جىبەك جولى ارناسىنان ءلايلا سۇلتان قىزىنىڭ جاڭا باعدارلاماسى ەفيرگە شىقتى

استانا. قازاقپارات - بيىلدان باستان «جىبەك جولى» تەلەارناسىنىڭ ەفيرىنەن ءلايلا سۇلتان قىزىنىڭ اۆتورلىق جوباسى - «انا بولعىم كەلەدى» باعدارلاماسى ەفيرگە جول تارتتى، دەپ حابارلايدى قازاقپارات.

العاشىندا قايىرىمدىلىق-الەۋمەتتىك باعىتتاعى تەلەجوبا بەدەۋلىك دەرتىنە شالدىققان ەرلى-زايىپتىلارعا كومەك كورسەتۋ ماقساتىندا بىلتىر ءلايلا سۇلتان قىزىنىڭ Instagram الەۋمەتتىك جەلىسىندە باستالعان بولاتىن.

بۇل باستاماعا ءتۇرلى سەبەپتەرمەن «اڭساعان ءسابي» مەملەكەتتىك كۆوتاسىنا ىلىنە الماعان (گەنەتيكالىق اۋىتقۋ، جاسىنىڭ ۇلكەندىگى، ا م گ مولشەرىنىڭ تومەندىگى جانە ت. ب. سەبەپتەرگە بايلانىستى) ءسابيلى بولۋدى ارمانداپ جۇرگەن وتباسىلار تاڭداپ الىنعان بولاتىن.

ەلىمىزدە ە ك ۇ باعدارلاماسىن جاساتۋدىڭ ورتاشا قۇنى - 2 ميلليون تەڭگە. بۇنداي كولەمدەگى قاراجاتتى جيناۋعا ءلايلا سۇلتان قىزىنىڭ وقىرماندارى مەن قايىرىمدى جاندار كومەك كورسەتكەن ەدى.

وسى جوباعا قاتىسقان قىزىلوردالىق اينۇر ەسىمدى بەسىنشى پاتسيەنت جۇكتى بولىپ، جاقىندا ءسابيىن ومىرگە اكەلدى.

«انا بولعىم كەلەدى» جوباسىنىڭ العاشقى ماۋسىمىندا تاعى دا قايىرىمدى جانداردىڭ كومەگىمەن التى پاتسيەنت ە ك ۇ باعدارلاماعا تاڭداپ الىندى.

بۇگىندە جوبا اياسىندا جالپى سانى 11 جۇپ ە ك ۇ باعدارلاماسىنان ءوتىپ جاتىر. جىل سوڭىنا دەيىن بۇل كورسەتكىشتى 20 عا دەيىن جەتكىزۋ جوسپاردا بار.

وسى ۋاقىتقا دەيىن 3 ايەل بالا كوتەردى. بۇنىڭ ءوزى - مەديتسينالىق جانە شىعارماشىلىق توپ ءۇشىن ۇلكەن جەتىستىك.

جوبا پاتسيەنتتەرى ەلىمىزدىڭ الماتى، استانا، تاراز، اقتاۋ، پاۆلودار، قاراعاندى، اقتوبە، وسكەمەن وڭىرلەرىنەن كەلىپ، مىقتى مامانداردىڭ باقىلاۋىندا.

جاڭا تەلەۆيزيالىق ماۋسىمدا «انا بولعىم كەلەدى» جوباسىنىڭ شىعارماشىلىق ۇجىمى پاتسيەنتتەردىڭ اتا-انا اتانۋ جولىنداعى كۇرەسىنە، ۇمىتىنە، كەي كەزدە ءساتسىز ساتتەرىنە دە كۋاگەر بولىپ، ولاردىڭ جاقسىلىقتارىنا ورتاقتاسىپ، كورەرمەننەن ءسۇيىنشى سۇرايتىن كۇندى دە اسىعا كۇتەدى.