىرلەنۋشى ەگدە جاستا بولعاندىقتان وزدەرىنە قارسى تۇرا المايتىنىنا سەنىمدى بولعان.
ءتىپتى العان اقشاسىن قاناعات تۇتپاي، ىشتەگى باعالى تۇرمىستىق تەحنيكانى الىپ شىعۋ ءۇشىن قايتا ورالىپ كەلە جاتىپتى.
«قازىرگى ۋاقىتتا ەكەۋى سوت سانكسياسىمەن قاماۋعا الىندى. اتالعان فاكتى بويىنشا ق ر ق ك 191-بابى 3-بولىگىنە (توناۋ) سايكەس سوتقا دەيىنگى تەرگەۋ امالدارى باستالدى. ەندى ەر ادامدار بەستەن- ون جىلعا دەيىنگى مەرزىمگە باس بوستاندىعىنان ايىرىلۋى مۇمكىن»، - دەلىنگەن حابارلامادا.