كەنتاۋ قالاسىنىڭ ەكس-اكىمىنە سوت ۇكىمى شىقتى

استانا. قازاقپارات - كەنتاۋ قالاسىنىڭ ەكس-اكىمى راشيد ايۋپوۆقا قاتىستى سوت ۇكىمى شىقتى، دەپ حابارلايدى قازاقپارات ءتىلشىسى.

«راشيد ايۋپوۆ قىلمىستىق كودەكستىڭ 177-بابى (1997-جىلعى رەداكسياسى) بويىنشا قىلمىستىق جاۋاپتىلىققا تارتۋ ءۇشىن مەرزىمىنىڭ ءوتىپ كەتۋىنە بايلانىستى قىلمىستىق جاۋاپكەرشىلىكتەن بوساتىلسىن. راشيد ايۋپوۆ ق ر ق ك 28-بابىنىڭ 4-بولىگىندە، 312-بابىنىڭ 5-بولىگىندە (1997-جىلعى رەداكسياسى) كوزدەلگەن قىلمىستارى ءۇشىن كىنالى دەپ تانىلسىن جانە وسى باپ بويىنشا ورتاشا قاۋىپسىزدىكتەگى مەكەمەدە جازاسىن وتەي وتىرىپ، 10 جىلعا باس بوستاندىعىنان ايىرۋ تۇرىندەگى جازا تاعايىندالسىن»، - دەپ ۇكىم وقىدى سۋديا.

سونداي-اق، ونىڭ 7 جىل مەملەكەتتىك قىزمەتتە جۇمىس ىستەۋىنە تىيىم سالىندى. بۇعان قوسا، ر. ايۋپوۆتان سىبايلاس جەمقورلىق جولىمەن العان 422 ميلليون 800 مىڭ تەڭگە مەملەكەت پايداسىنا وندىرىلمەك.