الاكولدىك بالىقشى قىسى-جازى بالىق اۋلاپ، ەل ىرىزدىعىن ەسەلەپ ءجۇر
الاكولدىڭ جاعاسىن قونىستانعان حالىق بالىقشىلىقتى كاسىپ ەتكەن. بالىق اۋلاپ، ءناپاقاسىن تاۋىپ جۇرگەندەردىڭ ءبىرى - نۇرجان ارىنوۆ، دەپ حابارلايدى قازاقپارات ءتىلشىسى.
بالىقشىنىڭ ەڭبەگى - ەتەك-جەڭى كەپكەنشە. بىرەۋلەر ءۇشىن بالىق اۋلاۋ - ەرمەك بولسا، ەندى بىرەۋلەرى ءۇشىن كاسىپ.
الاكولدىك نۇرجان ارىنوۆ 20 جىلعا جۋىق وسى سالادا ەڭبەك ەتىپ كەلەدى. وزىمەن قاتار، بالالارىن دا كاسىبي بالىق اۋلاۋدىڭ ۇردىسىنە باۋلىپ ءجۇر.
ايتۋىنشا، كوز اشا كورگەنى - قايىق پەن اۋ. مەكتەپتەن سوڭ ماماندىق تاڭداپ، تەحنيكۋم بىتىرگەن.
ءبىراق، اتا-باباسى اينالىسقان كاسىپتىڭ قۇتى تارتىپ، قولىنا اۋ الىپتى. سانالى عۇمىرى الاكولدىڭ ايدىنىندا ءوتىپ جاتىر.
قىسى-جازى بالىق اۋلاپ، ەل ىرىزدىعىن ەسەلەپ ءجۇر.
«كەز كەلگەن جۇمىستىڭ، كاسىپتىڭ وزىنە ءتان قيىندىعى بولادى. سول سياقتى بالىق اۋلاۋ شارۋاسى دا وڭاي ەمەس. قىستا، سارىشۇناق ايازدا كولدىڭ ورتاسىنا شىعامىز. مۇز ويىپ، ساعاتتاپ وتىرىپ بالىق اۋلايمىز. جازدا كەشكە اۋ قۇرامىز. تاڭەرتەڭ بارىپ الامىز. ونى ساعات توعىزعا دەيىن وتكىزىپ ۇلگەرۋمىز كەرەك. كولدىڭ تابيعاتى قيىن. تولقىندار بولادى. جەلمەن ارپالىسىپ جۇمىسىڭ كۇردەلەنەدى. سونىسىمەن دە قىزىق. وزىمە ۇنايدى»، - دەيدى بالىقشى.
اۋدان ورتالىعىندا ءىسىڭ دونگەلەتىپ وتىرعان ازامات تاڭ سارىدەن شىعىپ، جەرگىلىكتى مەكەمەلەرگە جاڭا اۋلانعان بالىقتى جەتكىزەدى.
كۇنىنە 50 كەلىگە جۋىق بالىق اۋلايدى. كەي كۇندەرى كۇن رايىنىڭ كۇرت وزگەرۋى جۇمىسقا قولايسىزدىق تۋدىرادى.
ماسەلەن، جەلدىڭ قاتتى سوعۋىنا بايلانىستى ايىقپەن كولگە شىعىپ، قارماققا تۇسكەن بالىقتى الا المايتىن جاعدايلار ءجيى بولىپ تۇرادى.
«بۇرىن 20-30 اۋ قۇرساق، قازىر ونىڭ سانىن 40-قا جەتكىزدىك. قازىر بالىق ازايىپ كەتتى. نەگىزى بالىق شارۋاسىنىڭ شىعىنى وتە كوپ. قايىق الاسىڭ، ونىڭ كەرەك-جاراعى بار. ءبارى قىمبات»، - دەدى ول.
نۇرجان ارىنوۆتىڭ سوزىنشە، كاسىبىن بالالارى جالعاستىرۋعا نيەتتى.
«بالالارىم دا وسى كاسىپتى ۇيرەنىپ ءجۇر. مەن سياقتى بالىق اۋلاپ، جولىمدى جالعاستىرماقشى. بولاشاقتا جاڭا قايىقتار ساتىپ الىپ، شارۋاشىلىقتى كەڭەيتۋدى جوسپارلاپ وتىرمىز. ۇكىمەت تە قازىر ىنتا- ىقىلاستارىنا ساي، بالىق شارۋاشىلىقتارىن دامىتۋدى قۇنتتاپ وتىر»، - دەيدى الاكولدىك بالىقشى.
ايتا كەتەيىك ق ر ەكولوگيا، گەولوگيا جانە تابيعي رەسۋرستار مينيسترلىگى ەلدە بالىق اۋلاۋمەن اينالىساتىن سۋبەكتىلەر ءۇشىن قوسىمشا قۇن سالىعى 70 پايىزعا تومەندەيتىنىن حابارلاعان بولاتىن.